I Têsalônik 1 - Nau Brah Ndu Ngơi 2023

Nau mbah jô̆ khâl

¹ Y-Pôl, Y-Silvan jêh ri Y-Timôthê nchih njuăl ma Phung Ngih Brah Ndu ta ƀon Têsalônik, phung gŭ tâm Brah Ndu, jêng Mbơ̆, jêh ri tâm Kôranh Brah jêng Brah Yêsu Krist. Dăn nau yô̆ jêh ri nau đăp mpăn ăn ma khân may!

Nau tâm rnglăp Phung Ngih Brah Ndu ta ƀon Têsalônik jêh ri đah phung kôranh oh mon ( 1:2 – 3:13 ) Nau rêh ueh jêh ri nau chroh phung chroh ta ƀon Têsalônik

² Hên lah ueh ma Brah Ndu ƀaƀơ ma lĕ rngôch khân may, vay nkah tât khân may dôl hên mbơh sơm.

³ Tanăp măt Brah Ndu, jêng Mbơ̆, hên kah gĭt ƀaƀơ ma kan nau chroh khân may, ma kan nau rŏng khân may, nau srôih tâm nau khân may kâp gân tâm Kôranh Brah he jêng Brah Yêsu Krist.

⁴ Hơi phung oh nâu, phung Brah Ndu rŏng, hên gĭt Păng săch jêh khân may;

⁵ yor ma Nau mhe Mhan Ueh hên hŏ ntĭnh jêh ma khân may, mâu di knŏng tâm nau ngơi ôh, ƀiălah ma nau brah, ma Brah Huêng Ueh jêh ri ma nau gĭt nanê̆ jru ngăn đŏng. Khân may gĭt rah vah jêh nôk hên hôm gŭ ta nklang khân may, hên gŭ rêh jêh yor khân may.

⁶ Khân may hŏ tĭng kơt hên jêh ri bơh Kôranh Brah, yorlah khân may sŏk dơn nau chroh ta nklang âk nau rêh ni ma nau răm maak bơh Brah Huêng Ueh.

⁷ Yor ri, khân may hŏ jêng nau leo trong ueh ma lĕ rngôch phung chroh tâm n'gor Masêđôn jêh ri n'gor Akai.

⁸ Yorlah nau chroh Kôranh Brah tă bơh khân may hŏ lư ngăn, mâu di knŏng n'gor Masêđôn jêh ri Akai dơm ôh, ƀiălah nau khân may chroh tâm Brah Ndu hŏ tăng lư lam ntŭk, kŏ tât hên mâu hôm ŭch gay ngơi ntop đŏng ôh.

⁹ Yorlah khân păng hŏ nkoch jêh bri nau khân may vơt rom hên, jêh ri mâm nau khân may hŏ plơ̆ sĭt ma Brah Ndu, chalơi jêh rup brah gay pah kan ma Brah Ndu rêh jêh ri nanê̆ ngăn,

¹⁰ jêh ri gŭ kâp Kon Păng bơh trôk, jêng Brah Yêsu, Păng hŏ ƀư ăn dâk rêh tay tă bơh nau khĭt, jêng Nơm tâm rklaih he bơh ma nau ji nuih dăch tât.