I Samuel 28 - Nau Brah Ndu Ngơi 2023

¹ Tâm rnôk nây, phung Philistin tâm rƀŭn phung tahan khân păng ŭch tâm lơh đah phung Israel. Y-Akis lah ma Y-Đavit: “Ăn may gĭt ma may jêh ri phung tahan may mra hăn tâm lơh ndrel ma phung tahan gâp.”

² Y-Đavit lah ma Y-Akis: “Ueh ngăn, may mra gĭt moh nau oh mon may dơi ƀư.” Jêh ri Y-Akis lah ma Y-Đavit: “Ueh ngăn, gâp mra njêng may jêng tahan gak njrăng gâp mro mrăng.”

Y-Saul kuăl n'hŭm Ta Ƀon Êndôr

³ Rnôk nây, Y-Samuel lĕ khĭt jêh; lĕ rngôch phung Israel nhĭm vơl păng jêh ri tâp păng ta Rama, jêng ƀon păng nơm. Bi Y-Sôl hŏ nsot lơi jêh lĕ phung gru rƀên jêh ri phung n'hŭm luh bơh n'gor.

⁴ Phung Philistin hŏ tâm rƀŭn jêh ri văch ƀư pôih tahan ta Sunem. Bi Y-Sôl tâm ban lĕ, rgum lĕ rngôch phung Israel, jêh ri ƀư pôih tahan ta Gilbôa.

⁵ Ƀiălah tơlah Y-Sôl saơ pôih tahan phung tahan Philistin, klach ngăn jêh ri nuih n'hâm râm nsâr ngăn ngên.

⁶ Y-Sôl ôp ma Brah Yêhôva, ƀiălah Brah Yêhôva mâu plơ̆ lah ôh, mâu lĕ saơ nau mbơi, mâu lah ma Urim, mâu lah ma phung nơm mbơh lor.

⁷ Y-Sôl lah ma phung oh mon păng: “Hăn joi hom du huê bu ur n'hŭm ma gâp, gay ma gâp hăn tât ôp păng.” Phung oh mon păng lah: “Aơ geh du huê bu ur n'hŭm ta Ên-Dôr.”

⁸ Y-Sôl tâm rgâl muh măt păng, nsoh kho ao êng, jêh nây hăn ndrel ma bar hê tât ta ngih bu ur nây dôl bri măng. Y-Sôl lah: “Dăn ay bê̆ch gru an ma gâp, jêh ri ngơi ndrel ma brah ăn luh du ma gâp du huê, gâp mra mbơh amoh ma ay.”

⁹ Bu ur nây plơ̆ lah: “Aơ, may gĭt jêh rah vah nau Y-Sôl ƀư jêh, păng hŏ nsot lơi jêh phung gru rƀên jêh ri phung n'hŭm luh bơh n'gor. Pônây, mâm dĭng păng ƀư dăk sân ŭch nkhĭt gâp?”

¹⁰ Y-Sôl sŏk amoh Brah Yêhôva gay sơm ton ma păng: “Nanê̆ tĭng nâm Brah Yêhôva gŭ rêh mro mrăng, ay mra mâu geh nau tâm rmal ôh ma nau aơ!”

¹¹ Bu ur nây ôp: “Mbu nơm gâp mra kuăl ăn ma may?” Y-Sôl plơ̆ lah: “Kuăl hom Y-Samuel ma gâp.”

¹² Tơlah bu ur nây saơ Y-Samuel, păng nter huy jêh ri lah ma Y-Sôl: “Mâm dĭng may ndơm gâp? May jêng hađăch Sôl!”

¹³ Hađăch lah ma păng: “Lơi klach ôh! Moh ndơ ay lĕ saơ?” Bu ur nây plơ̆ lah: “Gâp saơ du huê brah du luh tă bơh neh.”

¹⁴ Hađăch ôp: “Mâm ay saơ muh măt păng?” Păng lah: “Nây jêng du huê bu klâu bu ranh hăn hao, nsoh du blah ao rjai.” Y-Sôl gĭt nây jêng Y-Samuel yơh, kŭnh bôk ro, chon ta neh jêh ri mbah.

¹⁵ Y-Samuel ôp ma Y-Sôl: “Mâm ƀư may rsuak gâp jêh ri kuăl ăn gâp du luh?” Y-Sôl plơ̆ lah: “Gâp geh nau uh ah ngăn; yorlah phung Philistin tâm lơh đah gâp, jêh ri Brah Ndu du tă bơh gâp jêh, Păng mâu hôm saơ plơ̆ lah ôh ma gâp, ma phung nơm mbơh lor, mâu lah ma nau mbơi kŏ mâu hôm lĕ. Yor nây, gâp kuăl may gay ăn may mbơh ma gâp gĭt moh nau gâp mra ƀư.”

¹⁶ Y-Samuel lah: “Mâm dĭng may ôp ma gâp, tâm nôk Brah Yêhôva lĕ chalơi jêh may jêh ri lĕ jêng rlăng đah may?

¹⁷ Brah Yêhôva ƀư jêh ma may tĭng nâm lĕ nau Păng ngơi jêh ma gâp: Brah Yêhôva sŏk jêh ƀon bri hađăch tă bơh ti may gay ăn ma nơm chiau meng may jêng Y-Đavit.

¹⁸ Yorlah may mâu tông tĭng ma nau ngơi Brah Yêhôva, mâu ƀư ăn ma phung Amalek gĭt nau ji nuih Păng, yor nây yơh nar aơ Brah Yêhôva ƀư jêh ma may kơt nĕ.

¹⁹ Rlau lơn ma nây, Brah Yêhôva mra jao phung Israel nđâp ma may đŏng tâm ti phung Philistin. Nar ôi taơ, may jêh ri phung kon bu klâu may mra gŭ du ntŭk ndrel gâp. Brah Yêhôva tâm ban lĕ mra jao phung tahan Israel tâm ti phung Philistin.”

²⁰ Y-Sôl cha lôt jŏ ngăn ta neh, lĕ nau ngơi bơh Y-Samuel ƀư ăn ma hađăch klach krit ngăn. Rlau lơn ma nĕ, hađăch lĕ roh nau ktang tâm păng, yorlah păng mâu mâp sông sa ôh tâm du nar jêh ri du măng nây.

²¹ Rnôk nây, bu ur nây văch dăch Y-Sôl, saơ hađăch klach ngăn jêh ri păng lah: “Aơ, oh mon bu ur may hŏ tông jêh bâr may. Gâp sân săk jăn jêh nau rêh gâp gay tông tĭng jêh lĕ nau may lah ma gâp.

²² Pôri aƀaơ, may iăt hom ma bâr oh mon bu ur may: Ăn gâp ndrăp ma may glo piăng let, jêh ri may sa gay geh nau ktang gay hăn trong.”

²³ Y-Sôl dun jêh ri lah: “Gâp mâu mra sông sa ôh.” Ƀiălah phung oh mon păng nđâp bu ur nây nchâp păng ngăn pôri hađăch iăt nau khân păng. Hađăch dâk tă tâm neh jêh ri hao gŭ klơ sưng.

²⁴ Bu ur nây geh du mlâm ndrôk kon lay ueh tâm ngih, păng nhŭp nkhĭt ro. Jêh nây păng sŏk rnih pach jêh ri ƀư piăng let mâu geh ndrui.

²⁵ Păng ndrăp ndơ nây ma Y-Sôl jêh ri ma phung oh mon păng. Sông sa lôch jêh, khân păng dâk jêh ri hăn du luh tâm măng nây.