I Yôhan 2 - Nau Brah Ndu Ngơi 2023

¹ Hơi phung kon jê̆ lê̆ gâp, gâp nchih lĕ nau aơ ma khân may gay ma khân may mâu ƀư tih. Ƀiălah tơlah bu ƀư tih, he geh du huê Nơm tâm kơl đah Kôranh Brah Mbơ̆ jêng Brah Yêsu Krist, Nơm Sŏng Srăng.

² Păng nơm jêng ndơ ƀư brah chuai nau tih ma he, mâu knŏng ma nau tih he ôh, ƀiălah nđâp ma nau tih ma lĕ neh ntu đŏng.

Nau mbơh ma nau gĭt năl Brah Yêsu Krist

³ Tă bơh nau aơ he gĭt năl he nơm gĭt năl Păng jêh: Nây jêng he tông prăp lĕ nau vay Păng ntăm.

⁴ Mbu nơm lah: “Gâp gĭt năl păng jêh,” ƀiălah mâu tông prăp ôh nau vay Păng ntăm bunuyh nĕ jêng ngơi mƀruh, jêh ri nau nanê̆ ngăn mâu gŭ tâm bunuyh nây ôh.

⁵ Ƀiălah mbu nơm tông djôt prăp nau Păng ngơi, nau Brah Ndu rŏng jêng rah vah ngăn tâm bunuyh nây. Ma nau nĕ yơh he gĭt, he nơm gŭ tâm Păng.

⁶ Mbu nơm lah păng nơm gŭ tâm Brah Ndu, mra chuat hăn tâm ban ma Păng hŏ chuat hăn jêh.

Nau vay ntăm mhe

⁷ Hơi phung gâp rŏng, aơ mâu geh nau vay ntăm mhe ôh gâp nchih ma khân may, ƀiălah nau vay ntăm ơm khân may geh jêh ntơm bơh kăl e. Nau vay ntăm ơm aơ jêng nau ngơi khân may tăng jêh.

⁸ Ƀiălah, gâp nchih đŏng ma khân may nau vay ntăm mhe, jêng nau nanê̆ ngăn tâm Păng jêh ri tâm khân may, yorlah nau ngo hŏ ntơm roh jêh, jêh ri nau ang ngăn dôl sol ang.

⁹ Mbu nơm lah păng gŭ tâm nau ang, ƀiălah păng tâm rmot ma oh nâu păng, păng ăt gŭ tâm nau ngo.

¹⁰ Mbu nơm rŏng ma oh nâu păng nơm, păng gŭ tâm nau ang, ntŭk bunuyh nây mâu geh ndơ ƀư chêh prah ôh.

¹¹ Ƀiălah mbu nơm tâm rmot ma oh nâu păng nơm jêng gŭ tâm nau ngo, chuat hăn tâm nau ngo jêh ri mâu gĭt ôh mbah ntŭk păng nơm hăn, yorlah nau ngo ƀư chieh jêh măt păng.

Nau nkah ma pe ntil năm

¹² Hơi phung kon jê̆, gâp nchih ma khân may yor nau tih khân may geh nau yô̆ an jêh yor amoh Păng.

¹³ Hơi phung mbơ̆, gâp nchih ma khân may yor khân may năl jêh Nơm jêng bunuyh ntơm saơm. Hơi phung druh ndăm, gâp nchih ma khân may yor khân may dơi jêh đah phung brah mhĭk.

¹⁴ Hơi phung kon jê̆ lê̆, gâp nchih ma khân may yorlah khân may gĭt năl jêh Kôranh Brah Mbơ̆. Hơi phung mbơ̆, gâp nchih ma khân may gĭt năl jêh Nơm jêng bunuyh ntơm saơm. Hơi phung druh ndăm, gâp nchih ma khân may yorlah khân may jêng ktang, nau ngơi Brah Ndu gŭ tâm khân may, jêh ri khân may dơi jêh đah phung brah mhĭk.

Lơi rŏng ma neh ntu

¹⁵ Lơi rŏng ma neh ntu ôh ndrel ma lĕ ndơ tâm neh ntu. Tơlah du huê rŏng ma neh ntu nau Brah Ndu Mbơ̆ rŏng mâu gŭ tâm păng ôh.

