I Yôhan 3 - Nau Brah Ndu Ngơi 2023

Kon Brah Ndu

¹ Uănh hom Brah Ndu Mbơ̆ ăn nau rŏng toyh ngăn ma he, kŏ tât Brah Ndu rnha he jêng kon Păng, jêh ri he jêng kon Păng ngăn! Yor nĕ neh ntu mâu gĭt năl he, yorlah neh ntu mâu gĭt năl Brah Ndu ôh.

² Hơi phung gâp rŏng, aƀaơ he jêng kon Brah Ndu; bi mâm nau he mra jêng ê hŏ tâm mpơl ôh. He gĭt tơlah Păng tâm mpơl, he mra tâm ban ma Păng, yorlah he mra saơ Păng nâm bu Păng ơm geh kơt nây.

³ Mbu nơm geh nau kâp gân aơ tâm Păng, ăn bunuyh nây djôt prăp nau kloh ma păng nơm, nâm bu Păng jêng kloh.

⁴ Mbu nơm ƀư tih jêng rlau nau vay; yorlah nau tih jêng mâu di nau vay.

⁵ Khân may gĭt Păng tâm mpơl jêh gay sŏk lơi nau tih; tâm Păng mâu geh nau tih ôh.

⁶ Mbu nơm gŭ tâm Păng mâu ƀư tih ôh; ƀiălah mbu nơm ƀư tih mâu mâp saơ mâu lah gĭt năl Păng ôh.

⁷ Hơi phung kon jê̆, lơi ăn bu ndơm khân may ôh. Mbu nơm ƀư nau sŏng srăng jêng nơm sŏng srăng, nâm bu Brah Ndu jêng sŏng srăng.

⁸ Mbu nơm ƀư tih jêng bunuyh brah mhĭk; yorlah brah mhĭk ƀư tih jêh ntơm bơh saơm. Yor nĕ Kon Brah Ndu tâm mpơl jêh gay ƀư rai kan brah mhĭk.

⁹ Mbu nơm deh tă bơh Brah Ndu, mâu ƀư tih ôh; yor găr ntil Brah Ndu gŭ tâm bunuyh nây; bunuyh nây mâu dơi ƀư tih tay đŏng ôh, yorlah păng deh tă bơh Brah Ndu.

¹⁰ Nau aơ ăn gĭt mbu nơm jêng phung kon Brah Ndu, jêh ri mbu nơm jêng phung kon brah mhĭk: Mbu nơm mâu ƀư nau sŏng srăng mâu jêng bunuyh Brah Ndu ôh, mbu nơm mâu rŏng ma oh nâu păng nơm tâm ban lĕ.

Rŏng ndrăng he

¹¹ Nau mbơh khân may tăng jêh ntơm bơh saơm, nây jêng: Ăn he tâm rŏng ndrăng he.

¹² Lơi jêng nâm bu Y-Kain jêng bunuyh luh tă bơh Brah mhĭk jêh ri nkhĭt lơi oh păng nơm. Mâm ƀư Y-Kain nkhĭt oh păng? Yorlah lĕ kan păng jêng djơh mhĭk, lĕ kan oh păng jêng sŏng srăng.

¹³ Hơi phung oh nâu, tơlah neh ntu tâm rmot ma khân may, lơi hih rhâl.

¹⁴ He gĭt he nơm hŏ rgăn jêh bơh nau khĭt hăn tâm nau rêh, yorlah he rŏng ma phung oh nâu. Mbu nơm mâu blau tâm rŏng gŭ tâm nau khĭt.

¹⁵ Mbu nơm tâm rmot ma phung oh nâu păng nơm jêng bunuyh tâm nkhĭt bunuyh, jêh ri khân may gĭt mâu geh ôh du huê nkhĭt bunuyh geh nau rêh n'ho ro gŭ tâm păng.

¹⁶ Tă bơh nau aơ, he gĭt năl jêh nau rŏng: Nây jêng Păng sân săk jêh nau rêh yor ma he. Pôri, ăn he sân săk nau rêh he yor ma phung oh nâu.

¹⁷ Tơlah mbu nơm geh drăp ndơ tâm rnôk aơ, saơ oh nâu păng nơm gŭ tâm nau pưt kƀah ƀiălah mâu geh nuih n'hâm rŏng, mâm ƀư nau Brah Ndu rŏng dơi gŭ tâm bunuyh nây?

¹⁸ Hơi phung kon jê̆, lơi rŏng tâm nau ngơi jêh ri ta mbung mpiăt, ƀiălah rŏng hom tâm nau kan jêh ri ma nau nanê̆ ngăn.

Nau chroh nâp tâm phung kon Brah Ndu

¹⁹ Ma nau aơ, he gĭt năl he nơm jêng phung nau ngăn, jêh ri he geh nau đăp rmên tâm nuih n'hâm tanăp Păng

²⁰ ăp tơ̆ nuih n'hâm he nduyh ma he. Yorlah Brah Ndu jêng toyh lơn ma nuih n'hâm he, jêh ri Păng gĭt lĕ rngôch ndơ.

²¹ Hơi phung gâp rŏng, tơlah nuih n'hâm he mâu nduyh he ôh, he geh nuih n'hâm nâp văch tanăp Brah Ndu;

²² jêh ri moh ndơ he dăn, he sŏk dơn da dê, yor he tông prăp ma lĕ nau vay Păng ntăm jêh ri ƀư nau maak ma Păng.

²³ Jêh ri aơ nau vay Păng ntăm: Ăn he chroh ma amoh Kon Păng jêng Brah Yêsu Krist jêh ri ăn he rŏng ndrăng he, nâm bu nau Păng hŏ ntăm nti jêh ma he.

²⁴ Mbu nơm tông prăp lĕ nau vay Brah Ndu ntăm gŭ tâm Păng, jêh ri Păng gŭ tâm bunuyh nây. He gĭt năl Păng gŭ tâm he ma Brah Huêng Ueh, Păng ăn jêh ma he.