I Timôthê 2 - Nau Brah Ndu Ngơi 2023

Nau mbơh sơm ma lĕ rngôch bunuyh

¹ Pônây, lor lơn gâp ntĭnh nkah ma may ăn mbơh sơm, vơh vơl, lah ueh jêh ri mbơh sơm kơl an ma lĕ rngôch bunuyh,

² ma phung hađăch, ma lĕ rngôch phung kôranh chiă uănh, gay ma he dơi gŭ rêh tâm nau mpăn rlêk, nau đăp mpăn tâm lĕ nau klach yơk jêh ri nau gĭt mleh.

³ Nây jêng nau ueh jêh ri maak nuih n'hâm Brah Ndu, Nơm Tâm Rklaih he,

⁴ jêng Nơm ŭch ma lĕ rngôch bunuyh dơi klaih jêh ri gĭt năl nau ngăn.

⁵ Yorlah geh knŏng du huê Brah Ndu, jêh ri geh knŏng du huê Nơm Tâm Nklang vah vang Brah Ndu jêh ri kon bunuyh, jêng Brah Yêsu Krist, jêng bunuyh đŏng.

⁶ Nơm jao jêh Păng nơm jêng rnoh chuai lĕ rngôch bunuyh, jêng nau mbơh ăn di tâm rnôk nal.

⁷ Yorlah nau mbơh nây, gâp geh nau săch jêng nơm mbơh nkoch jêh ri kôranh oh mon (gâp ngơi ngăn, mâu ngơi mƀruh ôh), jêng kôranh nơm nti ma phung bu năch, gay nti khân păng ma nau chroh jêh ri nau ngăn.

⁸ Pôri, gâp ŭch ma phung bu klâu tâm lam ntŭk yơr ti kloh ueh klơ trôk gay mbơh sơm da dê, mâu ji nuih jêh ri tâm djrel.

Bu ur tâm Phung Ngih Brah Ndu

⁹ Gâp ŭch đŏng ăn ma phung bu ur ndơ nkrơ̆ pô aơ ma nau di, nkrơ̆ di keh jêh ri di đah nau vay gŭ ngao, mâu păch sŏk rlau keh ir mâu lah dok văn mah, lŭ khlay mâu lah nsoh kho ao khlay prăk,

¹⁰ ƀiălah ƀư lĕ nau kan ueh, jêng nau tâm di ma phung bu ur nau yơk.

¹¹ Ăn phung bu ur gŭ rklăk dôl nti kơt ma nau nuih n'hâm blau tông đah lĕ rngôch.

¹² Gâp mâu ăn nau dơi phung bu ur nti mâu lah chiă uănh ma bu klâu, ƀiălah ăn khân păng gŭ rklăk.

¹³ Yorlah Brah Ndu njêng Y-Ađam lor, jêh ri H'Êva pakơi;

¹⁴ mâu di đŏng Y-Ađam geh nau ndơm, ƀiălah bu ur geh nau ndơm jêh ri ƀư tih.

¹⁵ Nđâp lah pônây, phung bu ur mra geh nau rklaih tâm nôk deh kon, tơlah khân păng gŭ rêh sŏng tâm nau chroh, tâm nau rŏng, jêh ri tâm nau kloh ueh.