I Timôthê 4 - Nau Brah Ndu Ngơi 2023

Nau mpơl phung kôranh nti nklă

¹ Brah Huêng Ueh mbơh rah vah jêh pô aơ tâm rnôk nglĕ dŭt mra geh ƀaƀă dun chalơi nau chroh, nchuăt tĭng phung brah ndơm mƀruh jêh ri nau nti tă bơh phung brah mhĭk,

² yor tă nuih n'hâm nklă phung bunuyh ngơi mƀruh kŏ tât nuih n'hâm sŏng khân păng lĕ men jêh.

³ Khân păng buay bu gŭ ur sai, jêh ri ntĭnh ma bu ver lĕ ndơ sông sa Brah Ndu rhăk jêh ma phung chroh jêh ri gĭt rbăng nau ngăn sŏk dơn ma nuih n'hâm gĭt lah ueh.

⁴ Yorlah lĕ rngôch ndô ndơ Brah Ndu njêng jêh jêng ueh da dê, mâu geh ndơ mƀăr lơi ôh, knŏng tơlah sŏk dơn ma nuih n'hâm gĭt lah ueh;

⁵ yorlah nau Brah Ndu ngơi jêh ri nau mbơh sơm, ndơ nây dơi kloh ueh jêh.

Bunuyh oh mon ueh Brah Krist

⁶ Tơlah may mbơh lĕ nau aơ ma phung oh nâu, may mra jêng du huê oh mon ueh ma Brah Yêsu Krist, dơi mât rong jêh ma nau chroh jêh ri ma nau nti sŏng ngăn may hŏ tĭng chroh jêh.

⁷ Der ngai hom lĕ nau nkoch bri tă bơh kăl e roh nau khư, nau nkoch bri mâu geh ngăn tă bơh bu ur ranh, ƀiălah nsrôih nti hom ma săk may nơm ma nuih n'hâm klach yơk;

⁸ yorlah nau nsrôih nti ma săk jăn knŏng jêng khlay djê̆ djê̆, ƀiălah nau klach yơk jêng khlay lơn ma lĕ rngôch nau, yorlah geh nau ton ma nau rêh rnôk aơ jêh ri ma nau rêh rnôk kăndơ̆ đŏng.

⁹ Nây jêng nau ngơi nanê̆ ngăn, jêh ri khư sŏk dơn.

¹⁰ He jâk jêr jêh ri tâm lơh ma nau aơ, yorlah he hŏ dơm nau kâp gân tâm Brah Ndu rêh, jêng Nơm Tâm Rklaih ma lĕ rngôch bunuyh, khlay ngăn ngên ma phung chroh.

¹¹ Nây jêng lĕ nau may ntĭnh jêh ri ntĭm nti hom.

¹² Lơi ăn bu rmot may yor may hôm druh ndăm, ƀiălah ăn may sŏk nau ngơi, nau gŭ ngao, nuih n'hâm rŏng, nau chroh jêh ri nau kloh rsang gay ma ƀư leo trong ma phung chroh.

¹³ Ăn may gơih rŏ Nau Brah Ndu Ngơi tâm dôl tâm rƀŭn, nau ntĭnh jêh ri ntĭm nti kŏ tât nôk gâp văch.

¹⁴ Lơi chuêl ôh ma nau dơi ăn tâm may, jêng nau dơi ăn ma may tâm nau mbơh lor nôk mpôl kôranh bu ranh pah ti klơ may.

¹⁵ Ƀư hom jêh ri gơih mĭn ma lĕ nau nây, gay lĕ rngôch bunuyh saơ nau may lĕ hao.

¹⁶ Njrăng hom ma may nơm jêh ri ma nau may nti lah; srôih tâm lĕ rngôch nau nây, yorlah ƀư tâm ban pônây, may nơm jêh ri phung gŭ iăt may geh nau rklaih da dê.