I Samuel 5 - Nau Brah Ndu Ngơi 2023

Hip Nau Tâm Rnglăp tâm n'gor Philistin

¹ Tơlah pit sŏk jêh Hip Nau Tâm Rnglăp Brah Ndu, phung Philistin djôt leo Hip Nau Tâm Rnglăp tă bơh Êbenêser tât ta Asdôt.

² Jêh nau nây, khân păng leo nglăp Hip Nau Tâm Rnglăp Brah Ndu dơm tâm ngih brah Dagôn, jêh ri n'gân êp ta meng rup brah Dagôn.

³ Ôi taơ, phung ƀon lan Asdôt kah rngăl ơm ôi saơ Dagôn cha lôt nkŭp muh măt ta neh, panăp Hip Nau Tâm Rnglăp Brah Yêhôva. Khân păng leo nglăp Dagôn dơm tay ta ntŭk ơm.

⁴ Ang ôi taơ, khân păng kah rngăl ơm ôi đŏng, jêh ri saơ Dagôn cha lôt tay nkŭp muh măt ta neh panăp Hip Nau Tâm Rnglăp Brah Yêhôva, bôk jêh ri lĕ bar mlâm ti tŭp da dê ta klơ kađar lăp mpông sâng, knŏng hôm săk păng dơm hôm e.

⁵ Yor nây, tât nar aơ, phung kôranh ƀư brah Dagôn, jêh ri lĕ rngôch mbu lăp tâm ngih brah Dagôn der da dê mâu dơi jot ôh jâng klơ kađar lăp mpông sâng ngih brah Dagôn tâm Asdôt.

⁶ Ƀiălah ti Brah Yêhôva ƀư nkrit ăn ma phung ƀon lan Asdôt, Păng ƀư ma lĕ ƀon jêh ri n'gor jŭm ƀon geh nau klach jêh ri nau rêh ni yorlah geh nau ji tŭl ko.

⁷ Tơlah phung ƀon lan Asdôt saơ nau tât nây, khân păng lah: “Hip Nau Tâm Rnglăp Brah Ndu Israel mâu dơi ăn gŭ ndrel tay ma he ôh, yorlah ti Păng hŏ rmal he jêh ri brah Dagôn he.”

⁸ Pôri, khân păng prơh bu hăn jă lĕ rngôch kôranh phung Philistin tât jêh ri lah: “Moh nau he mra ƀư ma Hip Nau Tâm Rnglăp Brah Ndu Israel?” Phung kôranh plơ̆ lah: “Leo nglăp hom Hip Nau Tâm Rnglăp Brah Ndu Israel tât ta Gat.” Pôri khân păng leo nglăp Hip Nau Tâm Rnglăp Brah Ndu Israel tât ta nây.

⁹ Ƀiălah nôk khân păng leo nglăp Hip Nau Tâm Rnglăp tât ta Gat jêh ri ti Brah Yêhôva ƀư ma ƀon toyh nây, lĕ ƀon toyh nây krit klach ngăn. Păng dong phung ƀon lan tâm ƀon nây, ntơm bơh phung mom ndăm tât ma phung bu ranh geh nau tŭl ko da dê.

¹⁰ Nôk nây, khân păng njuăl Hip Nau Tâm Rnglăp Brah Ndu tât ta Êkron. Tơlah Hip Nau Tâm Rnglăp tât jêh ta Êkron, phung ƀon lan Êkron lŭng nter huy pô aơ: “Khân păng leo nglăp jêh Hip Nau Tâm Rnglăp Brah Ndu Israel tât ta he gay nkhĭt he jêh ri phung ƀon lan he!”

¹¹ Yor ri, khân păng prơh tay bu kuăl lĕ rngôch phung kôranh Philistin, jêh ri lah: “Leo mplơ̆ tay hom Hip Nau Tâm Rnglăp Brah Ndu Israel, mplơ̆ sĭt păng ta ntŭk ơm, lah mâu, he jêh ri phung ƀon lan he mra khĭt!” Yorlah tâm ăp ƀon lĕ geh da dê jêh nau krit kir ma nau khĭt. Ti Brah Ndu ăn nau rêh ni toyh ngăn ta nây.

¹² Bi phung mâu geh khĭt, nau ji tŭl ko mra ƀư rêh ni, jêh ri nau nter tâm ƀon nây hao tât klơ trôk.