I Samuel 21 - Nau Brah Ndu Ngơi 2023

Y-Đavit gŭ ta Nôp jêh ri Gat

¹ Y-Đavit hăn tât ta ƀon Nôp, tâm mâp ma kôranh ƀư brah Y-Ahimalek. Y-Ahimalek hăn văch tâm mâp ma Y-Đavit, klach sâr jêh ri ôp: “Mâm ƀư may hăn êng du huê mâu geh nuyh hăn ndrel ma may?”

² Y-Đavit plơ̆ lah ma kôranh ƀư brah Y-Ahimalek: “Hađăch prơh gâp hăn geh du ntil kan jêh ri ntĭnh pô aơ: ‘Lơi ăn du huê bunuyh gĭt ôh ma nau gâp prơh may hăn, lơi ăn mbu gĭt nau gâp ntăm jêh ma may.’ Gâp hŏ tâm nal jêh mra tâm mâp đah phung bu klâu ndăm ta du ntŭk ri.

³ Aƀaơ ri, may geh ndơ sa? Ăn ma gâp prăm glo piăng let mâu lah moh ndơ sông sa êng may geh.”

⁴ Kôranh ƀư brah plơ̆ sĭt lah đŏng ma Y-Đavit: “Gâp mâu geh ôh piăng let vay sa, knŏng geh lĕ piăng let kloh ueh dơm hôm e; iăt ma phung bu klâu ndăm may ver lơi gŭ ndrel ma bu ur.”

⁵ Y-Đavit plơ̆ lah đŏng ma kôranh ƀư brah: “Hŏ bar pe nar jêh, tă bơh gâp hăn, hên mâu mâp gŭ ndrel ma bu ur ôh. Tĭng nâm nau gâp vay ƀư tơlah gâp hăn nsong, phung bu klâu gâp mât đŏng săk jăn kloh ueh, rlau lơn ma nar aơ mâm ƀư khân păng mâu mra mât khân păng nơm kloh ueh?”

⁶ Jêh nây kôranh ƀư brah ăn piăng let kloh ueh ma păng, yorlah ta nây mâu geh ôh piăng let êng padih piăng let nhhơr hŏ dơm jêh tanăp Brah Ndu, bu sŏk tă bơh tanăp Brah Yêhôva gay tâm rgâl đah piăng let mhe tâm nar bu rgâl piăng let ơm.

⁷ Tâm ban lĕ tâm nar nây, geh du huê oh mon Y-Sôl gŭ ta nây, bu krŭng păng tanăp Brah Yêhôva. Amoh păng Y-Dôek, bunuyh Êđôm, kôranh ma phung rmăk biăp Y-Sôl.

⁸ Y-Đavit ôp ma Y-Ahimalek: “May mâu geh hĕ ta aơ du n'gâr tak mâu lah du n'gâr đao? Gâp mâu geh djôt leo đao ôh mâu lah ndơ tâm lơh ndrel ma gâp, yorlah nau ntăm hađăch ndal ngăn!”

⁹ Kôranh ƀư brah lah: “Aơ geh đao Y-Gôliat, bu klâu Philistin, nơm may hŏ nkhĭt jêh tâm rlŭng Êlah; bu put đao nây ma du bok, dơm pakơi êphôt. Tơlah may ŭch sŏk păng, sŏk hom, yorlah ta aơ, mâu hôm geh đao êng ôh.” Y-Đavit lah: “Mâu geh ôh đao tâm ban ma nây! May ăn hom đao nây ma gâp.”

Y-Đavit du tât ta Gat

¹⁰ Tâm nar nây, Y-Đavit hăn du luh tă bơh Y-Sôl. Păng hăn tâm mâp đah Y-Akis, hađăch ƀon Gat.

¹¹ Phung oh mon Y-Akis ôp: “Di lĕ nây jêng Y-Đavit, hađăch ma bri aơ? Mâu di hĕ bu mprơ răm maak bunuyh aơ tâm nôk pâl ntalơ̆: ‘Y-Sôl nkhĭt jêh âk rbăn nuyh, Bi Y-Đavit nkhĭt jêh âk rbăn nuyh?’”

¹² Y-Đavit mĭn lĕ nau ngơi nây, jêh ri păng klach ngăn ma Y-Akis, hađăch ƀon Gat.

¹³ Păng jan ƀư brŭt tanăp khân păng, jan ƀư rluk ta nklang khân păng; păng kach nchih ta mpông pêr jêh ri păng ƀư hor dak diu ta têp păng.

¹⁴ Y-Akis lah ma phung oh mon păng nơm: “Aơ, khân may saơ păng brŭt rluk jêh, mâm ƀư khân may leo păng tât ta gâp?

¹⁵ Gâp mâu joi ôh phung brŭt dĭng khân may leo bu klâu nây ƀư brŭt tanăp gâp? Mâm ƀư du huê nơm kơt nĕ dơi lăp tâm ngih gâp?”