I Samuel 6 - Nau Brah Ndu Ngơi 2023

Phung Philistin mplơ̆ sĭt Hip Nau Tâm Rnglăp ma Israel

¹ Hip Nau Tâm Rnglăp Brah Yêhôva gŭ pơh khay tâm n'gor Philistin.

² Nôk nây, phung Philistin kuăl phung kôranh ƀư brah jêh ri phung ƀŭk rƀên tât, jêh ri ôp: “Moh nau he mra ƀư ma Hip Nau Tâm Rnglăp Brah Yêhôva? Mbơh ma hên gĭt mâm mplơ̆ hom hip nây tât ma ntŭk ơm?”

³ Khân păng plơ̆ lah: “Tơlah khân may mplơ̆ sĭt Hip Nau Tâm Rnglăp Brah Ndu Israel lơi mplơ̆ tay dơm ôh, ƀiălah mplơ̆ hom ăn ma Brah Ndu ndơ nhhơr chuai nau tih, jêh nây khân may mra dơi bah, jêh ri khân may mra gĭt mâm ti Păng mâu du tă bơh khân may.”

⁴ Phung Philistin ôp: “Moh ndơ hên mplơ̆ nhhơr ma Păng gay ma chuai nau tih?” Khân păng plơ̆ lah: “Prăm mlâm rup tŭl ko ƀư ma mah, jêh ri prăm mlâm kon đe ƀư ma mah, tĭng nâm ndah âk nuyh kôranh phung Philistin; yorlah lĕ rngôch khân may, jêh ri phung kôranh khân may, ăt tâm ban du nau rêh ni.

⁵ Pôri, khân may ƀư hom rup tŭl ko, jêh ri phung rup kon đe ƀư rai n'gor khân may, jêh ri tâm rnê hom ma Brah Ndu Israel. Klăp lah Păng mra rhuăt ti Păng tă bơh khân may, tă bơh phung brah khân may, jêh ri tă bơh bri khân may.

⁶ Mâm ƀư khân may dăng nuih n'hâm nâm bu phung Êjipt jêh ri Pharaôn hŏ dăng nuih n'hâm? Lah jêh Brah Yêhôva ƀư rêh ni ma khân păng, mâu di hĕ khân păng hŏ ăn jêh ma phung Israel hăn du luh?

⁷ Aƀaơ, ƀư hom du bôk ndeh mhe, jêh ri sŏk bar mlâm ndrôk me hôm ăn ma kon pu, mâu mâp nkuăk mâng mbăk ôh, jêh ri nkuăk mâng mbăk nây ta ndeh ndrôk, ƀiălah têk lơi phung kon ndrôk jê̆ leo nglăp tâm ndrung.

⁸ Ăn djôt leo hom Hip Nau Tâm Rnglăp Brah Yêhôva dơm ta klơ ndeh. Bi lĕ rngôch ndơ ma mah khân may nhhơr mplơ̆ ăn Brah Yêhôva jêng ndơ nhhơr chuai nau tih, n'gân hom tâm du mlâm thŭng jêh ri dơm păng gŭ êp ta meng. Jêh ri ăn hom ndrôk uih ndeh.

⁹ Khân may kâp uănh hom: Tơlah Hip Nau Tâm Rnglăp hăn hao tât mpeh n'gor bri păng nơm, jêng mpeh ma Bet-Sêmes, pôri Brah Yêhôva yơh nkhŭt nau mhĭk toyh aơ ta klơ he. Tơlah mâu di, pôri he mra gĭt pô aơ mâu di ti Păng rmal ma he, ƀiălah nau tât nây dơi tât tĭng nâm nau tât êng yơh.”

¹⁰ Phung Philistin ƀư di kơt nây. Khân păng sŏk bar mlâm ndrôk me hôm ăn ma kon pu, jêh ri nkuăk mâng mbăk ta ndeh, jêh ri krŭng lơi kon păng tâm ndrung.

