I Samuel 9 - Nau Brah Ndu Ngơi 2023

Bu săch Y-Sôl jêng hađăch

¹ Rnôk nây, geh du huê bunuyh bơh noi deh Benjamin, geh nau dơi jêh ri ndrŏng ngăn ngên, ntơ amoh Y-Kis. Păng jêng kon bu klâu Y-Abiêl, sau Y-Sêror, se Y-Bêkôrat, săn Y-Aphia, jêng kon bu klâu du huê phung Benjamin.

² Y-Kis geh du huê kon bu klâu amoh Y-Sôl, hôm ndăm jêh ri ray nkrơ̆. Tâm phung ƀon lan Israel, mâu geh ôh du huê bu klâu ray nkrơ̆ lơn ma păng. Y-Sôl juat lơn lĕ rngôch bunuyh ntơm bơh săng nglik păng rlet klơ.

³ Du nar, phung seh bri me Y-Kis, nhhơt trong. Y-Kis lah ma Y-Sôl, kon bu klâu păng: “Sŏk hom du huê tâm phung oh mon ndrel ma may jêh ri hăn joi phung seh bri me.”

⁴ Y-Sôl hăn lam n'gor klơ dor yôk Êphraim, hăn rgăn n'gor neh Salisa, ƀiălah păng mâu saơ ôh seh bri. Jêh nây, khân păng hăn rgăn n'gor Salim, n'gor Benjamin, ƀiălah seh bri ăt mâu gŭ lĕ ta nây.

⁵ Nôk tât ta n'gor Sup, Y-Sôl lah ma oh mon n'hanh păng: “Aơ, he plơ̆ sĭt hom, klach lah mbơ̆ gâp mâu hôm mĭn ma nau roh seh bri, ƀiălah rvê rvănh ma he đŏng.”

⁶ Oh mon lah ma păng: “Aơ! geh du huê bunuyh Brah Ndu tâm ƀon aơ, jêng du huê bu yơk; Lĕ nau păng lah lor tât da dê mâu tih ôh. Pônây, he hăn hom ta nây, klăp lah păng mra ntĭm an trong ma he.”

⁷ Y-Sôl lah ma oh mon păng: “Di ngăn, ƀiălah tơlah he hăn ta nây, moh ndơ he mra djôt leo ma păng? Yorlah piăng let tâm dŭng he hŏ lĕ jêh, jêh ri he mâu hôm geh du ndơ nhhơr gay djôt leo ma bunuyh Brah Ndu! Moh he geh?”

⁸ Oh mon plơ̆ lah ma Y-Sôl: “Aơ, gâp dôl djôt tâm ti klăp lah pe gram prăk. Gâp mra nhhơr prăk nây ma bunuyh Brah Ndu, gay ma păng ntĭm an trong ma he.”

⁹ (Nar kăl e, tâm n'gor Israel, tơlah bu hăn ôp nau mĭn Brah Ndu, păng vay lah: “Văch hom! He hăn hom mâp ma nơm geh nau tâm saơ”; yorlah bunuyh bu ntơ nơm mbơh lor nar aơ, nar kăl e bu ntơ nơm geh nau tâm saơ.)

¹⁰ Y-Sôl lah ma oh mon păng: “Di jêh, he hăn hom!” Jêh nây khân păng hăn tât ma ƀon geh bunuyh Brah Ndu dôl gŭ.

¹¹ Dôl khân păng hao yôk rlet ma ƀon, khân păng mâp đah phung bu ur druh hăn bâk dak, khân păng ôp: “Nơm geh nau tâm saơ ta aơ lĕ?”

¹² Khân păng plơ̆ sĭt lah: “Păng ta aơ đŏng, ri păng panăp khân may! Hăn gơnh hom, păng mhe tât ta ƀon nar aơ yorlah nar aơ phung ƀon lan mra ƀư brah ta ntŭk prêh.

¹³ Tơlah khân may lĕ lăp tâm ƀon, khân may mra saơ păng êlor ma păng hăn hao ntŭk prêh klơ gay ma sông sa. Phung ƀon lan mâu mra sông sa lor ôh lah mâu hŏ tât păng, yorlah păng ăn nau ueh uĭn ma mpa ƀư brah; jêh nau nây, phung bu jă mra sa. Pônây, aƀaơ hăn hao hom, yorlah nar aơ n'hêl nanê̆ khân may mra tâm mâp đah păng.”

¹⁴ Khân păng hăn hao ma ƀon. Lah nôk lăp ƀon, khân păng saơ Y-Samuel dôl hăn luh tât ma khân păng ta trong hăn hao ntŭk prêh klơ.

