I Têsalônik 5 - Nau Brah Ndu Ngơi 2023

Nar Kôranh Brah. – Nau rngeh njrăng

¹ Hơi phung oh nâu, ma mông nar jêh ri rnôk, mâu khăch ôh nchih ma khân may;

² yorlah khân may nơm gĭt rah vah pô aơ nar Kôranh Brah mra tât nâm bu bunuyh ntŭng dôl măng.

³ Lah bu lah: “Đăp mpăn jêh ri gŭ đăp rmên” pô ri nau ƀư rai tât ndal, nâm bu nau ji deh ma bu ur ntreo, khân păng mâu dơi klaih ôh.

⁴ Ƀiălah hơi phung oh nâu, khân may mâu gŭ ôh tâm nau ngo, kŏ tât Nar nây tât ndal ma khân may nâm bu nơm ntŭng.

⁵ Yorlah lĕ rngôch khân may jêng kon nau ang jêh ri kon nôk nar. He mâu jêng kon dôl măng, mâu di đŏng jêng kon ma nau ngo.

⁶ Pô nây, he mâu bê̆ch nâm bu phung êng ôh, ƀiălah ăn he rngeh njrăng jêh ri di keh.

⁷ Yorlah bunuyh bê̆ch, bê̆ch dôl măng, bunuyh nhŭl ndrănh, nhŭl dôl măng.

⁸ Ƀiălah he jêng kon nôk nar, pôri ăn di keh hom, nsoh ao loih ma nau chroh jêh ri nau rŏng, sŏk nau kâp gân ma nau tâm rklaih ƀư môk tâm lơh.

⁹ Yorlah Brah Ndu mâu nal ôh ma he dơn nau ji nuih, ƀiălah dơn nau tâm rklaih tâm Brah Yêsu Krist, Kôranh Brah he,

¹⁰ jêng Nơm hŏ khĭt yor ma he gay ma he gŭ rngeh mâu lah bê̆ch, dơi gŭ rêh ndrel ma Păng.

¹¹ Pôri, ăn tâm n'hao nuih n'hâm ndrăng nơm, nâm bu khân may vay ƀư.

Lĕ nau đă êng êng

¹² Hơi phung oh nâu, hên dăn ma khân may ăn khân may yơk ma phung dôl pah kan hŏt ta nklang khân may, jêng phung leo jêh ri ntĭm nti khân may yor Kôranh Brah.

¹³ Sŏk hom nau rŏng gay yơk tông ma khân păng yor nau kan khân păng ƀư. Gŭ rêh hom rnglăp ndrel ndrăng khân may nơm.

¹⁴ Hơi oh nâu, dăn khân may đă hom phung kơr ƀlao, n'hao nuih n'hâm phung rdja, srôih đah lĕ rngôch bunuyh.

¹⁵ Njrăng hom, lơi sŏk nau mhĭk mplơ̆ nau mhĭk, ƀiălah joi nau ƀư ueh ƀaƀơ ndrăng khân may tâm ban ma lĕ rngôch bunuyh.

¹⁶ Răm maak hom mro mrăng,

¹⁷ mbơh sơm hom mâu rlu;

¹⁸ lah ueh hom ma Brah Ndu tâm lĕ nau tât, yorlah nây jêng nau mĭn Brah Ndu ŭch đah khân may tâm Yêsu Krist.

¹⁹ Lơi buh nhhât Brah Huêng Ueh ôh;

²⁰ lơi mưch rmot lĕ Nau mbơh lor.

²¹ Sek uănh hom tâm lĕ nau. Djôt prăp moh nau ueh;

²² ăn khân may der ngai lĕ rngôch nau djơh mhĭk.

²³ Dăn Brah Ndu ăn nau đăp mpăn ƀư ăn kloh khân may ăn nŭm. Dăn Păng prăp nuih n'hâm, huêng, jêh ri săk jăn khân may ăn ueh, mâu geh nau nduyh lah Kôranh Brah he, jêng Brah Yêsu Krist plơ̆ văch!

²⁴ Nơm hŏ kuăl khân may jêng răp jăp, Păng mra ƀư nau nây.

²⁵ Hơi phung oh nâu, dăn mbơh sơm ma hên ƀă.

²⁶ Jô̆ khâl lĕ rngôch oh nâu ma nau chŭm kloh ueh.

²⁷ Tâm amoh Kôranh Brah, gâp đă khân may rŏ hom samƀŭt aơ ma lĕ rngôch phung oh nâu tăng.

²⁸ Dăn nau yô̆ bơh Kôranh Brah he, jêng Brah Yêsu Krist, gŭ ndrel ma lĕ rngôch khân may!