I Samuel 26 - Nau Brah Ndu Ngơi 2023

Y-Đavit mâu khĭt ôh Y-Saul du tơ̆ đŏng

¹ Phung Sip hăn ma Y-Sôl ta Gibêa, jêh ri lah pô aơ: “Y-Đavit dôl du krap ta dor Hakila, tra năp bri rdah.”

² Y-Sôl hăn trong nđâp ma pe rbăn nuyh bu klâu păng săch jêh tă bơh phung Israel, hăn trŭnh bri rdah Sip gay ŭch joi Y-Đavit.

³ Y-Sôl ƀư pôih tahan êp kêng meng trong, klơ dor Hakila, tra năp bri rdah; bi Y-Đavit gŭ tâm bri rdah. Tơlah păng saơ Y-Sôl hăn tĭng păng,

⁴ Y-Đavit prơh bunuyh hăn n'hut uănh, jêh ri gĭt nanê̆ jêh ma Y-Sôl lĕ tât jêh.

⁵ Y-Đavit hăn trong jêh ri tât ma ntŭk Y-Sôl ƀư pôih tahan. Y-Đavit saơ ntŭk bê̆ch Y-Sôl jêh ri Y-Apner, kon Y-Ner, jêng kôranh tahan păng. Y-Sôl gŭ bê̆ch tâm pôih tahan, geh phung tahan ƀư pôih gŭ văr jŭm păng.

⁶ Y-Đavit ôp ma Y-Ahimalek, bunuyh Hitit, jêh ri Y-Abisai, kon H'Sêruya, oh Y-Jôap: “Mbu nơm mra hăn ndrel ma gâp trŭnh ma pôih tahan Y-Sôl?” Y-Abisai lah: “Gâp mra hăn trŭnh ndrel ma may.”

⁷ Dôl bri măng, Y-Đavit jêh ri Y-Abisai hăn tât ta ntŭk phung tahan, saơ Y-Sôl gŭ lâng bê̆ch tâm pôih tahan, tak păng ntâp ta neh ta bôk bê̆ch. Y-Apner jêh ri phung tahan gŭ bê̆ch jŭm Y-Sôl.

⁸ Y-Abisai lah ma Y-Đavit: “Nar aơ, Brah Ndu jao jêh nơm rlăng may tâm ti may. Ăn gâp sŏk tak gay ntâp păng, knŏng du tong dơm mra rchiăt păng tâm neh; mâu hôm ŭch ntâp tal bar ôh.”

⁹ Ƀiălah Y-Đavit lah ma Y-Abisai: “Lơi nkhĭt păng! Yorlah mbu moh yơr ti lơh nơm Brah Yêhôva hŏ tŏ dak ƀâu kah jêh ƀiălah mâu geh nau rmal ôh?”

¹⁰ Y-Đavit ngơi lah đŏng: “Nanê̆ tĭng nâm Brah Yêhôva gŭ rêh mro mrăng, Brah Yêhôva mra dong păng, mâu lah tơlah tât nar păng khĭt êng, mâu lah tơlah păng hăn tâm lơh mra rai lôch.

¹¹ Ăn Brah Yêhôva mât mray gâp mâu yơr ti gâp ma nơm Brah Yêhôva lĕ tŏ dak ƀâu kah jêh! May sŏk lơi hom tak ta bôk bê̆ch păng jêh ri dak yăng păng, jêh nây he hăn du.”

¹² Pôri, Y-Đavit sŏk tak jêh ri dak yăng bơh bôk bê̆ch Y-Sôl, jêh nây bar hê khân păng dâk hăn. Mâu geh nơm saơ ôh, mâu geh nơm gĭt ôh, jêh ri mâu geh nơm kah rngăl, lĕ rngôch hăk bê̆ch da dê, yorlah Brah Yêhôva hŏ ƀư ăn ma khân păng lêt bê̆ch.

¹³ Jêh nây Y-Đavit rgăn đah ri, dâk ta klơ n'gơn yôk, ngai ngăn đah ntŭk pôih Y-Sôl.

¹⁴ Păng kuăl phung tahan jêh ri Y-Apner, kon Y-Ner: “Hơi Y-Apner, may mâu plơ̆ lah lĕ?” Y-Apner plơ̆ lah: “Mbu moh may, nơm nănh kuăl hađăch?”

