I Samuel 22 - Nau Brah Ndu Ngơi 2023

Y-Đavit gŭ tâm trôm lŭ Adulam jêh ri tâm n'gor Môap

¹ Y-Đavit hăn tă bơh n'gor Gat jêh ri du krap tâm trôm lŭ Adulam. Tơlah phung nâu păng jêh ri lĕ rnăk vâl mbơ̆ păng tăng nau nây, khân păng hăn trŭnh ma păng ta ntŭk nây.

² Lĕ rngôch phung geh nau uh ah, khan rnon bu, jêh ri mâu maak ôh, rƀŭn da dê gŭ jŭm păng, jêh ri păng jêng kôranh chiă uănh ma khân păng. Geh klăp lah puăn rhiăng nuyh hăn tĭng păng.

³ Ntơm bơh ntŭk nây, Y-Đavit hăn tât Mispê, tâm n'gor Môap, păng lah ma hađăch n'gor Môap: “Dăn ăn mê̆ mbơ̆ gâp gŭ ndrel ma khân may kŏ tât gâp gĭt nau Brah Ndu mra ƀư ma gâp.”

⁴ Y-Đavit leo mê̆ mbơ̆ păng tât tâm mâp đah hađăch Môap, jêh ri khân păng gŭ ta aơ ndrel ma hađăch Môap lĕ năng nar Y-Đavit gŭ tâm trôm pôih.

⁵ Ƀiălah nơm mbơh lor Y-Gat lah ma Y-Đavit: “Lơi hôm dĭng gŭ ôh tâm pôih; hăn hom tât ta n'gor Yuđa.” Pôri Y-Đavit hăn du luh jêh ri tât ta bri krŏng Hêret.

Y-Saul nkhĭt phung kôranh ƀư brah jêh ri phung ƀon lan ƀon Nôp

⁶ Y-Sôl tăng jêh nau bu joi saơ jêh Y-Đavit jêh ri phung ndrel ma păng. Nôk nây taơ, Y-Sôl dôl gŭ tâm dâng tơm si yôr ta du dor prêh ta Gibêa, ti djôt tak, jêh ri lĕ rngôch phung oh mon păng dâk jŭm tanăp păng.

⁷ Y-Sôl lah ma phung oh mon dâk jŭm êp păng: “Hơi phung Benjamin, iăt hom! Di lĕ kon Y-Yêsê mra ăn lĕ ma khân may lĕ mir jêh ri đang krăk ƀâu? Khân may kâp gân păng mra n'hao kan ma khân may jêng kôranh chiă uănh toyh ma rbăn nuyh jêh ri ma rhiăng nuyh lĕ?

⁸ Pônây, mâm dĭng lĕ rngôch khân may geh nau ndơm tâm rdâng đah gâp, jêh ri mâm dĭng mâu ăn gâp gĭt ma kon bu klâu gâp hŏ ƀư tâm rnglăp đah kon bu klâu Y-Yêsê? Mâm dĭng mâu yô̆ nđach ma gâp, ăn gâp gĭt lor ma kon bu klâu gâp nsŭk nsôr jêh oh mon gâp tâm rdâng đah gâp, tâm chră ŭch ƀư mhĭk ma gâp, nâm bu păng hŏ ƀư nar aơ?”

⁹ Rnôk nây, Y-Dôek jêng du huê Êđôm, dôl dâk êp ma phung oh mon Y-Sôl, lah: “Gâp hŏ saơ jêh kon bu klâu Y-Yêsê hăn rlet ma Nôp, lăp ngih Y-Ahimalek, kon bu klâu Y-Ahitup.

¹⁰ Y-Ahimalek ôp Brah Yêhôva yor păng, ăn ndơ sông sa ma păng, jêh ri ăn ma păng đao Y-Gôliat, bu klâu Philistin.”

¹¹ Hađăch prơh bu hăn kuăl kôranh ƀư brah Y-Ahimalek, kon Y-Ahitup, nđâp lĕ rnăk vâl păng, jêng phung kôranh ƀư brah gŭ ta Nôp. Lĕ rngôch khân păng hăn da dê tât ma hađăch.

