I Timôthê 3 - Nau Brah Ndu Ngơi 2023

Nau gŭ rêh phung kôranh chiă uănh jêh ri bunuyh kơl kan

¹ Aơ jêng nau khư rnơm nsing: Tơlah geh du huê ŭch jêng kôranh chiă uănh, păng ŭch ma du ntil kan khlay ngăn.

² Pôri, kôranh chiă uănh mâu geh nau nduyh, knŏng du huê ur du huê sai, di keh, gĭt njrăng, gŭ ngao ueh, gĭt rom bu năch, blau ntĭm nti bu,

³ mâu vay mơng nhêt ndrănh, mâu hăt janh, ƀiălah đăp mpăn, mâu tâm lah tâm djrel, jêh ri mâu kơnh ir ma prăk.

⁴ Ăn păng blau mât uănh rnăk vâl păng nơm, ntĭm nti ma phung kon păng gĭt tông bâr jêh ri yơk ma păng ƀaƀơ;

⁵ yorlah du huê mâu blau chiă uănh rnăk vâl păng nơm, mâm dơi păng mât mray Phung Ngih Brah Ndu?

⁶ Du huê mhe chroh mâu dơi jan kôranh chiă uănh, klach lah bêng ma nau sưr ƀư ma păng tŭp tâm nau phat dôih prăp ma phung brah mhĭk.

⁷ Ăn kôranh chiă uănh geh nau mbơh ueh bơh phung padih, gay mâu tŭp ôh tâm nau bêk prêng jêh ri tâm dăk brah mhĭk.

⁸ Ăn phung bunuyh kơl kan gŭ ngao ueh, mâu ngơi ôh bar bâr, mâu vay nhêt ndrănh, mâu hưp ndơ tâm nau ƀư djơh,

⁹ ƀiălah djôt prăp nau khlay ndâp bơh nau chroh tâm nuih n'hâm sŏng kloh ueh.

¹⁰ Ăn bu rlong uănh khân păng lor, tơlah mâu geh nau nduyh ri mơ dơi ƀư bunuyh kơl kan.

¹¹ Phung bu ur tâm ban lĕ, ăn gŭ ngao ueh, mâu ngơi mhĭk, ƀiălah di keh jêh ri gŭ răp jăp tâm lĕ rngôch ndơ.

¹² Ăn phung bunuyh kơl kan jêng bunuyh knŏng geh du huê sai du huê ur, blau mât uănh phung kon jêh ri rnăk vâl khân păng nơm.

¹³ Yorlah phung ƀư ueh nau kan bunuyh kơl kan mra dơi geh nau yơk jêh ri nau janh tâm nau chroh Brah Yêsu Krist.

Nau khlay ndâp tă bơh nuih n'hâm klach yơk

¹⁴ Gâp ŭch hăn gơnh chop khâl may, ƀiălah hôm nchih nau aơ,

¹⁵ gay tơlah gâp băt tât, pô ri may gĭt đŏng nau gŭ ngao tâm ngih Brah Ndu, jêng Phung Ngih Brah Ndu rêh, ntur jêh ri meh ma nau ngăn.

¹⁶ Di ngăn dơn pô aơ nau khlay ndâp tâm nuih n'hâm klach yơk dŭt toyh hâu ngăn: Nơm tâm mpơl jêh tâm săk jăn, Brah Huêng Ueh kơp Păng sŏng srăng, Phung tông mpăr ntreng uănh, Bu mbơh nkoch ta nklang lĕ rngôch phung ƀon lan, Lĕ rngôch bunuyh chroh dơn jêh, Brah Ndu chông Păng leo klơ tâm nau chrêk rmah.