I Samuel 25 - Nau Brah Ndu Ngơi 2023

Y-Samuel khĭt

¹ Y-Samuel khĭt, jêh ri lĕ rngôch phung ƀon lan Israel tâm rƀŭn nhĭm vơl ma păng. Khân păng tâp păng tâm ƀon tơm ngih păng ta Rama. Jêh nau nây, Y-Đavit hăn trŭnh tâm bri rdah Paran.

Y-Đavit jêh ri ur păng jêng H'Nabal

² Geh du huê bunuyh gŭ ta Maôn, bi drăp ndơn păng ta Karmel. Bunuyh nây ndrŏng ngăn ngên, păng mât rong pe rbăn mlâm biăp, jêh ri du rbăn mlâm be. Dôl păng kreh rsau biăp ta Karmel.

³ Bunuyh nây amoh Y-Nabal, tâm noi deh Y-Kalep; jêh ri ur păng jêng H'Abigêl. Bu ur nây geh nau blau mĭn jêh ri ueh, bi sai păng jêng dăng ko jêh ri janh ƀai.

⁴ Tâm bri rdah, Y-Đavit gĭt Y-Nabal dôl kreh rsau biăp

⁵ rĭ dĭng Y-Đavit prơh jât phung ndăm hăn, jêh ri ntĭnh ma khân păng: “Hăn hao hom ta Karmel, hăn tât tâm mâp đah Y-Nabal, sŏk amoh gâp gay mbah jô̆ khâl ma păng,

⁶ jêh ri lah pô aơ: ‘Ăn nau đăp mpăn gŭ ndrel may, ăn nau đăp mpăn gŭ ndrel ma ngih vâl may jêh ri ma lĕ rngôch ndơ may geh!

⁷ Aƀaơ, gâp gĭt may geh phung blau kreh rsau biăp. Dôl phung rmăk biăp may gŭ dăch hên, hên mâu mâp ƀư rkhŭk ma khân păng ôh; lĕ năng nar khân păng gŭ ta yôk Karmel, khân păng mâu geh roh du ntil ndơ ôh.

⁸ Ôp hom phung oh mon may, khân păng mra nkoch ma may gĭt. Yorlah hên hăn tâm nar rƀŭn, ŭch ăn phung ndăm gâp geh nau ueh lăng tanăp măt may. Dăn ăn ma phung oh mon may jêh ri ma kon bu klâu may Y-Đavit ăp moh ndơ may geh tâm ti.’”

⁹ Phung ndăm Y-Đavit hăn tât tâm mâp đah Y-Nabal, jêh ri sŏk amoh Y-Đavit gay lah tay lĕ rngôch lĕ nau ngơi nây, jêh nây gŭ kâp klăk klêm.

¹⁰ Ƀiălah Y-Nabal plơ̆ lah ma phung oh mon Y-Đavit: “Mbu moh Y-Đavit? Mbu nơm jêng kon bu klâu Y-Yêsê? Nar aơ âk ngăn phung oh mon du ndĕ đah kôranh păng!

¹¹ Mâm ƀư gâp mra sŏk piăng let, dak, jêh ri puăch gâp prăp ma phung blau kreh rsau biăp gay ăn ma phung mâu gĭt mbah ntŭk tă?”

¹² Phung ndăm Y-Đavit plơ̆ sĭt tât ta ntŭk pôih, khân păng nkoch bri lĕ rngôch nau nây ma Y-Đavit tăng.

¹³ Y-Đavit lah ma phung tĭng ndô̆ păng: “Ăn ăp nơm cheng đao păng!” Khân păng cheng đao păng nơm, Y-Đavit tâm ban đŏng cheng đao. Klăp lah tâm puăn rhiăng nuyh hăn hao tĭng Y-Đavit, hôm bar rhiăng nuyh gŭ ta aơ gay mât ndô ndơ.

¹⁴ Geh du huê oh mon mbơh nau nây ma H'Abigêl, ur Y-Nabal: “Y-Đavit geh prơh hăn phung mbơh tă bơh bri rdah văch tât mbah ma kôranh hên, ƀiălah Y-Nabal ngơi mhĭk ma khân păng.

¹⁵ Nanê̆, tâm năng nar hên gŭ êp phung nây tâm mir, khân păng ƀư ueh ngăn ma hên, mâu geh ƀư rkhŭk tât ôh ma hên, jêh ri mâu geh roh du ntil ndơ ôh.

¹⁶ Tâm nôk hên gŭ ndrel ma phung nây, chiăp mât njrăng phung biăp hên, nar jêh ri măng khân păng jêng nâm bu pêr jŭm hên.

