Biblia Todo Logo
Bìoball air-loidhne

- Sanasan -

I Yôhan 1 - Nau Brah Ndu Ngơi 2023


Nau Y-Yôhan mbơh

1 Nau nkoch ma nau ngơi rêh, jêng nau geh jêh ntơm bơh saơm, nau hên tăng jêh, măt hên saơ jêh, nau hên ntrŏng uănh jêh, jêh ri ti hên pah bi jêh.

2 Nau rêh nây tâm mpơl jêh; hên saơ jêh ri mbơh jêh, pôri hên mbơh ma khân may nau rêh n'ho ro ơm gŭ ndrel ma Kôranh Brah Mbơ̆, jêh ri bu mpơl jêh păng ma hên.

3 Hên sŏk nau hên saơ jêh, tăng jêh mbơh ma khân may, gay ma khân may dơi geh nau tâm rnglăp ndrel ma hên; jêh ri hên ăt geh nau tâm rnglăp đah Brah Ndu Mbơ̆, jêh ri đah Kon Păng jêng Brah Yêsu Krist.

4 Hên nchih nau aơ ma khân may gay ma nau răm maak he dơi jêng nŭm rĭng.


Brah Ndu jêng nau ang

5 Aơ jêng nau nti hên tăng jêh bơh Păng jêh ri mbơh ma khân may: Brah Ndu jêng nau ang, tâm Păng mâu geh nau ngo ôh.

6 Tơlah he lah he nơm geh nau tâm rnglăp đah Păng ƀiălah hôm nhuat hăn tâm nau ngo, pôri he ngơi mƀruh jêh ri mâu ƀư tĭng nâm nau ngăn ôh.

7 Ƀiălah tơlah he chuat hăn tâm nau ang, nâm bu Păng yơh gŭ tâm nau ang, he geh nau tâm rnglăp ndrăng he, jêh ri mham Brah Yêsu, Kon Păng, ƀư kloh lĕ rngôch nau tih he.

8 Tơlah he lah he nơm mâu geh nau tih ôh, he mƀruh ndơm êng he nơm yơh, jêh ri nau ngăn mâu gŭ tâm he ôh.

9 Tơlah he mbơh nau tih he nơm, Păng jêng Nơm răp jăp jêh ri sŏng mra yô̆ an nau tih ma he jêh ri ƀư kloh he bơh lĕ rngôch nau kue.

10 Ƀiălah tơlah he lah he nơm mâu mâp ƀư tih, pô ri he ngơi mƀruh, jêh ri nau Păng ngơi mâu gŭ tâm he ôh.

© 2023 United Bible Societies. All rights reserved.

Bible Society Vietnam
Lean sinn:



Sanasan