I Samuel 20 - Nau Brah Ndu Ngơi 2023

Y-Đavit jêh ri Y-Jônathan ƀư tâm rnglăp

¹ Y-Đavit du tă bơh Naiôt tâm Rama, văch ma Y-Jônathan, jêh ri ôp: “Moh nau gâp hŏ ƀư? Moh nau dĭng gâp jêng tih? Moh nau tih gâp hŏ ƀư tih jêh đah mbơ̆ may, kŏ tât păng joi nkhĭt gâp?”

² Y-Jônathan plơ̆ lah ma păng: “Mâu di kơt ri ôh! May mâu khĭt ôh. Mbơ̆ gâp mâu ƀư ôh du ntil nau, nđâp lah toyh mâu lah jê̆, păng vay mbơh lor ma gâp. Pônây, mâm dĭng mbơ̆ gâp pôn nau nây ma gâp? Nau nây mâu di ôh!”

³ Ƀiălah Y-Đavit sơm ton jêh ri lah: “Mbơ̆ may gĭt rah vah jêh ma gâp geh nau yô̆ tanăp măt may, pôri păng mĭn êng: ‘Lơi ăn Y-Jônathan gĭt ôh nau nây, klach lah păng rngot!’ Ƀiălah, tĭng nâm Brah Yêhôva gŭ rêh mro mrăng jêh ri tĭng nâm may ăt hôm rêh, nanê̆ ngăn vah vang gâp jêh ri đah nau khĭt knŏng hôm ƀah du nhuat.”

⁴ Y-Jônathan lah ma Y-Đavit: “Moh nau may ŭch, gâp mra ƀư ăn may.”

⁵ Y-Đavit plơ̆ sĭt lah ma Y-Jônathan: “Aơ, ôi taơ jêng nar rƀŭn khay mhe, gâp gŭ sông sa n'hanh du sưng ndrel hađăch. Ƀiălah dăn ma gâp du krap tâm mir ăn tât kêng măng nar tal pe.

⁶ Tơlah mbơ̆ may gĭt gâp ndŭt jêh, mbơh hom ma păng pô aơ: ‘Y-Đavit vơl dăn ma gâp ăn păng hăn sĭt ma Ƀêtlêhem, ƀon tơm păng nơm, yorlah gŭ ta nây lĕ rngôch băl mpôl păng nhhơr mpa ƀư brah tâm ăp năm.’

⁷ Tơlah păng plơ̆ lah: ‘Ueh jêh!’ pôri oh mon may mra dơi nau đăp mpăn. Bi tơlah păng ji nuih, gĭt hom pô aơ păng mĭn ŭch ƀư mhĭk ma gâp.

⁸ Pônây, mpơl hom nau ueh ma oh mon may, yorlah may hŏ sŏk amoh Brah Yêhôva gay ƀư tâm rnglăp đah oh mon may. Tơlah moh nau tih geh tâm gâp, ăn may nơm nkhĭt hom gâp, ƀiălah mâm ƀư may njŭn leo gâp tât ma mbơ̆ may?”

⁹ Y-Jônathan lah: “Dăn may lơi mĭn pônây ôh! Ƀiălah, tơlah gâp gĭt mbơ̆ gâp ŭch ƀư mhĭk ma may, mâm ƀư gâp mâu ăn ma may gĭt?”

¹⁰ Y-Đavit ôp ma Y-Jônathan: “Ƀiălah tơlah mbơ̆ may plơ̆ lah ma may ma nau ji nuih hâu ngăn jêh ri mbu nơm mra mbơh ma gâp gĭt?”

¹¹ Y-Jônathan lah ma Y-Đavit: “Kay lŏng, he hăn luh ta mir.” Lĕ bar hê khân păng hăn leo ta mir.

¹² Y-Jônathan lah ma Y-Đavit: “Dăn ma Yêhôva Brah Ndu Israel, jêng Nơm mbơh! Ôi taơ mâu lah ôi nklak, di mông aơ, gâp mra ôp suơ̆ nau mĭn ŭch mbơ̆ gâp. Tơlah gĭt mâu geh nau klach krit ma may, gâp mâu prơh ôh bunuyh êng hăn tât mbơh ma may gĭt;

¹³ bi tơlah mbơ̆ gâp sŏl ko ƀư mhĭk ma may, gâp mra ăn may gĭt lor, ăn may du, jêh ri may mra hăn đăp mpăn. Tơlah mâu, dăn ma Brah Yêhôva rmal jâk jêr ma Y-Jônathan! Dăn ma Brah Yêhôva gŭ ndrel ma may, nâm bu Păng hŏ gŭ ndrel ma mbơ̆ gâp!

