I Têsalônik 2 - Nau Brah Ndu Ngơi 2023

Nau gŭ ngao Y-Pôl đah phung Têsalônik

¹ Hơi phung oh nâu, khân may nơm gĭt jêh ma nau hên hăn chop khâl khân may mâu di jêng dơm dam ôh.

² Ƀiălah nâm bu khân may hŏ gĭt jêh, nđâp lah hŏ dơn nau rêh ni jêh ri nau mưch rmot ta ƀon Philip, hên hôm geh nau janh tâm Brah Ndu gay ntăm ma khân may Nau Mhe Mhan Ueh Brah Ndu ta nklang âk nau tâm rdâng.

³ Yorlah nau hên mbơh nkoch mâu geh ôh luh bơh nau vĭ, mâu đŏng geh nau mĭn djơh mhĭk gay ndơm mƀruh bu.

⁴ Ƀiălah, Brah Ndu hŏ rlong uănh hên jêh ri jao ma hên Nau Mhe Mhan Ueh, pô ri hên mbơh nkoch, mâu di ôh ŭch ƀư maak ma kon bunuyh, ƀiălah ŭch ƀư maak ma Brah Ndu jêng Nơm sek uănh nuih n'hâm hên.

⁵ Yorlah khân may gĭt, jêh ri geh Brah Ndu jêng nơm mbơh, hên mâu mâp ôh dŏng lĕ nau ngơi ueh rlau keh ir, mâu lah ƀư kan yor ma nau kơnh drăp ndơ;

⁶ hên mâu đŏng joi nau chrêk rmah bơh kon bunuyh, mâu lah bơh khân may, mâu lah bơh phung ƀaƀă, nđâp lah jêng kôranh oh mon Brah Krist, gĭt lah hên gay ăn khân may yơk ma hên.

⁷ Ƀiălah ta nklang khân may, hên hŏ gŭ ngao rdơ̆ rbăn nâm bu bunuyh sâm mpu mât rong phung kon păng nơm.

⁸ Hên rŏng ngăn ma khân may kŏ tât ŭch pă ma khân may, mâu knŏng Nau Mhe Mhan Ueh Brah Ndu ôh ƀiălah nđâp nau rêh hên đŏng, yorlah khân may jêng phung bunuyh hên rŏng ngăn ngên.

⁹ Hơi phung oh nâu, nanê̆ khân may hôm kah gĭt ma nau jâk jêr jêh ri nau dŭt hŏt hên; tâm dôl mbơh nkoch Nau Mhe Mhan Ueh Brah Ndu ma khân may, hên pah kan măng nâm nar gay mâu ăn jêng nau jâk ôh ma du huê tâm phung khân may.

¹⁰ Khân may mbơh nkoch, jêh ri Brah Ndu mbơh đŏng pô aơ ma khân may jêng phung chroh, hên hŏ gŭ ngao tâm nau kloh, nau sŏng srăng jêh ri mâu geh nau nduyh ôh.

¹¹ Khân may gĭt đŏng, hên hŏ gŭ ngao ma ăp nơm tâm khân may nâm bu du huê mbơ̆ đah phung kon păng,

¹² tâm n'hao nuih n'hâm, tâm bonh leng jêh ri vơl dăn khân may gŭ rêh tâm di đah Brah Ndu, jêng Nơm kuăl khân may lăp ƀon bri hađăch jêh ri nau chrêk rmah Păng.

Nau răp jăp phung Têsalônik

¹³ Yor ri, hên lah ueh ma Brah Ndu mâu blau dŭt, yor nôk khân may tăng jêh ri sŏk dơn jêh nau ngơi Brah Ndu tă bơh hên, khân may mâu sŏk dơn nau ngơi nây tâm ban nau kon bunuyh ngơi, ƀiălah di ngăn jêng nau ngơi Brah Ndu, nau ngơi pah kan tâm khân may jêng phung chroh.

¹⁴ Hơi phung oh nâu, khân may hŏ tĭng kơt Phung Ngih Brah Ndu tâm Brah Yêsu Krist ta n'gor Yuđa, yorlah khân may dơn đŏng lĕ nau rêh ni nđâp phung ƀon lan khân may nơm nâm bu Phung Ngih Brah Ndu hŏ dơn jêh bơh phung Yuđa,

¹⁵ phung bunuyh hŏ nkhĭt jêh Kôranh Brah jêng Brah Yêsu, nkhĭt phung nơm mbơh lor, jêh ri ƀư mhĭk ma hên. Khân păng ƀư rngot nuih n'hâm Brah Ndu jêh ri rlăng đah lĕ rngôch bunuyh,

¹⁶ buay hên nti lah gay tâm rklaih phung bu năch. Khân păng ƀư ăn nau tih khân păng nơm bêng ler âk. Ƀiălah dăch dŭt, Brah Ndu ji nuih hŏ tât jêh ta khân păng.

¹⁷ Hơi phung oh nâu, bi hên, nđâp lah ngai ƀah đah khân may ƀât lât, ngai muh măt, ƀiălah mâu di ôh tâm bah nuih n'hâm, hên ŭch nđơr ngăn tâm mâp đah khân may,

¹⁸ Yor ri, hên, gâp yơh, Y-Pôl, bar tơ̆ jêh ŭch hăn tât ma khân may, ƀiălah Satan hŏ buay hên.

¹⁹ Yorlah nau kâp gân, nau răm maak, jêh ri đon hađăch khư tâm rnê ma hên tanăp Kôranh Brah he jêng Brah Yêsu, lah Păng plơ̆ văch moh nau, tơlah mâu di jêng khân may nơm?

²⁰ Ơ, khân may nơm jêng nau chrêk rmah jêh ri nau răm maak hên!