I Têsalônik 3 - Nau Brah Ndu Ngơi 2023

Y-Pôl njuăl Y-Timôthê tât ta ƀon Têsalônik. – Nau răm maak jêh ri nau Y-Pôl ŭch

¹ Yorlah mâu dơi gŭ kâp jŏ lơn, pôri hên ndrăp jêh gŭ êng ta ƀon Athen

² jêh ri njuăl Y-Timôthê hăn, oh nâu he, nơm pah kan ma Brah Ndu tâm nau mbơh nkoch Nau Mhe Mhan Ueh Brah Krist, văch ma khân may gay ndâk njêng jêh ri n'hao nuih khân may tâm nau chroh,

³ gay mâu geh du huê tâm khân may rdja nuih tanăp lĕ nau rêh ni aơ; yorlah khân may nơm hŏ gĭt jêh nây jêng nau nal lor ma he.

⁴ Lah hôm e gŭ ndrel ma khân may, hên lah lor jêh pô aơ he mra dơn nau rêh ni; jêh ri nâm bu khân may gĭt, nau nây hŏ tât jêh.

⁵ Yor ri, mâu dơi ôh kâp jŏ ir, gâp njuăl Y-Timôthê hăn gay ma gĭt nau khân may chroh, klach lah nơm ndơm hŏ ndơm jêh khân may, jêh ri nau kan hŏt hên jêng dơm dam.

⁶ Ƀiălah nar aơ Y-Timôthê mhe plơ̆ sĭt tă bơh ntŭk khân may, hŏ nkoch jêh ma hên nau mhe jêng ueh ma nau chroh jêh ri ma nau khân may rŏng. Păng lah đŏng pô aơ ma khân may djôt prăp ƀaƀơ kah gĭt ndray ueh bơh hên, jêh ri ŭch saơ hên, nâm bu hên ŭch saơ khân may kơt nĕ lĕ.

⁷ Hơi phung oh nâu, kơt nây tâm lĕ rngôch nau jâk jêr jêh ri nau rêh ni, hên hŏ dơi geh nau tâm bonh leng bơh nau khân may chroh.

⁸ Yorlah aƀaơ aơ hên gŭ rêh yor khân may gŭ nâp tâm Kôranh Brah.

⁹ Mâm dĭng hên dơi tŏng nau gay lah ueh ma Brah Ndu yor khân may, ma lĕ rngôch nau răm maak bơh khân may hên geh tanăp Brah Ndu he?

¹⁰ Nar jêh ri măng hên mbơh sơm ma nau duh nđơr ngăn, gay Păng ăn hên dơi saơ khân may, jêh ri ntop moh nau hôm e tâm nau khân may chroh.

¹¹ Dăn Brah Ndu nơm, Mbơ̆ he, jêh ri Brah Yêsu, Kôranh Brah he, njŭn trong ma hên văch ta khân may!

¹² Dăn Kôranh Brah ƀư ăn ma khân may lơ hô hao lơn jêh ri bêng ma nau rŏng ndrăng nơm, jêh ri ma lĕ rngôch bunuyh, nâm bu hên rŏng jêh ma khân may,

¹³ tă bơh nĕ Păng ƀư ăn khân may geh nau nâp nuih n'hâm, nau kloh ueh, mâu geh ôh nau nduyh tanăp Brah Ndu, Mbơ̆ he, Brah Yêsu, Kôranh Brah he plơ̆ văch ndrel ma lĕ rngôch phung kloh ueh Păng!