I Samuel 3 - Nau Brah Ndu Ngơi 2023

Brah Ndu kuăl Y-Samuel

¹ Nôk nây, Y-Samuel ndăm rah pah kan ma Brah Yêhôva tĭng nau Y-Êli ntĭm. Tâm rnôk nây, bu mâu vay tăng nau Brah Yêhôva ngơi, jêh ri lĕ nau tâm saơ kŏ mâu geh lĕ.

² Du nar ri, dôl Y-Êli gŭ bê̆ch ta ntŭk păng vay gŭ bê̆ch, măt păng ntơm ngo jêh, mâu hôm dơi saơ ang ôh.

³ Ŭnh kađen Brah Ndu ê hŏ nhhât ôh, jêh ri dôl Y-Samuel lâng săk bê̆ch tâm ngih Brah Yêhôva, jêng ntŭk geh Hip Nau Tâm Rnglăp Brah Ndu.

⁴ Dôl nây, Brah Yêhôva kuăl Y-Samuel jêh ri păng ơh: “Gâp ta aơ!”

⁵ Jêh nây păng nchuăt tât ta Y-Êli, jêh ri ơh: “Gâp ta aơ, yorlah may hŏ kuăl gâp.” Păng lah: “Gâp mâu geh kuăl, plơ̆ bê̆ch hom!” Pônây, păng plơ̆ hăn bê̆ch tay.

⁶ Brah Yêhôva kuăl đŏng: “Hơi Y-Samuel!” Y-Samuel dâk, hăn văch ta Y-Êli, jêh ri lah: “Gâp ta aơ, yor may lĕ kuăl jêh gâp.” Ƀiălah Y-Êli lah: “Hơi kon, gâp mâu geh kuăl ôh, plơ̆ bê̆ch hom!”

⁷ Nôk nây, Y-Samuel ê hŏ gĭt năl Brah Yêhôva ôh, jêh ri nau Brah Yêhôva ngơi ê hŏ đŏng tâm mpơl ma păng.

⁸ Brah Yêhôva kuăl tay Y-Samuel tơ̆ tal pe. Păng dâk, hăn tât Y-Êli, jêh ri lah: “Gâp ta aơ, yorlah may lĕ kuăl jêh gâp.” Rnôk nây, Y-Êli gĭt vât jêh pô aơ Brah Yêhôva kuăl kon se ndăm nây.

⁹ Yor ri, Y-Êli lah ma Y-Samuel: “Plơ̆ bê̆ch hom, jêh ri tơlah geh bu kuăl may, ăn may lah: ‘Ơ Brah Yêhôva, ngơi hom, yorlah oh mon May gŭ kâp iăt!’” Y-Samuel hăn bê̆ch ta ntŭk păng.

¹⁰ Brah Yêhôva văch dâk ta nây, kuăl kơt saơm nây đŏng: “Hơi Y-Samuel! Hơi Y-Samuel!” Y-Samuel ơh: “Dăn Kôranh Brah ngơi, yorlah oh mon May gŭ kâp iăt!”

¹¹ Brah Yêhôva lah ma Y-Samuel: “Uănh hom! Gâp mra ƀư du nau kan tâm phung Israel mbu nơm tăng, mra ƀư tê̆k lĕ bar đah tôr.

¹² Ta nar nây, Gâp mra ƀư tât di ngăn lĕ rngôch nau Gâp mbơh lor jêh ma ngih Y-Êli, bơh ntơm tât ta nglĕ dŭt.

¹³ Gâp mbơh lor jêh pô aơ Gâp mra tâm rmal ngih Y-Êli ƀaƀơ tât n'ho ro, yorlah păng gĭt jêh nau tih geh nau rak rtăp ma phung kon bu klâu păng ƀiălah păng mâu buay ôh khân păng.

¹⁴ Yor ri, Gâp sơm ton ma ngih Y-Êli pô aơ nau tih ngih nây mâu mra dơi chuai ma mpa ƀư brah mâu lah ma ndơ nhhơr ôh.”

¹⁵ Y-Samuel gŭ bê̆ch tât ôi, jêh nây păng pơk lĕ mpông ngih Brah Yêhôva. Y-Samuel klach mâu nănh nkoch tay nau tâm saơ nây ma Y-Êli.

¹⁶ Ƀiălah Y-Êli kuăl Y-Samuel: “Y-Samuel, kon gâp!” Păng ơh: “Gâp ta aơ.”

¹⁷ Y-Êli lah: “Moh nau Brah Yêhôva hŏ mbơh jêh ma may? May lơi ta pôn mo ôh nau nây ma gâp. Tơlah may pôn mo ma gâp du ntil nau tâm lĕ rngôch ntil nau Păng hŏ lah jêh ma may, dăn Brah Ndu rmal may jâk ngăn.”

¹⁸ Pôri, Y-Samuel nkoch tay lĕ rngôch nau, mâu pôn mo du ntil nau ma păng ôh. Y-Êli lah: “Nây jêng Brah Yêhôva, ăn Păng ƀư nau nây tĭng nâm nau Păng mĭn ueh!”

¹⁹ Y-Samuel văch ma toyh, Brah Yêhôva gŭ ndrel păng: Păng mâu ăn du ntil nau păng ngơi roh hêng dơm dam ôh.

²⁰ Lĕ rngôch phung Israel, ntơm bơh Dan tât ta Bêr-Sêba, gĭt ma Y-Samuel jêng du huê nơm mbơh lor ma Brah Yêhôva.

²¹ Brah Yêhôva tâm mpơl tay ta Silô; yorlah ta nây, Brah Yêhôva tâm mpơl đah Y-Samuel ma nau Păng ngơi.