I Samuel 23 - Nau Brah Ndu Ngơi 2023

Y-Đavit rklaih ƀon Keila

¹ Bu văch mbơh ma Y-Đavit: “Ri, phung Philistin hăn lơh ƀon Keila jêh ri pit sŏk lĕ ntŭk mprah ba.”

² Y-Đavit ôp ma Brah Yêhôva: “Gâp mra hăn tâm lơh đah phung Philistin aơ lĕ?” Brah Yêhôva lah ma Y-Đavit: “Hăn tâm lơh hom đah phung Philistin jêh ri tâm rklaih ƀon Keila.”

³ Ƀiălah, phung hăn tĭng Y-Đavit lah: “Gŭ ta aơ, tâm n'gor Yuđa, hên klach ngăn, rlau lơn ma nây hăn tât ta Keila gay tâm lơh đah phung Philistin!”

⁴ Y-Đavit ôp tay ma Brah Yêhôva, jêh ri Brah Yêhôva plơ̆ lah ma păng: “Dâk hom, hăn trŭnh ma Keila, Gâp mra jao phung Philistin tâm ti may.”

⁵ Pônây, Y-Đavit nđâp ma phung hăn tĭng păng tât ma Keila, tâm lơh đah phung Philistin, nhŭp lĕ mpô mpa rong khân păng, jêh ri ƀư ma khân păng khĭt âk ngăn. Pôri Y-Đavit tâm rklaih jêh phung ƀon Keila.

⁶ Tơlah kon Y-Ahimalek jêng Y-Abiathar, nchuăt du krap ndrel ma Y-Đavit, păng geh djôt du êphôt, jêh ri ndrel ma Y-Đavit hăn tât ta Keila.

⁷ Bu mbơh ma Y-Sôl nau Y-Đavit lĕ tât jêh ta Keila. Y-Sôl lah: “Brah Ndu hŏ jao jêh păng tâm ti gâp, yorlah păng hŏ krŭng păng nơm nôk păng hăn lăp tâm ƀon geh mpông ndâl jêh ri rnăng nđăng.”

⁸ Y-Sôl kuăl lĕ rngôch phung tahan, hăn trŭnh ma Keila, nchueng jŭm Y-Đavit jêh ri phung tahan hăn tĭng păng.

⁹ Ƀiălah Y-Đavit gĭt pô aơ Y-Sôl chră ŭch ƀư mhĭk ma păng, păng lah ma kôranh ƀư brah Y-Abiathar: “Djôt leo hom êphôt văch ta aơ.”

¹⁰ Jêh nây Y-Đavit ôp: “Ơ Yêhôva Brah Ndu phung Israel, n'hêl nê̆ ngăn oh mon may hŏ tăng jêh nau Y-Sôl; joi ŭch hăn văch tât ma ƀon Keila, ŭch ƀư rai lơi ƀon nây yor ma gâp.

¹¹ Phung ƀon lan Keila jao gâp tâm ti Y-Sôl lĕ? Y-Sôl mra hăn trŭnh di nâm nau oh mon Kôranh Brah hŏ tăng nây lĕ? Ơ Brah Yêhôva, Brah Ndu phung Israel, dăn mbơh hom nau nây ma oh mon Kôranh Brah.” Brah Yêhôva lah: “Y-Sôl mra hăn trŭnh.”

¹² Y-Đavit ôp tay: “Phung ƀon lan Keila jao gâp jêh ri phung tĭng ndô̆ gâp tâm ti Y-Sôl lĕ?” Brah Yêhôva lah: “Khân păng mra jao khân may.”

¹³ Pôri, Y-Đavit, jêh ri phung hăn tĭng păng, geh tâm prao rhiăng nuyh, dâk nchuăt tă bơh Keila, jêh ri khân păng hăn ta bơh ntŭk nây tât ntŭk êng. Tơlah bu mbơh nau Y-Đavit nchuăt du jêh tă bơh Keila, Y-Sôl mâu hôm leo phung tahan hăn tĭng ôh.