¹⁵ Y-Đavit lah ma Y-Apner: “Mâu di hĕ may jêng du huê ktang? Mbu nơm jêng nâm bu may tâm n'gor Israel? Pônây, mâm ƀư may mâu kâp njrăng ma hađăch, jêng kôranh may? Tâm phung ƀon lan geh nơm ŭch nkhĭt hađăch jêng kôranh may.

¹⁶ Nau may hŏ ƀư aơ mâu ueh ôh. Tĭng nâm Brah Yêhôva gŭ rêh mro mrăng, may khư ma nau khĭt yorlah may mâu kâp njrăng ôh kôranh may, jêng nơm Brah Yêhôva hŏ tŏ jêh dak ƀâu kah. Aƀaơ, uănh hom ta ntŭk tak hađăch may jêh ri dak yăng ta bôk bê̆ch păng?”

¹⁷ Y-Sôl gĭt năl bâr Y-Đavit, jêh ri ôp: “Hơi Y-Đavit, kon gâp, di lĕ aơ bâr may?” Y-Đavit ơh: “Hơi hađăch, kôranh gâp, di ngăn jêng bâr gâp.”

¹⁸ Păng lah tay: “Mâm ƀư kôranh hăn tĭng oh mon may pônây? Moh nau gâp lĕ ƀư jêh, jêh ri moh nau tih ti gâp lĕ ƀư?

¹⁹ Aƀaơ, dăn hađăch gŭ iăt hom nau ngơi oh mon may. Tơlah Brah Yêhôva nsŭk nsôr may ƀư mhĭk ma gâp, dăn Păng sŏk dơn ndơ ƀư brah. Ƀiălah tơlah kon bunuyh, ăn păng dơn nau rak rtăp tanăp măt Brah Yêhôva; yorlah nar aơ khân păng hŏ mprơh gâp luh tă bơh ntŭk prăp ma gâp tâm drăp ndơn bơh Brah Yêhôva, jêh ri khân păng lah pô aơ: ‘Hăn hom mbah ma lĕ brah êng.’

²⁰ Pôri aƀaơ, lơi ăn mham gâp hoch ta neh ngai đah tanăp măt Brah Yêhôva; yorlah hađăch phung Israel hŏ leo phung tahan hăn luh gay joi du mlâm si so, nâm bu tĭng nhŭp du mlâm sĭm tat-ta tâm yôk.”

²¹ Rnôk nây, Y-Sôl ngơi: “Gâp geh nau tih! Hơi Y-Đavit, kon gâp, plơ̆ sĭt hom! Gâp mâu mra ƀư mhĭk ma may đŏng ôh, yorlah nar aơ may hŏ uănh yơk nau rêh gâp. Ngăn yơh, gâp hŏ ƀư jêh nau brŭt moih, hŏ ƀư tih toyh ngăn.”

²² Y-Đavit ơh: “Aơ jêng tak hađăch, ăn du huê oh mon hađăch hăn văch ta aơ sŏk păng.

²³ Brah Yêhôva mra nkhôm ăn ăp nơm tĭng nâm nau sŏng srăng jêh ri nuih n'hâm răp jăp păng. Nar aơ, Păng hŏ jao jêh hađăch tâm ti gâp, ƀiălah gâp mâu ŭch yơr ti gâp ƀư ma nơm Brah Yêhôva hŏ tŏ jêh dak ƀâu kah.

²⁴ Nar aơ, gâp hŏ uănh nau rêh hađăch jêng khlay, pôri Brah Yêhôva tâm ban đŏng mra uănh nau rêh gâp jêng khlay, jêh ri tâm rklaih gâp tă bơh lĕ rngôch nau rêh ni.”

²⁵ Y-Sôl ngơi ma Y-Đavit: “Hơi Y-Đavit, kon gâp, dăn ma may geh nau ueh uĭn! Nanê̆ may mra ƀư lĕ nau kan toyh jêh ri mra geh nau dơi lơn.” Jêh nây Y-Đavit dâk hăn trong păng, bi ma Y-Sôl plơ̆ sĭt ta ngih păng nơm.