I Samuel 7 - Nau Brah Ndu Ngơi 2023

¹ Phung Kiriat-Jêarim văch chuă vơt tung Hip Nau Tâm Rnglăp Brah Yêhôva leo lăp ma ngih Y-Abinadap ta klơ dor yôk, jêh nây prăp êng ăn kon bu klâu păng jêng Y-Êlêasar nơm mât uănh Hip Nau Tâm Rnglăp Brah Yêhôva.

² Hip Nau Tâm Rnglăp Brah Yêhôva gŭ ta Kiriat-Jêarim du rnôk jŏ jêh, klăp lah bar jât năm. Lĕ rngôch ngih Israel nhĭm nhhiăng da dê jêh ri tĭng joi Brah Yêhôva.

Y-Samuel ƀư kôranh phat dôih phung Israel

³ Nôk nây, Y-Samuel lah ma lĕ rngôch ngih Israel: “Tơlah khân may plơ̆ sĭt tay ma Brah Yêhôva ma lĕ nuih n'hâm khân may, mƀăr lơi phung brah mâu năl jêh ri rup brah bu ur Astarôt tă bơh khân may. Mƀŏng hom nuih n'hâm khân may ma Brah Yêhôva jêh ri knŏng pah kan du huê Păng dơm, ri mơ Păng mra tâm rklaih khân may tă bơh ti phung Philistin.”

⁴ Phung ƀon lan Israel mƀăr lơi lĕ rup brah Baal jêh ri rup brah bu ur Astarôt, knŏng pah kan ma du huê Brah Yêhôva dơm.

⁵ Jêh nau nây, Y-Samuel lah: “Tâm rgum hom lĕ rngôch phung Israel ta Mispa, gâp mra mbơh sơm ma Brah Yêhôva yor khân may.”

⁶ Pôri khân păng rgum ndrel ta ƀon Mispa, bâk dak nkhŭt jêh ri nhhơr ma Brah Yêhôva. Tâm nar nây, khân păng ât sông sa, jêh ri ta nây khân păng mbơh pô aơ: “Hên ƀư tih jêh đah Brah Yêhôva.” Y-Samuel phat dôih phung ƀon lan Israel ta Mispa.

Phung Philistin roh nau dơi ta Êbenêser

⁷ Tơlah phung Philistin tăng nau phung ƀon lan Israel tâm rgum jêh ta Mispa, phung kôranh Philistin hăn hao tâm lơh đah phung Israel. Phung ƀon lan Israel tăng nau nây jêh ri râm sâr ma phung Philistin,

⁸ khân păng lah ma Y-Samuel: “Lơi ta rlu ôh mbơh sơm ma Yêhôva Brah Ndu yor hên, gay ma Păng tâm rklaih he bơh ti phung Philistin.”

⁹ Y-Samuel nhŭp du mlâm biăp kon hôm pu toh, ƀư ndơ ƀư brah gŭch nhhơr ma Brah Yêhôva. Jêh nau nây Y-Samuel kuăl mbơh sơm ma Brah Yêhôva yor phung Israel, jêh ri Brah Yêhôva plơ̆ lah ma păng.

¹⁰ Dôl Y-Samuel nhhơr ndơ ƀư brah gŭch, phung Philistin văch dăch ŭch tâm lơh đah phung Israel. Ƀiălah tâm nar nây Brah Yêhôva ƀư ăn lơp nglaih dah ƀhing ƀhing ma phung Philistin, ƀư ma khân păng uh ah, jêh ri khân păng roh nau dơi ta tra năp phung Israel.

¹¹ Bơh Mispa, phung Israel hăn tĭng phung Philistin, jêh ri tâm lơh đah khân păng kŏ pa dâng ƀon Bet-Kar.

¹² Nôk nây, Y-Samuel sŏk du mlâm lŭ dơm vah vang Mispa jêh ri Sen, ntơ amoh păng Êbenêser, yorlah păng lah: “Brah Yêhôva kơl tâm rklaih jêh he kŏ tât aƀaơ.”

¹³ Phung Philistin lăp gŭ tâm dâng phung Israel, mâu hôm văch rvan ôh n'gor bri Israel. Lôch nau rêh Y-Samuel, ti Brah Yêhôva tâm rdâng đah phung Philistin.

¹⁴ Lĕ rngôch ƀon phung Philistin pit sŏk jêh bơh phung Israel, ntơm bơh Êkron tât ta Gat, khân păng mplơ̆ sĭt ma phung Israel. Phung ƀon lan Israel rklaih lĕ ƀon nây tă bơh ti phung Philistin. Nau đăp mpăn ndâk tay ta nklang Israel jêh ri phung Amôrit.

¹⁵ Y-Samuel ƀư kôranh phat dôih phung Israel lôch nau rêh păng nơm.

¹⁶ Ăp năm păng hăn nsong ma Bêthel, Gilgal, Mispa jêh ri phat dôih phung Israel tâm lĕ rngôch ƀon toyh nây.

¹⁷ Jêh nây păng plơ̆ sĭt ma Rama, yorlah ngih păng ta nây. Ta Rama, păng phat dôih đŏng phung Israel, jêh ri ta nây păng ndâk du nơng ƀư brah ma Brah Yêhôva.