I Timôthê 5 - Nau Brah Ndu Ngơi 2023

Nau gŭ ngao đah lĕ rngôch bunuyh

¹ Lơi ngơi dăng ôh nau nduyh ma bu klâu ranh, ƀiălah bonh leng păng tâm ban ma du huê mbơ̆, gŭ ngao đah phung ndăm tâm ban ma phung oh nâu,

² phung bu ur ranh tâm ban ma mê̆, phung bu ur druh tâm ban ma oh ruh, ma lĕ rngôch nau kloh ngăn.

Nau gŭ ngao đah phung bu ur ndrô

³ Yơk hom ma bu ur ndrô, n'hêl nanê̆ jêng ndrô.

⁴ Tơlah du huê ndrô geh kon mâu lah sau, lor lơn ăn phung kon sau nti blau tâm mpơl nuih n'hâm nau yơk ma rnăk vâl khân păng nơm jêh ri mplơ̆ nau lah ueh ma kan mê̆ mbơ̆ khân păng hŏ ƀư jêh; yorlah nau nây ƀư maak nuih n'hâm Brah Ndu.

⁵ Mbu nơm jêng bu ur ndrô ngăn, gŭ rêh êng du huê, dơm nau kâp gân tâm Brah Ndu, jêh ri ăn nâp nuih n'hâm măng nâm nar mbơh sơm vơl dăn ma Brah Ndu.

⁶ Ƀiălah mbu jêng bu ur ndrô gŭ rêh tâm nau mpŭng prăk blă blơ, nđâp lah gŭ rêh tâm ban ma khĭt đŏng.

⁷ Ntĭnh hom ma khân păng lĕ nau aơ gay ma khân păng mâu geh nau nduyh.

⁸ Tơlah mbu nơm mâu kơl ma phung ndŭl mpôl păng, khlay lơn ma rnăk vâl păng nơm, pôri bunuyh nây dun jêh nau chroh, jêh ri păng jêng mhĭk lơn ma du huê mâu chroh.

⁹ Gay bu nchih amoh tâm ndrom samƀŭt phung bu ur ndrô, bu ur ndrô nây ăn tât prao jât năm, geh knŏng du huê sai,

¹⁰ ăn păng dơi geh nau bu rnê nau ueh tâm ban ntĭm nti jêh phung kon, vơt rom phung bu năch, rao jâng ma phung kloh ueh, kơl an phung rêh ni, jêh ri nsrôih ƀư ăp ntil kan ueh.

¹¹ Ƀiălah dun hom nchih amoh phung bu ur ndrô hôm mom; yorlah lah nau kơnh ma nglay săk ŭch ƀư ma khân păng gŭ ngai ma Brah Krist, khân păng ŭch sŏk tay sai;

¹² kơt nĕ, khân păng mra geh nau phat dôih yorlah hŏ ƀư tih đah nau khân păng ton bơh saơm.

¹³ Ntop ma nau nây, khân păng hôm nti nau gŭ mơng sa dơm mâu pah kan, nsong bơh ngih aơ tât ngih ri; mâu knŏng kơt nĕ, khân păng hôm gŭ nkoch bri dơm dam, ngơi nkoch kan bu êng, ngơi nau mâu khư ma ngơi.

¹⁴ Yor ri, gâp ŭch ma phung bu ur ndrô druh ueh lơn sŏk sai, deh kon, mât uănh rnăk vâl khân păng nơm, mâu njêng mông găl ma phung rlăng ngơi bêk prêng.

¹⁵ Yorlah bu ur ndrô ƀaƀă hŏ vĭ jêh hăn tĭng Satan.

¹⁶ Tơlah du huê bu ur chroh geh phung bu ur ndrô tâm ngih păng nơm, ăn păng kơl khân păng, lơi ta ntop nau jâk ma Phung Ngih Brah Ndu, gay ma Phung Ngih Brah Ndu dơi kơl phung ndrô ngăn.

Nau geh ma phung kôranh bu ranh

¹⁷ Phung kôranh bu ranh blau chiă uănh Phung Ngih Brah Ndu, lơ hô geh nau yơk âk lơn, lor lơn jêng phung srôih jâk jêr tâm nau mbơh nau chroh jêh ri nau ntĭm nti.

¹⁸ Yorlah Nau Brah Ndu Ngơi nti: “Lơi put ôh mbung ndrôk lah păng jot ba,” jêh ri “Bunuyh pah kan nkhôm khư dơn prăk nkhôm.”

¹⁹ Lơi dơn ôh nau bu phong ma du huê kôranh bu ranh, lah mâu geh nau mbơh tă bơh bar mâu lah pe nuyh.

²⁰ Mpơl hom nau nduyh ma phung bunuyh vay ƀư tih, gay ma phung êng klach đŏng.

²¹ Tanăp Brah Ndu jêh ri Brah Yêsu Krist nđâp ma phung tông mpăr Brah Ndu săch jêh, gâp mbơh ăn may djôt prăp lĕ nau ntĭm nti aơ, mâu dơi geh nau mĭn êng, mâu đŏng ƀư moh nau yorlah gŭ nding.

²² Ƀât ngăch ir pah ti ta bu ôh, mâu đŏng mbŭk ti tâm nau tih bơh bunuyh êng. Djôt prăp hom may nơm ma nau kloh rsang.

²³ Yorlah khŭng may jêh ri yor may vay ji, pôri may mâu knŏng nhêt dak, ƀiălah nhêt hom djê̆ ndrănh.

²⁴ Nau tih bunuyh ƀaƀă mpơl rah vah ngăn, nđâp êlor ma nau phat dôih tât; ƀiălah geh đŏng phung bunuyh tât kăndơ̆ nau tih khân păng mra mpơl.

²⁵ Nau ueh tâm ban lĕ: Geh kan mpơl ro, geh đŏng mâu mpơl, ƀiălah tât kăndơ̆ mâu đŏng pôn mo ƀaƀơ.