I Samuel 4 - Nau Brah Ndu Ngơi 2023

Phung Philistin pit rvan Hip Nau Tâm Rnglăp

¹ Nau Y-Samuel ngơi tât ma lĕ rngôch phung Israel. Nôk nây, phung Israel dâk hăn tâm lơh đah phung Philistin, jêh ri khân păng ƀư pôih rmlak dăch Êbenêser, bi phung Philistin ƀư pôih rmlak ta Aphek.

² Phung Philistin nkrĭp tahan tâm lơh đah phung Israel. Ta mông tâm lơh, phung Philistin dơi đah phung Israel jêh ri nkhĭt phung Israel ntŭk tâm lơh klăp lah geh puăn rbăn nuyh.

³ Tơlah phung tahan plơ̆ sĭt ta rmlak tahan, phung bu ranh Israel lah: “Mâm ƀư Brah Yêhôva ăn phung Philistin dơi lơh đah he nar aơ? Ăn he hăn sŏk Hip Nau Tâm Rnglăp Brah Yêhôva tă bơh Silô văch ta aơ, dơm Hip Nau Tâm Rnglăp ta nklang he jêh ri mra tâm rklaih he bơh ti phung rlăng he!”

⁴ Pôri, phung ƀon lan prơh bunuyh hăn tât ta Silô. Tă bơh nây, khân păng sŏk Hip Nau Tâm Rnglăp Brah Yêhôva ma phung tahan, jêng Nơm gŭ ta nklang phung Chêrubim. Bar hê kon bu klâu Y-Êli, jêng Y-Hôphni jêh ri Y-Phinêas, hăn tĭng Hip Nau Tâm Rnglăp Brah Ndu.

⁵ Tơlah Hip Nau Tâm Rnglăp Brah Yêhôva lăp tâm pôih tahan, lĕ rngôch phung Israel troh nter huy da dê ngăn, kŏ tât n'gơ n'găr neh.

⁶ Tăng nau troh nter nây, phung Philistin ôp ndrăng khân păng: “Nau troh nter huy ngăn tâm pôih tahan Hêbrơ nây moh nau bu ntĭt?” Nôk khân păng gĭt pô aơ Hip Nau Tâm Rnglăp Brah Yêhôva hŏ tât jêh tâm pôih tahan

⁷ ri mơ phung Philistin klach, yorlah khân păng lah pô aơ: “Du ntil brah lĕ tât tâm pôih tahan.” Jêh nây nter lah: “Rêh ni ngăn ma he! Yorlah bơh saơm mâu mâp geh nau tât kơt aơ ôh!

⁸ Rêh ni ngăn ma he! Mbu moh dơi tâm rklaih he dơi rklaih bơh ti phung brah nau dơi nây? Aơ jêng phung brah lĕ tă rmal jêh phung Êjipt đah ăp ntil nau tât tâm bri rdah.

⁹ Hơi phung Philistin, ăn gŭ janh hom, mpơl hom khân may nơm jêng phung janh ktang! Tơlah mâu, khân may mra jêng dĭk ma phung Hêbrơ nâm bu khân păng hŏ tă jêng dĭk ma khân may! Mpơl hom khân may nơm jêng phung janh ktang jêh ri tâm lơh hom!”

¹⁰ Phung Philistin tâm lơh, jêh ri dơi lơh phung Israel, ăp nơm nchuăt du sĭt leo ma pôih khân păng nơm. Nây jêng du nau tâm lơh roh rai toyh ngăn ngên, geh pe rmưn nuyh tahan hăn jâng Israel lĕ cha lôt khĭt jêh.

¹¹ Hip Nau Tâm Rnglăp Brah Ndu bu lĕ pit rvan jêh, bi ma bar hê kon bu klâu Y-Êli, jêng Y-Hôphni jêh ri Y-Phinêas, lĕ khĭt da dê.

Nau Y-Êli khĭt

¹² Tâm nar nây đŏng, du huê bunuyh Benjamin nchuăt klaih tă bơh ntŭk tâm lơh tât ta Silô, bok ao păng lĕ hêk jêh, bôk sŏk păng bêng neh muy.

¹³ Tơlah păng lĕ tât jêh, Y-Êli dôl gŭ ta rnơl păng êp kêng meng trong, gŭ kâp gân nau bu mbơh, yorlah nuih n'hâm Y-Êli rvê ngăn ma Hip Nau Tâm Rnglăp Brah Ndu. Tơlah bunuyh nây lăp tâm ƀon toyh jêh ri mbơh nau tât nây, lĕ rngôch ƀon lan lŭng nter.

¹⁴ Tăng bâr lŭng nter, Y-Êli ôp: “Moh nau nter nây?” Bunuyh nây mbơh ndal ro ma Y-Êli.

¹⁵ Nôk nây, Y-Êli hŏ geh sĭn jât ma pham năm jêh, măt păng lĕ chieh jêh, mâu hôm dơi saơ ôh.

¹⁶ Bunuyh nây lah Y-Êli: “Nar aơ gâp nchuăt du jêh tă bơh nau tâm lơh, jêh ri gâp văch ta aơ tă bơh ntŭk tâm lơh.” Y-Êli ôp: “Ơ kon, moh nau hŏ tât?”

¹⁷ Nơm mbơh nau nây plơ̆ lah: “Phung Israel lĕ nchuăt du tanăp phung Philistin, jêh ri phung ƀon lan bu nkhĭt âk ngăn. Bar hê kon bu klâu may, jêng Y-Hôphni jêh ri Y-Phinêas, khĭt jêh, jêh ri bu pit sŏk jêh Hip Nau Tâm Rnglăp Brah Ndu.”

¹⁸ Bunuyh nây mhe lah ma Hip Nau Tâm Rnglăp Brah Ndu, Y-Êli cha lôt plơ̆ nkơi tă bơh rnơl păng ta meng mpông sâng, pă nko lêr jêh ri khĭt; yorlah păng hŏ ranh huơi jêh ri jâk rgănh. Păng hŏ ƀư kan phat dôih ma phung Israel tâm puăn jât năm.

¹⁹ Nôk nây, ƀăn păng, jêng ur Y-Phinêas, dôl ntreo jêh ri lĕ dăch nar deh. Tơlah păng tăng ma nau bu lĕ pit sŏk jêh Hip Nau Tâm Rnglăp Brah Ndu, jêh ri gĭt po păng nđâp ma sai păng lĕ khĭt jêh, ƀât lât păng geh nau tât ji deh, păng kŭnh jêh ri deh kon.

²⁰ Dôl păng lĕ dăch khĭt, phung bu ur geh măt ta nây lah: “Lơi klach ôh, yorlah ay deh jêh du huê kon bu klâu!” Ƀiălah păng mâu plơ̆ lah, mâu đŏng mĭn rvê lĕ nau nây.

²¹ Păng ntơ amoh kon se jê̆ nây jêng Y-Ikabôt, yorlah păng lah: “Nau chrêk rmah luh du jêh tă bơh phung Israel!”; păng ŭch lah ma nau bu sŏk jêh Hip Nau Tâm Rnglăp Brah Ndu, jêh ri ma nau khĭt po păng nđâp sai păng.

²² Păng lah đŏng: “Nau chrêk rmah luh du tă bơh phung Israel yorlah Hip Nau Tâm Rnglăp Brah Ndu lĕ bu pit sŏk jêh!”