I Samuel 24 - Nau Brah Ndu Ngơi 2023

Y-Đavit gŭ tâm trôm lŭ Êngêdi

¹ Y-Đavit hăn hao tă bơh ntŭk nây, hăn tât nde krap tâm lĕ ntŭk nâp jăp tâm nkual Êngêdi.

² Tơlah Y-Sôl lĕ sĭt jêh tă bơh tĭng rgot phung Philistin, bu mbơh ma păng: “Aơ, Y-Đavit gŭ tâm bri rdah Êngêdi”

³ Y-Sôl djôt leo pe rbăn nuyh tahan săch jêh tâm lĕ rngôch phung Israel, hăn joi gay nhŭp Y-Đavit jêh ri phung tĭng ndô̆ păng ta dor yôk lŭ Be Bri.

⁴ Y-Sôl hăn văch dăch ndrung biăp êp trong. Ta nây geh du trôm lŭ, Y-Sôl lăp ta nây gay hăn puk ndŭl. Nôk nây, Y-Đavit jêh ri phung tĭng ndô̆ păng dôl gŭ tâm glĕ dŭt trôm.

⁵ Phung tĭng ndô̆ Y-Đavit lah ma păng: “Aơ jêng nar Brah Yêhôva hŏ lah ma may: ‘Aơ, Gâp jao phung rlăng may tâm ti may. Lơh hom ma păng tĭng may ŭch.’” Ƀiălah Y-Đavit dâk, koh ntŭng ntôr ao rjai Y-Sôl.

⁶ Pônây, nuih n'hâm Y-Đavit nduyh êng păng nơm yor nau păng koh ntôr ao rjai hađăch Y-Sôl.

⁷ Păng lah ma phung tĭng ndô̆ păng: “Dăn Brah Yêhôva lơi ăn gâp ƀư tih đah kôranh gâp, jêng nơm Brah Yêhôva tŏ dak ƀâu kah, lơi ăn ti gâp pah ta păng, yorlah Y-Sôl jêng nơm Brah Yêhôva tŏ dak ƀâu kah.”

⁸ Y-Đavit lah lĕ nau ngơi nây gay nduyh phung tĭng ndô̆ păng, jêh ri buay khân păng lơi dĭng rduh lơh Y-Sôl. Bi Y-Sôl dâk hăn luh bơh trôm lŭ, jêh ri hăn tay trong păng.

⁹ Jêh ta nây Y-Đavit dâk, hăn luh bơh trôm lŭ nây tâm ban lĕ jêh ri kuăl Y-Sôl: “Hơi hađăch, kôranh gâp!” Y-Sôl n'gĭl pakơi păng nơm, Y-Đavit păn muh măt ta neh jêh ri mbah.

¹⁰ Y-Đavit lah ma Y-Sôl: “Mâm ƀư hađăch iăt nau bu lah pô aơ: ‘Y-Đavit joi ƀư mhĭk ma may?’

¹¹ Aơ, uănh hom! Măt may nơm lĕ saơ jêh nar aơ, tâm trôm lŭ, Brah Yêhôva hŏ jao jêh hađăch tâm ti gâp. Bu nsŭk gâp nkhĭt hađăch, ƀiălah gâp chalơi om hađăch, jêh ri lah: ‘Gâp mâu mra yơr ti ƀư mhĭk ma kôranh gâp ôh, yorlah hađăch jêng nơm Brah Yêhôva tŏ dak ƀâu kah jêh.’

¹² Pônây, hơi mbơ̆! Uănh hom ntôr ao rjai may tâm ti gâp. Yorlah gâp koh jêh ntôr ao rjai may, ƀiălah mâu nkhĭt may, dăn may gĭt hom jêh ri saơ pô aơ gâp mâu geh nau djơh mhĭk ôh, mâu lah nau ƀlêp ƀlêr ôh. Gâp mâu lĕ geh nau tih yorlah ƀư mhĭk ma may, bi may nkhơng ma ŭch nchron gâp gay ƀư ngroh lơi nau rêh gâp. Dăn Brah Yêhôva phat dôih ta klang gâp đah may.

¹³ Brah Yêhôva mra plơng bôk may jêh ri gâp; ƀiălah gâp mâu yơr ti ƀư ma may ôh.

¹⁴ Nâm bu nau hôr lah: ‘Nau djơh mhĭk luh tă bơh phung tih’, ƀiălah ti gâp mâu mra ƀư ôh ma mbơ̆ păng nơm.

¹⁵ Mbu hađăch phung Israel ŭch lơh? Mbu moh may ŭch tĭng? Du mlâm so khĭt! Du mlâm si so!

¹⁶ Lah pônây, Brah Yêhôva mra ƀư Nơm Phat Dôih gay phat dôih may đah gâp; Păng mra sek uănh, koh dŏng nau di jêh ri tâm rklaih gâp tă bơh ti may.”

¹⁷ Tơlah Y-Đavit ngơi nau nây lĕ lôch jêh, Y-Sôl lah: “Hơi Y-Đavit, kon gâp, di lĕ bâr may?” Y-Sôl nter nhĭm.

¹⁸ Păng lah ma Y-Đavit: “May jêng sŏng srăng lơn ma gâp, yorlah may sŏk nau ueh gay mplơ̆ sĭt nau mhĭk gâp hŏ ƀư jêh ma may.

¹⁹ Nar aơ, may hŏ mpơl jêh pô aơ may ƀư nau ueh ma gâp; yorlah Brah Yêhôva hŏ jao gâp tâm ti may, ƀiălah may mâu geh nkhĭt gâp ôh.

²⁰ Tơlah du huê bunuyh tâm mâp đah rlăng păng, păng om lĕ rlăng păng hăn đăp mpăn? Dăn ma Brah Yêhôva sŏk nau ueh mplơ̆ sĭt ma may tĭng nâm nau may ƀư jêh ma gâp nar aơ!

²¹ Aƀaơ, gâp gĭt ngăn may mra jêng hađăch, jêh ri ƀon bri hađăch Israel mra nâp jŏ tâm ti may.

²² Pôri, ma amoh Brah Yêhôva sơm ton ma gâp pô aơ may mâu mra ƀư rai ôh noi deh gâp, jêh ri mâu lĕ mra jut lơi amoh săk gâp tă bơh ngih chô yau gâp.”

²³ Y-Đavit sơm ton nau nây ma Y-Sôl. Jêh ri Y-Sôl plơ̆ sĭt ma ngih păng nơm; bi Y-Đavit jêh ri phung tahan păng plơ̆ sĭt ma pôih păng.