¹⁵ Du nar êlor Y-Sôl tât, Brah Yêhôva hŏ tâm mpơl jêh ma Y-Samuel gĭt:

¹⁶ “Ôi taơ, di ta mông aơ, Gâp mra prơh du huê bunuyh gŭ ta n'gor Benjamin tât ma may jêh ri may mra mhĭng dak ƀâu kah ma păng gay păng jêng kôranh chiă uănh phung ƀon lan Israel Gâp. Păng mra tâm rklaih phung ƀon lan Gâp tă bơh ti phung Philistin, yorlah Gâp uănh treng jêh phung ƀon lan Gâp, yorlah nau khân păng nter vơl tât jêh ma Gâp.”

¹⁷ Tơlah Y-Samuel mhe saơ Y-Sôl, Brah Yêhôva lah ma păng: “Aơ jêng bunuyh Gâp hŏ ngơi jêh ma may! Păng yơh jêng nơm mra chiă uănh phung ƀon lan Gâp.”

¹⁸ Y-Sôl hăn văch dăch Y-Samuel ta nklang mpông ƀon toyh jêh ri ôp: “Dăn may ntĭm an ma Gâp ta ntŭk ngih nơm geh nau tâm saơ?”

¹⁹ Y-Samuel plơ̆ lah ma Y-Sôl: “Gâp yơh jêng nơm geh nau tâm saơ. Hăn hao hom panăp gâp ta ntŭk prêh klơ, yorlah nar aơ bar hê khân may mra sông sa ndrel ma gâp. Ôi taơ gâp mra ăn may hăn jêh ri mra lah ma may gĭt lĕ nau may dôl rvê rvănh.

²⁰ Bi ma lĕ seh bri me may roh jêh tâm pe nar, lơi rvê ma khân păng ôh, yorlah bu lĕ dơi joi jêh khân păng. Jêh ri ma mbu nơm bu prăp jêh lĕ nau khlay tâm n'gor Israel? Mâu hĕ di ma may jêh ri ma lĕ ngih mbơ̆ may?”

²¹ Y-Sôl lah: “Mâu di hĕ, gâp knŏng jêng du huê phung Benjamin, jêng du ndŭl mpôl jê̆ lơn tâm phung ndŭl mpôl Israel? Ndŭl mpôl gâp jê̆ lê̆ lơn ma lĕ rngôch ndŭl tâm noi deh Benjamin. Pônây, Mâm ƀư may ngơi nau pônây ma gâp?”

²² Y-Samuel leo Y-Sôl jêh ri oh mon păng ăn khân păng lăp tâm jrô, ăn ma khân păng gŭ panăp tâm phung bu năch bu jă jêh, klăp lah pe jât nuyh.

²³ Jêh nây Y-Samuel lah ma nơm n'gon piăng trao: “Djôt leo hom văch ta aơ lĕ ndơ gâp hŏ jao ma may jêh ri gâp hŏ ntĭnh ma may prăp êng.”

²⁴ Nơm n'gon piăng trao djôt puăch nglu ndrăp ta tra năp Y-Sôl. Y-Samuel lah: “Aơ jêng ndơ bu prăp gay ndrăp ma may. Sa hom, yorlah ndơ aơ bu lĕ rơm prăp ơm jêh ăn ma may kŏ tât nar hŏ tâm nal, ntơm bơh nar gâp jă phung văch sông sa.” Pônây tâm nar nây, Y-Sôl sông sa ndrel ma Y-Samuel.

²⁵ Jêh nau nây, khân păng hăn trŭnh tă bơh ntŭk prêh jêh ri lăp tâm ƀon toyh; bi Y-Samuel ngơi lah đah Y-Sôl klơ chor ngih.

²⁶ Tât nar ôi taơ, khân păng kah rngăl ơm ôi. Dôl dăch luh nar, Y-Samuel kuăl Y-Sôl dôl gŭ ta chor ngih, jêh lah: “Dâk hom, gâp mra njŭn may hăn trong.” Y-Sôl dâk, jêh nây păng hăn luh nđâp ma Y-Samuel.

Y-Samuel tŏ dak ƀâu kah ma Y-Sôl

²⁷ Dôl khân păng hăn trŭnh tât ta mpâr ƀon, Y-Samuel lah ma Y-Sôl: “Lah hom ma oh mon ăn păng hăn lor ma he. Nơm oh mon hăn lor panăp. Păng lah đŏng aƀaơ ri, ăn may gŭ ƀât lât ta aơ, gay ma gâp dơi ăn may gĭt nau Brah Ndu ngơi.”