I Yôhan 4 - Nau Brah Ndu Ngơi 2023

Rlong uănh phung brah

¹ Hơi phung gâp rŏng, lơi chroh ôh ma lĕ rngôch brah huêng, ƀiălah lŏng nâl uănh phung brah huêng nây, geh tât tă bơh Brah Ndu mâu lah mâu, yorlah geh âk nơm mbơh lor nklă mpơl jêh tâm neh ntu.

² Tă bơh nau aơ, khân may dơi gĭt Brah Huêng Ueh Brah Ndu: Moh brah dơn Brah Yêsu Krist văch jêh tâm nglay săk, huêng brah nây văch tă bơh Brah Ndu;

³ moh brah huêng mâu dơn nanê̆ kơt nĕ ma Brah Yêsu mâu di văch tă bơh Brah Ndu ôh. Nây jêng huêng brah tă bơh nơm tâm rdâng đah Brah Krist, khân may tăng jêh dăch tât, jêh ri aƀaơ gŭ jêh tâm neh ntu.

⁴ Hơi phung kon jê̆, khân may jêng phung Brah Ndu jêh ri dơi đah khân păng jêh, yorlah Nơm gŭ tâm khân may jêng toyh lơn ma nơm gŭ tâm neh ntu.

⁵ Khân păng jêng phung neh ntu, pôri khân păng ngơi lĕ nau kan neh ntu, jêh ri neh ntu gŭ iăt khân păng.

⁶ He jêng phung Brah Ndu. Mbu nơm gĭt năl Brah Ndu gŭ iăt nau he, bi mbu nơm mâu jêng phung Brah Ndu mâu iăt nau he ôh. Ma nau nĕ, he gĭt năl brah huêng nau ngăn jêh ri huêng brah nau vĭ vĭr.

Nau rŏng Brah Ndu gŭ tâm he

⁷ Hơi phung gâp rŏng, ăn he tâm rŏng ndrăng he, yorlah nau rŏng văch tă bơh Brah Ndu. Mbu nơm rŏng deh jêh tă bơh Brah Ndu jêh ri gĭt năl Brah Ndu.

⁸ Mbu nơm mâu blau tâm rŏng mâu mâp gĭt năl Brah Ndu ôh; yorlah Brah Ndu jêng nau rŏng.

⁹ Nau Brah Ndu rŏng đah he tâm mpơl jêh tâm nau aơ: Brah Ndu njuăl jêh Kon Dul Păng văch ta neh ntu gay he geh nau rêh tă bơh Kon Păng.

¹⁰ Nau rŏng gŭ tâm nau aơ: Mâu di he rŏng jêh ma Brah Ndu ôh, ƀiălah Brah Ndu rŏng jêh ma he jêh ri njuăl Kon Păng ƀư ndơ nau ƀư brah tâm chuai nau tih he.

¹¹ Hơi phung gâp rŏng, tơlah Brah Ndu rŏng jêh ma he kơt nĕ, ăn he tâm rŏng lĕ ndrăng he.

¹² Mâu geh du huê bunuyh mâp saơ Brah Ndu ôh; tơlah he tâm rŏng ndrăng he, Brah Ndu gŭ tâm he, jêh ri nau rŏng Păng jêng nŭm rĭng tâm he.

¹³ Tă bơh nau aơ, he gĭt năl he nơm gŭ tâm Păng jêh ri Păng tâm he, yorlah Păng ăn jêh Brah Huêng Ueh Păng ma he.

¹⁴ Hên lĕ saơ jêh ri mbơh nkoch Brah Ndu Mbơ̆ njuăl jêh Kon Păng jêng Nơm Tâm Rklaih ma neh ntu.

¹⁵ Mbu nơm mbơh Brah Yêsu jêng Kon Brah Ndu, Brah Ndu gŭ tâm bunuyh nây, jêh ri bunuyh nây gŭ tâm Brah Ndu.

¹⁶ He gĭt năl jêh ri chroh ma nau rŏng Brah Ndu đah he. Brah Ndu jêng nau rŏng; mbu nơm gŭ tâm nau rŏng jêng gŭ tâm Brah Ndu, jêh ri Brah Ndu gŭ tâm bunuyh nây.

¹⁷ Tă bơh nau aơ, nau rŏng jêng nŭm rĭng tâm he gay ma he geh nuih n'hâm nâp tâm nar phat dôih; yor mâm nau Păng jêng, he jêng kơt nây đŏng tâm neh ntu aơ.

¹⁸ Mâu geh nau klach tâm nau rŏng, ƀiălah nau rŏng nŭm rĭng mƀăr lơi nau klach. Yorlah nau klach geh tât ma nau tâm rmal, jêh ri mbu nơm klach mâu dơi nŭm rĭng tâm nau rŏng.

¹⁹ He rŏng yorlah Kôranh Brah rŏng jêh ma he lor.

²⁰ Tơlah du huê lah: “Gâp rŏng ma Brah Ndu” ƀiălah tâm rmot ma oh nâu păng nơm, păng jêng nơm ngơi mƀruh. Yorlah mbu nơm mâu rŏng ma oh nâu păng nơm dơi saơ, păng mâu dơi rŏng ma Brah Ndu, Nơm păng mâu dơi saơ ôh.

²¹ He dơn jêh tă bơh Păng nau vay ntăm aơ: Mbu nơm rŏng ma Brah Ndu, ăn păng rŏng ma oh nâu păng nơm tâm ban lĕ.