Y-Đavit gŭ tâm bri rdah Sip jêh ri Maôn

¹⁴ Y-Đavit gŭ tâm lĕ ntŭk nâp jăp tâm bri rdah klơ tâm n'gor dor yôk bri rdah Sip. Y-Sôl tĭng nhŭp păng ăp nar, ƀiălah Brah Ndu mâu jao păng tâm ti Y-Sôl ôh.

¹⁵ Y-Đavit tăng nau Y-Sôl leo phung tahan păng gay joi nau rêh păng ri mơ păng gŭ ta Hêres tâm bri rdah Sip.

¹⁶ Nôk nây Y-Jônathan, kon Y-Sôl, hăn trong văch ma Y-Đavit ta Hêres, kơl păng nâp nuih n'hâm, rnơm nsing ma Brah Ndu.

¹⁷ Y-Jônathan lah: “Lơi klach ôh, yorlah ti mbơ̆ gâp jêng Y-Sôl mâu mra pah ma may ôh. May mra jêng hađăch phung Israel, bi gâp mra jêng kôranh chiă uănh ma may. Y-Sôl, mbơ̆ gâp, gĭt đŏng rah vah kơt nĕ.”

¹⁸ Bar hê khân păng ƀư nau tâm rnglăp tanăp Brah Yêhôva. Jêh nây Y-Đavit gŭ ta Hêres, bi Y-Jônathan plơ̆ sĭt ta ngih păng nơm.

¹⁹ Phung Sip hăn hao ma Y-Sôl ta Gibêa, jêh ri lah: “Y-Đavit du krap ta nklang hên tâm lĕ ntŭk pôih tâm bri Hêres nâp ngăn, ta gôl Hakila, mpeh rđŭng bri rdah.

²⁰ Pôri aƀaơ, dăn hađăch hăn trŭnh hom tĭng nâm lĕ nau nuih n'hâm may ŭch. Bi hên mra jao păng tâm ti hađăch.”

²¹ Y-Sôl lah: “Dăn ma Brah Yêhôva ăn nau ueh uĭn ma khân may, yor khân may geh nuih n'hâm yô̆ nđach ma gâp!

²² Hăn hom sek uănh gay gĭt n'hêl nanê̆ rlau lơn ma ntŭk păng gŭ, jêh ri mbu moh lĕ saơ păng ta nây; yorlah bu mbơh ma gâp păng blau plĕch ngăn.

²³ Khân may sek uănh hom jêh ri joi gay gĭt ăp ntŭk păng du krap, jêh nây plơ̆ sĭt mbơh tay ma gâp ăn di. Nôk nây taơ gâp mra hăn ndrel ma khân may. Tơlah păng gŭ tâm nkual n'gor gâp mra joi păng tâm rnăk vâl phung Yuđa.”

²⁴ Khân păng hăn trong plơ̆ sĭt tât Sip panăp Y-Sôl. Bi Y-Đavit jêh ri phung tĭng ndô̆ păng gŭ tâm bri rdah Maôn, ta Arabah tâm mpeh rđŭng bri rdah.

²⁵ Y-Sôl jêh ri phung tĭng ndô̆ păng hăn joi Y-Đavit. Bu mbơh nau nây ma Y-Đavit, păng hăn trŭnh ta ntŭk lŭ tâm bri rdah Maôn. Tơlah Y-Sôl gĭt jêh pônây păng tĭng rgot Y-Đavit tâm bri rdah Maôn.

²⁶ Y-Sôl hăn hao pŭng yôk đah aơ, bi Y-Đavit jêh ri phung tahan păng hăn pŭng yôk đah ri. Y-Đavit nchuăt du ndal gay klaih bơh Y-Sôl. Ƀiălah dôl Y-Sôl jêh ri phung tahan păng nchueng jŭm gay nhŭp Y-Đavit jêh ri phung tĭng ndô̆ păng,

²⁷ geh du huê văch tât mbơh ma Y-Sôl: “Dăn hađăch plơ̆ sĭt hom gơnh, yorlah Philistin hŏ văch rvan n'gor he.”

²⁸ Y-Sôl mâu hôm tĭng Y-Đavit gay hăn lơh phung Philistin. Yor nây, bu ntơ ntŭk aơ jêng Lŭ Tâm Rnglah.