¹⁴ Tơlah gâp hôm rêh, dăn may sŏk nau ueh Brah Yêhôva gay ƀư ueh ma gâp. Bi tơlah gâp khĭt,

¹⁵ nđâp lah Brah Yêhôva ƀư rai lĕ rngôch phung rlăng Y-Đavit tă bơh klơ neh ntu kŏ tât lôch, pôri lơi ta ƀư roh nau yô̆ an ma ngih vâl gâp kŏ tât ƀaƀơ n'ho ro tâm ban lĕ.”

¹⁶ Tâm ban pônây, Y-Jônathan ƀư nau tâm rnglăp đah ngih Y-Đavit pô aơ: “Brah Yêhôva mra plơng har ma phung rlăng Y-Đavit.”

¹⁷ Yorlah rŏng ma Y-Đavit, Y-Jônathan ăn Y-Đavit sơm ton đŏng, yor nau Y-Jônathan rŏng ma Y-Đavit nâm bu păng nơm.

¹⁸ Y-Jônathan lah tay: “Ôi taơ jêng nar rƀŭn khay mhe, bu mra gĭt may ndŭt măt, yorlah rnơl may gŭ mra nsoih.

¹⁹ Nar nklak, hăn trŭnh hom gơnh, tât ntŭk may hŏ krap nar lor, jêng nar tât geh nau nây, jêh ri may mra gŭ kâp êp lŭ Êser.

²⁰ Gâp mra pănh pe mlâm hăr mpeh ta lŭ nây nâm bu pănh ta du ndơ pla.

²¹ Jêh nây gâp mra prơh hăn oh mon gâp, jêh ri lah ma păng: ‘Hăn dônh hom lĕ hăr nây!’ Tơlah gâp lah ma păng: ‘Ri, lĕ hăr gŭ mpeh đah aơ ntŭk may, sŏk dônh hom!’ Nôk nây ăn may văch yơh, nanê̆ ngăn nâm Brah Yêhôva gŭ rêh mro mrăng, lĕ nau đăp mpăn da dê yơh ma may, mâu geh nau klach krit ôh!

²² Ƀiălah tơlah gâp lah ma nơm oh mon ndăm: ‘Ri, lĕ hăr gŭ mpeh đah ri ntŭk may.’ Nôk nây may du hom, yorlah Brah Yêhôva prơh may du jêh.

²³ Bi ma nau he ngơi jêh ndrăng he, mbơh sơm Brah Yêhôva ƀư nau mbơh vah vang may ndrel gâp kŏ tât ƀaƀơ n'ho ro.”

²⁴ Pôri, Y-Đavit du krap tâm mir. Tơlah tât nar rƀŭn khay mhe, hađăch sông sa ta sưng păng;

²⁵ hađăch gŭ ta rnơl vay gŭ êp mpir. Y-Jônathan dâk, jêh ri Y-Apner gŭ mpeh ta meng Y-Sôl; bi ntŭk Y-Đavit jêng nsoih.

²⁶ Nar nây, Y-Sôl mâu ngơi du tong ôh yorlah păng mĭn pô aơ: “Geh nau mâu ueh hŏ tât ma păng jêh! Păng mâu geh kloh ôh, n'hêl nê̆ păng hŏ geh nau ƀơ̆ ƀơch jêh.”

²⁷ Ƀiălah nar tal bar nar rƀŭn khay mhe, ntŭk Y-Đavit jêng nsoih. Y-Sôl ôp ma Y-Jônathan, kon bu klâu păng: “Mâm ƀư nđaơ jêh ri nar aơ kon bu klâu Y-Yêsê mâu hăn văch ma nau sông sa?”

²⁸ Y-Jônathan plơ̆ lah ma Y-Sôl: “Y-Đavit vơh vơl jêh ma gâp ăn păng hăn sĭt ma Ƀêtlêhem.