¹⁷ Pôri aƀaơ, ăn ay gĭt mra ƀư moh nau, yorlah bu lĕ dăp nal jêh mra nkhŭt nau mhĭk ma kôranh hên jêh ri ma lĕ ngih vâl păng. Kôranh janh ƀai ngăn, mâu iăt nau ngơi bu ôh.”

¹⁸ H'Abigêl ndal sŏk bar rhiăng glo piăng let, bar nông ntâu ndrănh krăk ƀâu, prăm mlâm biăp kon nkuăng ƀư puăch jêh, klăp lah jât ma pơh kilô găr vâr, du rhiăng piăng let krăk ƀâu kro, jêh ri bar rhiăng glo ƀănh play rvi kro, n'gân klơ ndŭr kơi seh bri.

¹⁹ Jêh nây păng lah ma phung oh mon: “Hăn hom lor, gâp mra tĭng groi khân may.” Ƀiălah păng mâu lah du nau ôh ma Y-Nabal, sai păng.

²⁰ Nôk păng ncho seh bri hăn trŭnh tĭng trong ndâp pakơi yôk, ta aơ, Y-Đavit jêh ri phung tahan păng dôl hăn trŭnh tât ma mpeh păng, jêh ri păng tâm mâp đah phung nây.

²¹ Y-Đavit hŏ lah: “N'hêl nê̆, hŏt gar yơh, gâp sâm chiăp dơm dam lĕ rngôch mpô mpa bu klâu nây tâm bri rdah, kŏ tât mâu roh yot du ntil ndơ. Ƀiălah păng sŏk nau mhĭk gay mplơ̆ sĭt ma nau yô̆.

²² Ăn Brah Ndu nkra nơm tâm rdâng ma Y-Đavit! Ntơm bơh aƀaơ tât ôi taơ, gâp mâu mra ăn du huê bu klâu tâm phung Y-Nabal hôm rêh.”

²³ Tơlah mhe saơ Y-Đavit, H'Abigêl jŭr ndal tă klơ seh bri, chon mon ta neh jêh ri mbah panăp Y-Đavit.

²⁴ Păng yơk mbah tâm dâng jâng Y-Đavit jêh ri lah: “Hơi kôranh, tih mpeh gâp, mpeh gâp! Dăn ăn ma oh mon bu ur may, ngơi tra năp may, dăn iăt nau oh mon bu ur may ngơi.

²⁵ Dăn kôranh lơi rkêng tôr tât ta bunuyh janh ƀai nây jêng Y-Nabal, yorlah amoh săk păng tâm di ma păng nơm, jêh ri tâm păng geh nau brŭt rluk. Bi gâp, jêng oh mon bu ur may, mâu tâm mâp đah phung bu klâu kôranh hŏ prơh hăn jêh.

²⁶ Aƀaơ, hơi kôranh gâp, Brah Yêhôva nkân jêh ti kôranh mâu ƀư nau nkhŭt mham, jêh ri sŏk ti may nơm plơng har. Nanê̆ nâm bu Brah Yêhôva gŭ rêh mro mrăng jêh ri kôranh ăt hôm rêh, ăn phung rlăng jêh ri phung ŭch ƀư mhĭk ma kôranh gâp mra nâm bu Y-Nabal!

²⁷ Jêh ri aơ jêng ndơ nhhơr oh mon bu ur kôranh djôt leo ma kôranh gâp gay pă ăn ma phung tĭng ndô̆ kôranh gâp.

²⁸ Dăn yô̆ an nau tih ma oh mon bu ur kôranh! N'hêl nanê̆ Brah Yêhôva mra njêng ma kôranh gâp geh du ngih nâp, yorlah kôranh gâp tâm lơh ăn ma Brah Yêhôva, jêh ri lôch nau rêh kôranh mâu mra geh du nau mhĭk tâm may ôh.

²⁹ Tơlah geh nơm ŭch tĭng nhŭp may jêh ri joi nau ngroh lơi nau rêh kôranh, pôri Yêhôva Brah Ndu may mra nkŭm nau rêh kôranh; bi nau rêh phung rlăng may Brah Yêhôva mra klŭp mƀăr ngai nâm bu klŭp lŭ tă bơh ntâu rvĭt.