¹² Y-Sôl lah: “Hơi kon bu klâu Y-Ahitup, gŭ iăt hom!” Y-Ahimalek plơ̆ lah: “Hơi kôranh gâp, gâp ta aơ.”

¹³ Y-Sôl lah tay: “Mâm ƀư may du ai tâm chră jêh ndrel ma kon Y-Yêsê ŭch tâm rdâng đah gâp? May geh ăn piăng let ma păng jêh ri njŭn ma păng du n'gâr đao, jêh ri ôp jêh ma Brah Ndu yor păng, gay ma păng tâm rdâng đah gâp, mĭn ŭch ƀư mhĭk ma gâp, nâm bu păng hŏ ƀư jêh nar aơ?”

¹⁴ Y-Ahimalek lah ma hađăch: “Tâm mpôl phung oh mon may, mbu nơm jêng răp jăp nâm bu Y-Đavit, nơm jêng klay ma hađăch, jêh ri kôranh chiă uănh ma phung tahan gak njrăng may, jêh ri nơm bu yơk lơn tâm ngih may?

¹⁵ Di lĕ nar aơ gây ntơm ôp jêh ma Brah Ndu yor păng? Mâu geh ƀư pônây ôh! Dăn hađăch lơi đing nau tih nây ma oh mon hađăch mâu lah ma bunuyh êng tâm ngih mbơ̆ gâp ma ăp nau, yorlah oh mon hađăch mâu gĭt du ntil ôh, djê̆ mâu lah âk ma nau nây.”

¹⁶ Hađăch lah: “Hơi Y-Ahimalek, may jêh ri lĕ rngôch ngih vâl mbơ̆ may khĭt da dê!”

¹⁷ Hađăch lah ma phung tahan gak dâk jŭm păng: “Văch dăch hom jêh ri nkhĭt lơi lĕ rngôch phung kôranh ƀư brah Brah Yêhôva, yorlah khân păng kơl Y-Đavit, gĭt jêh păng lĕ du ƀiălah mâu ŭch mbơh ăn ma gâp gĭt.” Ƀiălah phung tahan gak hađăch mâu ŭch ôh yơr ti khân păng gay nkhĭt phung kôranh ƀư brah Brah Yêhôva.

¹⁸ Yor ri, hađăch lah ma Y-Dôek: “May văch dăch hom jêh ri nkhĭt phung kôranh ƀư brah.” Y-Dôek, bunuyh Êđôm, rduh dăch nkhĭt phung kôranh ƀư brah. Tâm nar nây, păng nkhĭt pham jât ma prăm nuyh nsoh êphôt ƀư ma brai mhay.

¹⁹ Y-Sôl sŏk đŏng đao nkhĭt phung ƀon lan Nôp, ƀon phung kôranh ƀư brah; ntơm bơh bu ur, bu klâu, kon se, phung kon hôm pu, lĕ ndrôk, seh bri, jêh ri biăp, lĕ rngôch păng nkhĭt ma đao da dê.

²⁰ Ƀiălah du huê tâm phung kon bu klâu Y-Ahimalek, sau Y-Ahitup, amoh Y-Abiathar, klaih jêh ri hăn tĭng ndô̆ Y-Đavit.

²¹ Y-Abiathar mbơh ma Y-Đavit nau Y-Sôl lĕ nkhĭt jêh phung kôranh ƀư brah Brah Yêhôva.

²² Y-Đavit lah ma Y-Abiathar: “Gâp gĭt jêh Y-Dôek, bunuyh Êđôm, geh măt ta aơ tâm nar nây, nanê̆ păng mra mbơh ma Y-Sôl. Nau nây yor ma gâp, lĕ rngôch ngih vâl mbơ̆ may lĕ khĭt da dê.

²³ Gŭ hom ndrel ma gâp, lơi klach ôh! Yorlah mbu joi nau ƀư mhĭk ma nau rêh may jêng joi nau ƀư mhĭk đŏng ma nau rêh gâp. Gŭ ndrel ma gâp, may mra dơi geh nau đăp mpăn.”