I Samuel 31 - Nau Brah Ndu Ngơi 2023

Phung Israel roh nau dơi. – Nau Y-Saul khĭt jêh ri phung kon păng

¹ Rnôk nây, phung Philistin tâm lơh đah phung Israel. Phung tahan Israel nchuăt du panăp phung Philistin, jêh ri âk nuyh tâm phung khân păng bu khĭt, cha lôt khĭt ta klơ yôk Gilbôa.

² Phung Philistin tĭng ban Y-Sôl jêh ri phung kon bu klâu păng. Khân păng nkhĭt Y-Jônathan, Y-Abinadap, jêh ri Y-Malki-Sua, phung kon bu klâu Y-Sôl.

³ Nau tâm lơh jêng ktang ngăn ma Y-Sôl. Phung tahan na pănh gĭt năl hađăch jêh ri pănh geh ta hađăch, pôri hađăch geh nau sôt rmanh.

⁴ Y-Sôl lah ma nơm djôt ndơ tâm lơh păng: “Tŏk hom đao may jêh ri ntâp gâp, klach lah phung mâu koh ntâu aơ văch tât ntâp gâp jêh ri ƀư bêk prêng gâp.” Ƀiălah nơm djôt ndơ tâm lơh mâu nănh ƀư ôh yorlah klach ngăn. Yor ri, Y-Sôl sŏk đao jêh ri kŭnh tom tra ntang ntơh sân đah đao nây.

⁵ Tơlah nơm djôt ndơ Y-Sôl tâm lơh saơ hađăch khĭt jêh, jêh ri tâm ban đŏng tom săk păng nơm ma đah đao jêh ri khĭt ndrel păng.

⁶ Pônây Y-Sôl nđâp ma pe nuyh kon bu klâu păng, bunuyh tuy ndơ păng tâm lơh jêh ri lĕ rngôch phung tĭng ndô̆ păng khĭt ndrel păng da dê tâm nar nây.

⁷ Phung Israel mpeh đah ri rlŭng jêh ri mpeh kơh đah ri dak krong Yurdan, saơ jêh phung tahan Israel nchuăt du, Y-Sôl jêh ri pe phung kon bu klâu păng khĭt jêh, khân păng chalơi ƀon jêh ri nchuăt du. Phung Philistin văch tât pit sŏk jêh ri gŭ tâm ƀon nây.

⁸ Nar ôi taơ, phung Philistin tât sek uănh lĕ săk jăn khĭt, saơ Y-Sôl jêh ri pe nuyh kon bu klâu păng cha lôt khĭt ta klơ yôk Gilbôa.

⁹ Khân păng koh bôk Y-Sôl, sŏk ao loih hađăch, jêh ri prơh phung mbơh hăn mbơh nau maak aơ lam bri Philistin, tâm lĕ ngih brah rup khân păng jêh ri ma phung ƀon lan.

¹⁰ Khân păng dơm ndơ tâm lơh Y-Sôl tâm ngih brah Astarôt, jêh ri khân păng yông săk jăn khĭt Y-Sôl ndop ta mpêr ƀon Bet-San.

¹¹ Ƀiălah tơlah phung gŭ ta Jabes gŭ ta Gilêat gĭt nau phung Philistin ƀư jêh ma Y-Sôl,

¹² lĕ rngôch phung tahan janh ktang dâk hăn trong jêh ri hăn du măng kŏ ang. Khân păng sŏk săk jăn Y-Sôl jêh ri phung kon bu klâu păng tă bơh mpêr ƀon Bet-San, jêh nây djôt leo sĭt ta Jabes jêh ri su săk jăn khân păng ta nây.

¹³ Khân păng sŏk nting khân păng tâp brôi tâm dâng tơm si yôr tâm Jabes, jêh ri ver ât sông sa tâm pơh nar.