I Têsalônik 4 - Nau Brah Ndu Ngơi 2023

Lĕ nau ntĭm nti ( 4:1 – 5:28 ) Gŭ rêh maak nuih n'hâm Kôranh Brah

¹ Dăch dŭt, hơi phung oh nâu, tâm Kôranh Brah jêng Brah Yêsu, hên vơh vơl jêh ri ntrôl khân may pô aơ nâm bu khân may hŏ nti jêh bơh hên ăn gŭ rêh ƀư maak nuih n'hâm Brah Ndu, jêh ri khân may dôl gŭ rêh tâm ban kơt nĕ, pô ri gŭ rêh hom lơ nar lơ ueh lơn.

² Yorlah khân may gĭt moh nau ntĭm nti hên hŏ tâm amoh Kôranh Brah jêng Kôranh Brah Yêsu ăn ma khân may.

³ Yorlah nau mĭn Brah Ndu ŭch khân may dơi geh nau kloh ueh, ăn der ngai nau văng tĭr;

⁴ ăn ăp nơm blau mât mray săk jăn păng nơm tâm nau kloh ueh jêh ri nau yơk,

⁵ lơi tŭp tâm nau văng tĭr blă blơ nâm bu phung bu năch, jêng phung bunuyh mâu gĭt năl Brah Ndu.

⁶ Tâm ntil nau aơ, lơi ăn geh bunuyh ƀư tih, mâu lah ndơm oh nâu păng nơm; yorlah Kôranh Brah jêng Nơm phat dôih tâm rmal ma lĕ nau nây, nâm bu hên hŏ lah lor jêh ri mbơh jêh ma khân may.

⁷ Yorlah Brah Ndu mâu kuăl ôh he ma nau ƀơ̆ ƀơch, ƀiălah ma nau kloh ueh.

⁸ Yor ri, mbu nơm dun nau hên ngơi, mâu di dun kon bunuyh ôh, ƀiălah jêng dun Brah Ndu, Nơm ăn jêh Brah Huêng Ueh Păng ma khân may.

⁹ Ma nau rŏng ndrăng oh nâu khân may, pô ri mâu ăn ôh bu nchih ma khân may, yorlah khân may nơm lĕ nti jêh bơh Brah Ndu ăn tâm rŏng ndrăng khân may;

¹⁰ nanê̆ ngăn khân may dôl ƀư kơt nây đŏng ma lĕ rngôch phung oh nâu lam tâm n'gor Masêđôn. Ƀiălah hơi oh nâu, hên nti nkah ma khân may lơ hô tâm rŏng lơn đŏng.

¹¹ Nti gŭ rêh tâm nau klăk klêm, mĭn rvê ma nau kan êng khân may nơm jêh ri pah kan ma ti khân may nơm, nâm bu hên ntĭnh jêh ma khân may;

¹² pô nây, nau gŭ rêh khân may geh phung padih rnê, jêh ri mâu lĕ rnơm ma bu.

Nau dâk rêh tâm nar Kôranh Brah plơ̆ văch

¹³ Hơi phung oh nâu, hên mâu ŭch ôh ma khân may mâu gĭt rbăng ma nau phung bê̆ch jêh, gay ma khân may lơi rngot rvê nâm bu phung êng mâu geh nau kâp gân.

¹⁴ Yorlah tơlah he chroh ma Brah Yêsu khĭt jêh ri dâk rêh tay, kơt nây đŏng, Brah Ndu mra leo phung bê̆ch jêh tâm Brah Yêsu văch ndrel Păng.

¹⁵ Aơ jêng nau hên rnơm nau ngơi Kôranh Brah gay lah ma khân may: He jêng phung hôm rêh ƀiălah hôm gŭ ta neh kŏ tât ta nar Kôranh Brah plơ̆ văch, pô ri he mâu mra hăn lor ôh ma phung bê̆ch jêh.

¹⁶ Yorlah lah tât nau ăn jêh, ndrel ma bâr kuăl bơh kôranh tông mpăr, jêh ri bâr nŭng Brah Ndu, pô ri Kôranh Brah nơm mra jŭr văch tă bơh trôk. Nôk nây, phung bunuyh khĭt tâm Brah Krist mra dâk rêh tay lor lơn.

¹⁷ Jêh ta nây, phung he jêng phung hôm gŭ rêh, ƀiălah hôm e gŭ ta neh mra hao klơ ndrel ma phung bunuyh nây tâm ndâr tŭk gay tâm mâp đah Kôranh Brah ta klơ trôk, jêh ri he mra gŭ ndrel Kôranh Brah mro mrăng.

¹⁸ Pôri, khân may sŏk hom lĕ nau ngơi aơ gay bonh leng ndrăng khân may.