²⁹ Păng lah: ‘Ăn gâp hăn, yorlah ndŭl mpôl gâp nhhơr mpa ƀư brah tâm ƀon jêh ri nâu gâp ntĭnh jêh ma gâp hăn sĭt ta nây, Pôri aƀaơ, tơlah gâp geh nau yô̆ tanăp măt may, ăn gâp hăn ro tât ta nây, gay tâm khâl ma phung nâu gâp.’ Yor ri, Y-Đavit mâu văch gŭ sông sa ôh ndrel ma hađăch.”

³⁰ Nôk nây, Y-Sôl hao ji nuih ngăn ma Y-Jônathan, jêh ri lah: “May jêng nơm kon tih mhĭk jêh ri mâu gŭ răp jăp! Gâp mâu gĭt hĕ ma may lĕ ƀư băl đah kon Y-Yêsê, ƀư bêk prêng ma may nơm, jêh ri ƀư bêk prêng ma mê̆ may hŏ deh may?

³¹ Nanê̆ ngăn, ndah ir jŏ kon Y-Yêsê hôm rêh ta neh ntu, may mâu lah ƀon bri hađăch may mâu lĕ mra jêng nâp ktang! Pôri aƀaơ, prơh hom bunuyh hăn joi păng, njŭn leo păng sĭt ma gâp! Yorlah n'hêl nê̆ păng mra khĭt!”

³² Y-Jônathan ngơi ma Y-Sôl, mbơ̆ păng: “Mâm ƀư Y-Đavit mra khĭt? Moh nau păng hŏ ƀư jêh?”

³³ Y-Sôl rjăng tak gay ntâp ma Y-Jônathan, jêh ri Y-Jônathan lĕ gĭt jêh ma mbơ̆ păng lĕ mĭn jêh ŭch nkhĭt Y-Đavit.

³⁴ Y-Jônathan dâk tă bơh sưng sông sa, ji nuih ngăn! Jêh ri tâm nar tal bar nau rƀŭn khay mhe, păng mâu sông sa ôh, rngot ngăn yor Y-Đavit, yorlah mbơ̆ păng hŏ ƀư bêk prêng ma Y-Đavit.

³⁵ Ang ôi taơ, Y-Jônathan hăn luh ta mir tât ta ntŭk hŏ tâm nal jêh đah Y-Đavit; geh du huê oh mon ndăm ndrel ma păng.

³⁶ Păng lah ma păng: “Nchuăt hom dônh lĕ hăr gâp mra pănh.” Nơm oh mon nây nchuăt, Y-Jônathan pănh du hăr ngai lơn ma păng.

³⁷ Tơlah bu klâu ndăm nây tât ta ntŭk geh hăr Y-Jônathan hŏ pănh jêh, Y-Jônathan nter: “Mâu di hĕ hăr ngai lơn ma may?”

³⁸ Y-Jônathan lah tay bu klâu ndăm nây: “Hăn gơnh, lơi hôm gŭ ôh!” Nơm oh mon Y-Jônathan dônh hăr, jêh nây plơ̆ tay ma kôranh păng.

³⁹ Ƀiălah bu klâu ndăm mâu dơi gĭt vât ôh, knŏng Y-Jônathan jêh ri Y-Đavit dơm gĭt nau nây.

⁴⁰ Y-Jônathan ăn ndơ tâm lơh păng ma oh mon păng, jêh ri lah: “Hăn hom, njŭn ndơ aơ rlet ma ƀon.”

⁴¹ Tơlah nơm oh mon nây hăn jêh, Y-Đavit dâk ta bơh mpeh rđŭng, chŭn muh măt ta neh pe tơ̆, jêh nây bar hê khân păng tâm ut chŭm ndrăng khân păng jêh ri nhĭm, Y-Đavit nhĭm hâu lơn.

⁴² Y-Jônathan lah ma Y-Đavit: “Hăn hom đăp mpăn! He hŏ sŏk jêh amoh Brah Yêhôva gay njêng nau sơm ton ndrăng he pô aơ: ‘Brah Yêhôva mra ƀư nau mbơh vah vang may đah gâp, vah vang noi deh gâp đah noi deh may kŏ tât ƀaƀơ n'ho ro.’”

⁴³ Pônây, Y-Đavit dâk jêh ri hăn, bi ma Y-Jônathan plơ̆ sĭt rlet ma ƀon.