¹⁶ Yorlah lĕ ndơ tâm neh ntu nâm bu nglay săk kơnh, nau măt kơnh ŭch, jêh ri nau sưr ma nau rêh, mâu geh luh tă bơh Brah Ndu Mbơ̆ ôh, ƀiălah tă bơh neh ntu.

¹⁷ Neh ntu jêh ri nau păng kơnh ŭch rlau lôch, ƀiălah mbu nơm ƀư tĭng nau mĭn Brah Ndu ŭch mra hôm e n'ho ro.

Nơm tâm rdâng đah Brah Krist

¹⁸ Hơi phung kon jê̆, aơ jêng mông nglĕ dŭt! Khân may hŏ tăng jêh ma nơm tâm rdâng đah Brah Krist mra văch, jêh ri aƀaơ aơ geh âk jêh nơm tâm rdâng đah Brah Krist văch jêh. Yor nây, he gĭt aơ jêng mông lôch dŭt.

¹⁹ Khân păng du luh jêh tă bơh nklang phung he, ƀiălah khân păng mâu jêng phung he ôh. Yorlah tơlah khân păng jêng phung he, khân păng mra gŭ ndrel ma he; nau aơ tât jêh gay tâm mpơl rah vah ma lĕ rngôch khân păng mâu jêng phung he ôh.

²⁰ Ƀiălah khân may sŏk dơn jêh nau tŏ dak ƀâu kah tă bơh Nơm Kloh Ueh, jêh ri lĕ rngôch khân may geh jêh nau gĭt rbăng.

²¹ Gâp nchih ma khân may, mâu di yorlah khân may mâu gĭt nau ngăn ôh, ƀiălah yor khân may gĭt nau ngăn jêh ri gĭt rbăng mâu geh ôh du ntil nau mƀruh tă bơh nau ngăn.

²² Mbu nơm jêng bunuyh mƀruh, tơlah mâu di hĕ nơm dun Brah Yêsu jêng Brah Krist? Nơm nĕ yơh jêng nơm tâm rdâng đah Brah Krist, nơm dun Brah Ndu Mbơ̆ jêh ri Brah Ndu Kon.

²³ Mbu nơm mâu dơn Kon, mâu lĕ geh Mbơ̆; mbu nơm mbơh sŏk dơn Kon, geh lĕ Mbơ̆.

²⁴ Mpeh khân may, djôt prăp hom nau khân may tăng jêh ntơm bơh saơm gŭ tâm khân may. Tơlah nau khân may tăng jêh ntơm bơh saơm gŭ tâm khân may ƀaƀơ, khân may mra gŭ tâm Kon jêh ri tâm Mbơ̆.

²⁵ Jêh ri nau rêh n'ho ro jêng nau Păng hŏ ton ăn jêh ma he.

²⁶ Gâp nchih lĕ nau aơ ma khân may tât ma lĕ phung mƀruh ndơm khân may.

²⁷ Mpeh khân may, nau tŏ dak ƀâu kah khân may sŏk dơn jêh bơh Păng gŭ tâm khân may, jêh ri khân may mâu hôm ŭch ôh bu nti ma khân may. Yorlah nau Păng tŏ dak ƀâu kah nti ma khân may lĕ rngôch nau, jêh ri nau tŏ dak ƀâu kah nây jêng nau nanê̆ ngăn, mâu di mƀruh ndơm ôh; ăn gŭ hom tâm Păng, nâm bu nau tŏ dak ƀâu kah nây nti jêh ma khân may.

²⁸ Jêh ri aƀaơ, hơi phung kon jê̆, gŭ hom tâm Păng, gay nôk Păng tâm mpơl, he dơi geh nau nănh, mâu đit prêng tanăp măt Păng dôl Păng tât.

²⁹ Tơlah khân may gĭt Păng jêng sŏng srăng, gĭt năl hom ma mbu nơm ƀư nau sŏng srăng jêng luh tă bơh Păng da dê.