I Samuel 27 - Nau Brah Ndu Ngơi 2023

Y-Đavit ta Siklak

¹ Y-Đavit mĭn êng tâm nuih n'hâm pô aơ: “Nanê̆ du nar kăndơ̆, gâp mra khĭt ma ti Y-Sôl. Ueh lơn gâp du tâm n'gor Philistin gay Y-Sôl mâu hôm joi nhŭp gâp tâm lam n'gor Israel. Tâm ban pônây, gâp mra klaih bơh ti hađăch.”

² Jêh nây Y-Đavit hăn trong ndrel ma prao rhiăng nuyh tĭng ndô̆ păng, rgăn n'har tât ta Y-Akis, kon Y-Maôk, hađăch ƀon Gat.

³ Y-Đavit jêh ri phung tĭng ndô̆ păng gŭ ndrel ma Y-Akis ta Gat, ăp nơm leo nđâp ur kon păng. Y-Đavit geh bar hê ur tĭng ndrel, amoh jêng H'Ahinôam bơh Jesrêel, jêh ri H'Abigêl, alor nây jêng ur drô Y-Nabal bơh Karmel.

⁴ Tơlah Y-Sôl gĭt jêh nau Y-Đavit hăn du jêh ma Gat, pôri mâu hôm ôh tĭng joi păng.

⁵ Y-Đavit lah ma Y-Akis: “Tơlah gâp geh nau yô̆ tanăp măt may, ăn hom ma gâp du ntŭk tâm lĕ ƀon jê̆ tâm nkual n'gor bri gay ma gâp dơi gŭ ta nây. Yorlah mâm dơi oh mon may gŭ tâm ƀon hađăch ndrel ma may?”

⁶ Pôri tâm nar nây, Y-Akis ăn ma păng ƀon Siklak. Yor ri, Siklak jêng ndơ ma phung hađăch Yuđa tât ta nar aơ.

⁷ Rnôk Y-Đavit gŭ tâm n'gor phung Philistin du năm ma puăn khay.

⁸ Y-Đavit jêh ri phung tahan păng hăn hao lơh phung Gêsurit, phung Girsit, jêh ri phung Amalek. Nĕ jêng lĕ phung ƀon lan gŭ lĕ jŏ jêh tâm n'gor bri Sur tât ta n'gor bri Êjipt.

⁹ Ăp tơ̆ tâm lơh du n'gor neh, Y-Đavit mâu om rêh ôh nđâp bu klâu mâu lah bu ur; sŏk gro lĕ biăp, ndrôk seh bri, seh samô, jêh ri kho ao. Jêh nây păng plơ̆ sĭt ma Y-Akis.

¹⁰ Tơlah Y-Akis ôp: “Nar aơ, ta ntŭk may lơh sŏk gro?” Y-Đavit plơ̆ lah: “Nêgep tâm n'gor Yuđa,” mâu lah “Nêgep phung Jêrahmêlit,” mâu lah “Nêgep phung Kênit.”

¹¹ Y-Đavit mâu om rêh ôh bu klâu mâu lah bu ur lah hôm rêh bu leo sĭt ma ƀon Gat, yorlah păng lah: “Klach lah khân păng mra nkoch bri nau ƀư mhĭk ma he pô aơ: ‘Y-Đavit hŏ ƀư kơt nây.’” Dôl tâm mông nar Y-Đavit gŭ tâm n'gor bri phung Philistin, păng ăt vay ƀư tâm ban lĕ.

¹² Yor ri, hađăch Akis nsing ma Y-Đavit, yorlah gŭ mĭn: “Păng ƀư ma păng nơm jêng ndơ tâm rmot ngăn đah phung Israel, jêng phung ƀon lan păng, jêh ri păng mra jêng oh mon gâp mro mrăng.”