I Samuel 8 - Nau Brah Ndu Ngơi 2023

II. Y-Sôl ( 8:1 – 21:15 ) Phung ƀon lan dăn du huê hađăch

¹ Tơlah Y-Samuel hŏ ranh jêh, păng dơm phung kon bu klâu păng jêng kôranh phat dôih ma phung Israel.

² Amoh kon bôk rah jêng Y-Yôel, kon bu klâu rơh bar jêng Y-Abija; khân păng phat dôih ta Bêr-Sêba.

³ Ƀiălah phung kon bu klâu păng mâu hăn tĭng ndô̆ ôh trong păng; khân păng hăn tĭng drăp ndơ, dơn ndơ bu blŏl, jêh ri ƀư kue đah nau sŏng.

⁴ Lĕ rngôch phung bu ranh Israel rgum ndrel jêh ri văch ma Y-Samuel ta Rama.

⁵ Khân păng lah ma păng: “Aơ, may lĕ ranh jêh, jêh ri phung kon bu klâu may mâu hăn tĭng ndô̆ ôh trong may. Aƀaơ, njêng hom ma hên du huê hađăch chiă uănh hên nâm bu lĕ rngôch bri dak êng!”

⁶ Nau khân păng lah “Ăn hom ma hên du huê hađăch chiă uănh hên!” ƀư ma Y-Samuel mâu maak ôh. Yor ri, Y-Samuel kuăl mbơh sơm ma Brah Yêhôva.

⁷ Brah Yêhôva lah ma Y-Samuel: “Gŭ iăt hom ma lĕ nau ngơi phung ƀon lan lah ma may, yorlah mâu di khân păng dun ma may ôh, ƀiălah dun ma Gâp, gay ma Gâp mâu hôm jêng hađăch khân păng đŏng ôh.

⁸ Tâm ban nau khân păng ƀư đah Gâp ntơm bơh Gâp ngluh khân păng du luh bơh n'gor bri Êjipt n'ho tât nar aơ: Khân păng hŏ dun chalơi jêh Gâp gay pah kan ma lĕ brah êng, nar aơ khân păng ƀư đŏng ma may kơt nĕ!

⁹ Pôri aƀaơ, iăt hom nau khân păng. Ƀiălah, ăn may mbơh rah vah ma khân păng gĭt, ăn khân păng gĭt rbăng nau hađăch mra chiă uănh khân păng.”

¹⁰ Y-Samuel nkoch tay lĕ rngôch nau Brah Yêhôva ngơi ma phung ƀon lan nôk khân păng dăn ma păng du huê hađăch.

¹¹ Păng lah: “Aơ jêng nau vay hađăch mra chiă uănh khân may: Hađăch mra sŏk phung kon bu klâu khân may ăn khân păng ƀĭt ndeh seh tâm lơh, mâu lah jêng phung tahan ncho seh, mâu lah nchuăt panăp ndeh seh hađăch.

¹² Păng mra njêng ma khân păng ƀư kôranh chiă uănh toyh du rbăn nuyh mâu lah kôranh chiă uănh toyh ma prăm jât nuyh, mâu lah đă khân păng chuar lŏ, kăch roih, njêng ndơ tâm lơh jêh ri lĕ ndơ dŏng ma ndeh seh hađăch.

¹³ Păng mra sŏk phung kon bu ur khân may jêng phung nkra dak ƀâu kah, phung n'gon piăng trao jêh ri ƀư piăng let.

¹⁴ Hađăch mra sŏk mir, đang krăk ƀâu, jêh ri đang tơm ôlive dŭt ueh khân may gay ăn ma phung oh mon păng.

¹⁵ Hađăch mra sŏk pi du kô̆ tâm jât ba jêh ri đang krăk ƀâu khân may, gay ăn ma kôranh chiă uănh jêh ri phung oh mon păng.

¹⁶ Hađăch mra sŏk phung oh mon bu klâu jêh ri phung oh mon bu ur, phung ndăm dŭt ueh ngăn khân may, jêh ri lĕ mpôl seh bri khân may, gay dŏng khân păng tâm kan păng.

¹⁷ Hađăch mra sŏk pi du kô̆ tâm jât lĕ mpôl biăp khân may, jêh ri khân may mra jêng dĭk păng.

¹⁸ Nôk nây, khân may mra nter vơl yor ma hađăch jêng nơm khân may săch jêh ma khân may nơm, ƀiălah nôk nây Brah Yêhôva mâu iăt ôh ma khân may.”

Nau ŭch phung Israel dơi geh

¹⁹ Ƀiălah phung ƀon lan dun mâu ŭch iăt ôh nau Y-Samuel, jêh ri khân păng lah: “Mâu ôh! ƀiălah hên ŭch geh du huê hađăch.

²⁰ Hên mra tâm ban ma lĕ rngôch bri dak êng; hađăch hên mra dơi chiă uănh hên, hăn tanăp hên jêh ri tâm lơh an ma hên.”

²¹ Y-Samuel tăng jêh lĕ rngôch nau phung ƀon lan lah, jêh ri knoch tay lĕ nau nây ma Brah Yêhôva.

²² Brah Yêhôva lah ma Y-Samuel: “Gŭ iăt hom nau khân păng jêh ri njêng ma khân păng du huê hađăch.” Jêh nau nây, Y-Samuel lah ma phung Israel: “Lĕ rngôch bunuyh plơ̆ sĭt hom ma ƀon khân may nơm.”