³⁰ Tơlah Brah Yêhôva hŏ ƀư jêh ma kôranh gâp lĕ rngôch nau ueh Păng hŏ ton jêh, jêh ri tơlah păng hŏ njêng may ƀư kôranh chiă uănh ma phung Israel,

³¹ ndă ma kôranh gâp mâu mra geh nau nhhuach, jêh ri mâu geh ôh nau nduyh bơh nuih n'hâm, yorlah hŏ lăn ƀư nau nkhŭt mham jêh ri ƀư êng nau plơng bôk! Jêh ri tơlah Brah Yêhôva ƀư nau yô̆ ma kôranh gâp, dăn kôranh kah gĭt ma oh mon bu ur may!”

³² Y-Đavit lah ma H'Abigêl: “Tâm rnê ngăn ma Yêhôva Brah Ndu phung Israel, yorlah nar aơ Păng prơh hăn jêh ay hăn tât tâm mâp đah gâp!

³³ Mât ton ma nau ay blau mĭn jêh ri ăn nau ueh uĭn ma ay, yorlah nar aơ ay hŏ nkân jêh gâp tă bơh nau ƀư nkhŭt mham jêh ri nkân ti gâp gay plơng har.

³⁴ Ƀiălah nanê̆ nâm bu Yêhôva Brah Ndu phung Israel jêng Nơm gŭ rêh mro mrăng, Nơm hŏ nkân gâp ƀư nau mhĭk ma ay, tơlah ay mâu gơnh văch tâm mâp ôh đah gâp, nanê̆ gâp mâu mra ăn du huê bu klâu tâm phung Y-Nabal hôm e rêh tât ta ôi taơ.”

³⁵ Jêh nây Y-Đavit dơn tă bơh ti H'Abigêl ndơ păng djôt leo ăn jêh ma păng, jêh ri păng lah: “Plơ̆ sĭt hom đăp mpăn ma ngih vâl ay. Uănh hom, gâp hŏ tăng jêh ay, jêh ri dơn jêh nau ay dăn.”

³⁶ H'Abigêl plơ̆ sĭt ma Y-Nabal. Aơ, Y-Nabal dôl ƀư nau nhêt sa tâm ngih păng, nâm bu nau nhêt sa ma hađăch. Y-Nabal răm maak ngăn tâm trôm nuih n'hâm jêh ri yorlah păng lĕ nhŭl ndrănh hâu ngăn jêh, pôri H'Abigêl mâu nkoch ôh du ntil ndơ ma păng, nđâp lah nau toyh mâu lah jê̆, kŏ tât kêng ang ôi.

³⁷ Ang ôi taơ, tơlah Y-Nabal lĕ kah rngăl aih nhŭl ndrănh, ur păng nkoch bri lĕ nau nây ƀư ăn ma play nuih Y-Nabal mâu hôm mpât ôh, păng jêng dăng nâm bu lŭ.

³⁸ Klăp lah jât nar jêh nây, Brah Yêhôva dong Y-Nabal, jêh ri păng khĭt.

³⁹ Tơlah Y-Đavit gĭt ma Y-Nabal lĕ khĭt jêh, păng lah: “Tâm rnê ngăn ma Brah Yêhôva, yorlah Păng hŏ koh dŏng jêh gâp ma nau Y-Nabal ƀư bêk prêng ma gâp, jêh ri mât mray jêh oh mon Păng tă bơh nau ƀư mhĭk! Brah Yêhôva ƀư ăn jêh ma nau djơh mhĭk Y-Nabal nkhŭt tay klơ bôk păng nơm!” Jêh nau nây, Y-Đavit prơh bunuyh hăn ôp H'Abigêl gay ăn păng jêng ur păng.

⁴⁰ Phung oh mon Y-Đavit tât ta ngih H'Abigêl ta yôk Karmel, jêh ri lah: “Y-Đavit prơh hên hăn ma ay ŭch sŏk ay jêng ur păng.”

⁴¹ Păng dâk păn muh măt ta neh jêh ri lah: “Aơ, oh mon bu ur kôranh mra jêng oh mon bu ur gay rao jâng ma phung oh mon kôranh gâp.”

⁴² Jêh nây H'Abigêl dâk ndal, ncho seh bri, jêh ri nđâp ma prăm nuyh oh mon bu ur hăn tĭng ma phung mbơh Y-Đavit, jêh ri jêng ur păng.

⁴³ Y-Đavit nsông tâm ban lĕ đah H'Ahinôam, bunuyh Jesrêel; lĕ bar hê khân păng jêng ur păng.

⁴⁴ Y-Sôl hŏ ăn H'Mikal, kon bu ur păng jêng ur Y-Đavit, ăn ma Y-Palti, kon bu klâu Y-Lais, bunuyh Galim.