¹¹ Khân păng dơm Hip Nau Tâm Rnglăp Brah Yêhôva tâm ndeh, nđâp ma thŭng geh kon đe ma mah jêh ri rup tŭl ko.

¹² Bar mlâm ndrôk nây hăn sŏng tĭng trong sĭt leo ƀon Bet-Sêmes. Khân păng ăt hăn tĭng trong toyh, rđuh dôl hăn, mâu teng mpeh pa ma, mâu lah teng mpeh pa chiau ôh. Phung kôranh Philistin hăn tĭng groi pakơi khân păng kŏ tât ta n'har Bet-Sêmes.

¹³ Nôk nây, phung Bet-Sêmes gŭ rek ba ƀlê tâm rlŭng, n'gơr uănh jêh ri saơ Hip Nau Tâm Rnglăp khân păng răm rhơn ngăn.

¹⁴ Ndeh nây tât tâm mir Y-Yôsuê, bunuyh Bet-Sêmes, jêh ri nsrŭng tay ta nây. Ta ntŭk nây geh du mlâm lŭ toyh, khân păng rlah tơm si ndeh ƀư long, jêh ri khân păng sŏk bar mlâm ndrôk me ƀư ndơ ƀư brah gŭch nhhơr ma Brah Yêhôva.

¹⁵ Phung Lêvi djôt leo Hip Nau Tâm Rnglăp Brah Yêhôva trŭnh tă bơh ndeh, nđâp ma thŭng geh lĕ ndơ nhhơr ma mah. Khân păng dơm lĕ rngôch ndơ nây ta klơ lŭ toyh. Tâm nar nây, phung Bet-Sêmes nhhơr lĕ ndơ ƀư brah gŭch jêh ri lĕ ndơ nhhơr êng ma Brah Yêhôva.

¹⁶ Tơlah prăm nuyh kôranh phung Philistin saơ nau nây, khân păng plơ̆ sĭt nar nây ro ma ƀon Êkron.

¹⁷ Aơ jêng lĕ rup tŭl ko ƀư ma mah jêng ndơ phung Philistin nhhơr ma Brah Yêhôva gay ƀư ndơ nhhơr chuai nau tih: du mlâm ma Asdôt, du mlâm ma Gaxa, du mlâm ma Askalôn, du mlâm ma Gat, jêh ri du mlâm ma Êkron.

¹⁸ Lĕ rup kon đe ƀư ma mah tâm di đah lĕ rngôch ƀon phung Philistin prăm nuyh kôranh, nđâp lĕ ƀon nâp jêh ri ƀon jê̆, kŏ tât ma lŭ toyh, jêng ntŭk khân păng n'gân Hip Nau Tâm Rnglăp Brah Yêhôva tâm mir Y-Yôsuê, bunuyh Bet-Sêmes. Lŭ toyh nây ăt hôm kŏ tât ta nar aơ.

Hip Nau Tâm Rnglăp ta Kiriat-Jêarim

¹⁹ Brah Yêhôva rmal phung Bet-Sêmes, yorlah khân păng hŏ uănh jêh tâm trôm Hip Nau Tâm Rnglăp Brah Yêhôva. Păng nkhĭt pơh jât nuyh phung ƀon lan. Phung ƀon lan nhĭm nhhiăng yorlah Brah Yêhôva nkhŭt jêh du nau tât toyh ta klơ khân păng.

²⁰ Nôk nây, phung Bet-Sêmes lah: “Mbu nơm dơi dâk tra năp Brah Yêhôva jêng Brah Ndu kloh ueh aơ? Tơlah Hip Nau Tâm Rnglăp luh du tă bơh he, ma mbu nơm păng mra hăn?”

²¹ Jêh nây khân păng prơh phung hăn mbơh ma phung Kiriat-Jêarim jêh ri lah: “Phung Philistin hŏ mplơ̆ tay jêh Hip Nau Tâm Rnglăp Brah Yêhôva, hăn trŭnh hom djôt leo păng sĭt ma khân may.”