I Timôthê 6 - Nau Brah Ndu Ngơi 2023

Nau kan ma phung oh mon

¹ Lĕ rngôch bunuyh gŭ tâm dâng mâng mbăk jêng dĭk ăn yơk ma phung kôranh khân păng tâm lĕ rngôch nau, gay ma bu mâu ngơi djơh ma amoh Brah Ndu jêh ri nau he ntĭm nti.

² Đơ bunuyh geh kôranh jêng phung chroh, pô ri lơi yor khân păng jêng phung oh nâu kôranh ƀư may pưt nau yơk ma khân păng, ƀiălah lơ hô ăn khân păng pah kan ueh lơn, yor păng dơi geh pah kan nây jêng phung chroh jêh ri phung oh nâu bêng ma nau rŏng. Nây jêng lĕ nau may mra ntĭm jêh ri nti hom ma khân păng.

Njrăng đah nau nti nklă

³ Tơlah geh du huê ntĭm ma nau nti ƀaƀă, mâu tâm di đah nau ngăn jêh ri nau nti klach yơk ma Kôranh Brah he jêng Brah Yêsu Krist

⁴ nây jêng nơm sưr rlau, mâu gĭt rbăng du ntil ndơ ôh; ƀiălah păng geh nau ŭch tâm rlăch, nau tâm djrel tâm nau ngơi, ƀư nau tâm rmot, mâu geh du ai, nau mưch rmot, nau đing djơh mhĭk;

⁵ nau tâm djrel mro mrăng ta nklang phung bunuyh geh nau mĭn mhĭk, lơh roh nau ngăn, uănh nau klach yơk tâm ban nau gay ma sŏk drăp nkhôm.

Lơi kơnh rlau ir drăp ndơ

⁶ Nau klach yơk nđâp ma nuih n'hâm maak jêng nau khlay toyh.

⁷ Yorlah nôk mhe deh, he mâu djôt leo ôh du ntil ndơ, pô ri nôk cha lơi nau rêh mâu djôt leo đŏng du ntil ndơ;

⁸ yor ri, geh ndơ sông sa, bok ao nsoh, nuih n'hâm maak.

⁹ Ƀiălah phung kơnh ma nau ndrŏng, mra tŭp tâm nau ndơm, văk tâm dăk, tŭp tâm lĕ nau kơnh nau rluk mâl jêh ri nau mhĭk, jêng lĕ nau nây ƀư ngâm kon bunuyh tâm nau ƀư rai jêh ri nau rai roh.

¹⁰ Yorlah nau rŏng ma prăk jêng tơm reh ma lĕ rngôch nau mhĭk, ƀaƀă bunuyh yor ma tĭng joi prăk hŏ chalơi nau chroh, sŏk dơn êng ma khân păng nơm âk nau rêh ni hâu ngăn.

Nau nkah ma Y-Timôthê

¹¹ Ƀiălah hơi Y-Timôthê may jêng bunuyh Brah Ndu, der ngai hom lĕ nau nây jêh ri tĭng joi nau sŏng srăng, nau klach yơk, nau chroh, nau rŏng, nau srôih, nau rdơ̆ rbăn.

¹² Ăn yor ma nau chroh tâm lơh janh ktang, pit sŏk nau rêh n'ho ro, jêng nau rêh Brah Ndu kuăl jêh may, jêh ri bơh nây may geh nau mbơh nkoch ueh tanăp phung mbơh.

¹³ Tanăp Brah Ndu jêng Nơm ăn nau rêh ma lĕ rngôch ndơ, jêh ri tanăp Brah Yêsu Krist jêng Nơm geh nau mbơh nkoch ueh nôk mbơh nkoch tanăp Pôns Pilat, gâp ntĭnh may

¹⁴ djôt prăp hom nau ntĭm nti aơ dŭt ueh, mâu geh nau nduyh, kŏ tât nar Kôranh Brah he jêng Brah Yêsu Krist văch jêh,

¹⁵ jêng nau Nơm Chiă Uănh ueh maak ngăn jêh ri knŏng nguay, jêng Hađăch ma phung hađăch, Kôranh Brah ma lĕ phung kôranh Brah mra mpơl tâm di ma nôk Păng tâm nal,

¹⁶ jêng Nơm knŏng nguay mâu blau khĭt, gŭ ta nklang nau ang mâu geh ôh nơm dơi hăn dăch, jêng Nơm ê hŏ geh bunuyh saơ mâu lah dơi saơ. Mbơh sơm dăn nau yơk jêh ri nau brah n'ho ro jêng ndơ Păng! Amen.

Nau nkah phung ndrŏng

¹⁷ Nti nkah hom ma phung ndrŏng gŭ tâm neh ntu aơ lơi sưr rlau jêh ri lơi dơm nau kâp gân ma drăp ndơ mâu nanê̆, ƀiălah dơm hom nau kâp gân tâm Brah Ndu, jêng Nơm ăp nar ăn ma lĕ rngôch ndô ndơ tâm nau rmeh ler gay ma he maak sŏk dơn.

¹⁸ Ăn khân păng ƀư kan ueh, ƀư âk kan ueh maak, geh nuih n'hâm lŏng, rơm ndrăp jêh tâm pă ma bu;

¹⁹ tâm ban pônây, khân păng prăp nkrem tâm nar kăndơ̆ ma khân păng nơm du mbon nâp gay ma kuăn nanê̆ nau rêh ngăn.

Nau ntĭnh ntăm nglĕ dŭt

²⁰ Hơi Y-Timôthê, djôt prăp hom lĕ nau bu jao jêh ma may, der lĕ nau ngơi lă lêng mâu geh nau khlay jêh ri nau tâm rlăch âk nau bu ntôn lah jêng nau gĭt rbăng;

²¹ yorlah ŭch geh nau gĭt rbăng nây, geh ƀaƀă lơh roh nau chroh. Mbơh sơm dăn nau yô̆ gŭ ndrel ma khân may!