I Samuel 29 - Nau Brah Ndu Ngơi 2023

Phung Philistin đing ma Y-Đavit

¹ Phung Philistin tâm rƀŭn lĕ rngôch phung tahan khân păng ta Aphek, hôm phung Israel ƀư pôih rmlak dăch ta tu dak n'hor ta Jesrêel.

² Dôl phung tahan Philistin hăn n'hoch luh lor băl rhiăng jêh ri băl rbăn phung tahan khân păng, Y-Đavit ndrel phung tahan păng hăn tĭng pakơi ndrel ma Y-Akis.

³ Rnôk nây, phung kôranh chiă uănh tahan Philistin lah: “Mbu phung Hêbrơ aơ gŭ ta aơ?” Y-Akis plơ̆ lah: “Nây jêng Y-Đavit, oh mon Y-Sôl, hađăch Israel, gŭ ndrel ma gâp hŏ jŏ nar jêh. Ntơm bơh nar păng văch tât ma ntŭk he n'ho tât ma aƀaơ, gâp mâu saơ ôh nau tih tâm păng.”

⁴ Ƀiălah phung kôranh chiă uănh tahan Philistin ji nuih, lah ma Y-Akis: “Mprơh hom păng plơ̆ sĭt ntŭk may de ntĭm jêh ma păng, lơi ăn ma păng hăn tâm lơh ndrel ma he, klach lah dôl tâm lơh, păng jêng rlăng he. Yorlah mâm nau păng dơi tâm nsĭr đŏng đah kôranh păng, tơlah mâu hĕ tă bơh lĕ bôk phung tahan he?

⁵ Mâu di hĕ Y-Đavit aơ hŏ pâl ntalơ̆ jêh ri mprơ ndrăng khân păng pô aơ: ‘Y-Sôl nkhĭt jêh âk rbăn nuyh, Hôm Y-Đavit nkhĭt jêh âk rmưn nuyh?’”

⁶ Pôri, Y-Akis kuăl Y-Đavit jêh ri lah: “Nanê̆ tĭng nâm Brah Yêhôva gŭ rêh mro mrăng, may jêng du huê bunuyh sŏng, gâp ŭch ma may hăn tâm lơh ndrel ma gâp, yorlah ntơm bơh nar may tât ma gâp kŏ tât nar aơ, gâp saơ may mâu geh du ntil nau nduyh ôh. Ƀiălah phung kôranh tahan gâp mâu dơn ôh.

⁷ Pôri sĭt hom aƀaơ ri jêh ri dâk hăn đăp mpăn gay may mâu ƀư ma phung kôranh Philistin nuih ôh.”

⁸ Y-Đavit lah ma Y-Akis: “Ntơm bơh gâp gŭ dăch may kŏ tât nar aơ, moh nau may saơ ma gâp geh nau nduyh kŏ tât gâp mâu dơi hăn tâm lơh đah phung rlăng may, jêng kôranh gâp?”

⁹ Y-Akis lah đŏng ma Y-Đavit: “Gâp gĭt nau nây, may ƀư nau maak ma gâp nâm bu tông mpăr Brah Ndu. Ƀiălah phung kôranh chiă uănh tahan Philistin lah: ‘Păng mâu mra dơi hăn luh ma nau tâm lơh ndrel ma he ôh.’

¹⁰ Yor ri, may jêh ri phung oh mon kôranh may hŏ hăn tĭng may, dâk ơm hom; di ngăn, dâk ơm hom jêh ri lah trôk ang, hăn du luh hom.”

¹¹ Pôri Y-Đavit ndrel ma phung tahan păng dâk hăn ơm ôi, gay ŭch sĭt rlet ma n'gor phung Philistin. Bi phung Philistin hăn hao rlet ma ƀon Jesrêel.