I Timôthê 1 - Nau Brah Ndu Ngơi 2023

Nau mbah jô̆ khâl

¹ Y-Pôl, kôranh oh mon Brah Yêsu Krist tĭng nâm nau ntăm bơh Brah Ndu, Nơm tâm rklaih he, jêh ri bơh Brah Yêsu Krist, nau he kâp gân,

² nchih njuăl ma Y-Timôthê, kon gâp ngăn tâm nau chroh: Dăn Brah Ndu, Mbơ̆ he, jêh ri Brah Yêsu Krist, Kôranh Brah he, ăn nau yô̆, nau yô̆ nđach jêh ri nau đăp mpăn ma may!

Uănh njrăng phung kôranh nti nklă

³ Tâm ban gâp nkah jêh ma may dôl gâp hăn ta n'gor Masêđôn, ăn may gŭ ta ƀon Êphêsô gay ntĭm nti ma du phung bunuyh mâu dơi nti du nau chroh êng,

⁴ lơi ta rvê đŏng ma lĕ nau nkoch bri ơm jêh ri ma phung noi deh mâu blau lôch, jêng lĕ nau tâm djrel âk lơn jêng ăn hao kan Brah Ndu tâm nau chroh.

⁵ Nau ŭch bơh nau ntĭnh nây jêng nau rŏng luh bơh nuih n'hâm kloh, bơh nuih n'hâm sŏng ueh jêh ri ma nau chroh nanê̆ ngăn.

⁶ Du phung bunuyh hăn teng nau ŭch nây, hŏ tŭp tâm lĕ nau rlăch mâu geh nau khlay;

⁷ khân păng ŭch jêng nơm nti nau vay, ƀiălah mâu gĭt rbăng ôh nau khân păng lah mâu lah nau khân păng ƀư nanê̆.

⁸ He gĭt ma nau vay jêng ueh, tơlah dơi dŏng ăn di ngăn,

⁹ jêh ri ăn gĭt pô aơ nau vay mâu di ôh jêng ma bunuyh sŏng srăng, ƀiălah ma phung ƀư tih nau vay jêh ri ma phung tâm rdâng, phung mâu ƀư tĭng nau vay jêh ri nau tih, ma phung mâu kloh ueh jêh ri roh nau vay, ma phung nkhĭt mê̆ mbơ̆ jêh ri nkhĭt bunuyh,

¹⁰ ma phung văng tĭr jêh ri bu klâu ndrăng bu klâu, bu ur ndrăng bu ur, ma phung tăch rgâl bunuyh, ma phung ngơi mƀruh, ma phung ngơi nchơt jêh ri lĕ nau êng tâm rdâng đah nau di nau sŏng ngăn.

¹¹ Nây jêng nau ntĭm nti bơh Nau Mhe Mhan Ueh chrêk rmah Brah Ndu ueh maak, bu jao jêh ma gâp.

Lah ueh nau yô̆ nđach Brah Ndu

¹² Gâp lah ueh ma Nơm ăn jêh nau dơi ma gâp jêng Brah Yêsu Krist, Kôranh Brah he, yorlah Păng kơp gâp jêng răp jăp jêh ri dơm ăn gâp pah kan ma Păng;

¹³ nđâp lah kăl e ri gâp jêng nơm sưr rlau, ƀư mhĭk, hăt janh ƀai. Ƀiălah gâp hŏ dơn jêh nau yô̆ nđach, yorlah nôk nây gâp ƀư tâm nau rluk mâl bơh nuih n'hâm mâu chroh.

¹⁴ Nanê̆ ngăn nau yô̆ Kôranh Brah he jêng bêng ler jêh ma gâp nđâp ma nau chroh jêh ri nau rŏng tâm Brah Yêsu Krist.

¹⁵ Aơ jêng nau ngơi ngăn jêh ri dơi khư sŏk dơn: Brah Yêsu Krist văch jêh tâm neh ntu gay tâm rklaih phung tih; tâm phung tih nây, gâp jêng bunuyh tih lơn

¹⁶ Yor nĕ gâp dơn jêh nau yô̆ nđach jêng gay Brah Yêsu Krist tâm mpơl nau srôih n'hêl nanê̆ Păng tâm gâp, jêng nơm tih dak bôk, ăn gâp jêng leo trong ăn phung mra chroh ma Păng gay geh nau rêh n'ho ro.

¹⁷ Dăn nau yơk jêh ri nau chrêk rmah n'ho ro mâu blau lôch jêng ndơ ma Hađăch lĕ rngôch rnôk, mâu blau khĭt, mâu geh rup, nâm bu ntĭt Brah Ndu, knŏng nguay! Amen.

Nau ntĭm nti ma nau tâm lơh janh ktang

¹⁸ Hơi Y-Timôthê kon gâp, gâp ntrŭnh nau vay dăp aơ ma may, tĭng nâm lĕ nau mbơh lor ma may bơh kăl e, gay bơh lĕ nau ngơi nây may tâm lơh janh ktang,

¹⁹ djôt nâp nau chroh jêh ri nuih n'hâm kloh ueh. Geh ƀaƀă dun chalơi jêh nuih n'hâm sŏng nây jêh ri ƀư rai nau chroh,

²⁰ tâm phung nây geh Y-Himênê jêh ri Y-Aleksandrơ, gâp jao jêh khân păng ma Satan gay ma khân păng dơi nti lơi hôm sưr rlau đŏng ôh.