I Samuel 2 - Nau Brah Ndu Ngơi 2023

Nau mprơ H'Anna

¹ Rnôk nây H'Anna mbơh sơm: “Nuih n'hâm gâp hâk răm ngăn tâm Brah Yêhôva, Tă bơh Brah Yêhôva, n'hâm suan gâp dăng ktang. Trôm mbung gâp gơm mưch ma phung rlăng gâp; Yorlah nau May tâm rklaih ƀư ma gâp răm rhơn.

² Mâu geh ôh nơm kloh ueh nâm bu Brah Yêhôva; Mâu hôm geh Brah êng ôh rlau ma May! Mâu geh ôh lŭ toyh nâm bu Brah Ndu he.

³ Găp hơi, lơi hôm ngơi lĕ rngôch nau sưr! Lơi dĭng ăn ôh lĕ nau ngơi ƀlăch ƀlêr luh du tă bơh bâr mbung khân may! Yorlah Brah Yêhôva jêng Brah Ndu gĭt lĕ rngôch, Păng veh njing lĕ rngôch kan bu ƀư.

⁴ Na phung tahan janh ktang lĕ đoh jêh, Ƀiălah phung ra-ai vân nau ktang.

⁵ Phung lĕ hơm jêh pah kan bu nkhôm gay geh piăng let, Ƀiălah phung ji ngot mâu hôm ji ngot đŏng ôh. Bu ur ndrô gâng, păng deh pơh tơ̆, Bi nơm âk kon, jêng djoh rgay.

⁶ Brah Yêhôva ƀư nkhĭt, ăn dâk rêh đŏng; Păng djôt leo bu trŭnh tâm ƀon phung khĭt, jêh nây djôt leo hao tă bơh ta nây.

⁷ Brah Yêhôva ƀư ăn o ach, jêh ri ƀư ăn ndrŏng kuăng; Păng ntrŭnh bu, jêh ri Păng n'hao tay bu tâm ban lĕ. Djôt leo bunuyh o ach luh bơh ndruyh neh, Jêh ri pư bunuyh ndĭt trơi hao tă bơh mbŭch ŭnh buh, Dơm ăn khân păng gŭ ndrel ma phung kôranh, Jêh ri ăn ma khân păng dơn ntŭk chrêk rmah;

⁸ Yorlah lĕ meh n'gâng neh ntu jêng ndơ Brah Yêhôva, Păng hŏ dơm jêh neh ntu klơ nây.

⁹ Păng mra mât mray lĕ nhuat jâng phung gŭ răp jăp đah Păng; Bi ma phung mhĭk djơh Păng mra ƀư rai khân păng tâm ntŭk ngo klĕng; Yorlah bunuyh mâu mra dơi ôh đah nau ktang.

¹⁰ Mbu nơm rdâng đah Brah Yêhôva mra chah rai! Tă bơh klơ trôk nđôch, Brah Yêhôva mra nkhŭt nglaih dah khân păng. Păng mra phat dôih lĕ rngôch bunuyh ƀon lan ta klơ neh ntu, Ăn nau dơi ma nơm Păng săch jêng hađăch, Jêh ri ăn nau dăng ktang rmeh ler ma nơm Păng tŏ dak ƀâu kah.”

¹¹ Y-Êlkana plơ̆ sĭt ma ngih vâl păng ta Rama, bi kon se ndăm nây gŭ pah kan ma Brah Yêhôva, kôranh ƀư brah Y-Êli jêng nơm ntĭm ma păng.

Lĕ nau kan mhĭk bơh bar hê kon bu klâu Y-Êli

¹² Nôk nây, bar hê kon bu klâu Y-Êli jêng phung ƀai ngăn, mâu chrê ôh ma Brah Yêhôva.

¹³ Nđâp lah khân păng jêng phung kôranh ƀư brah, khân păng vay ƀư đah phung ƀon lan pô aơ: Ăp tơ̆ geh bu nhhơr mpa ƀư brah, oh mon phung kôranh ƀư brah văch tâm nôk bu dôl gâm puăch, păng djôt ta ti du mlâm n'hoi nchraih pe,

¹⁴ ntâp sôr tâm glah thaih mâu lah glah ƀŭng, glah uk, mâu lah glah ƀai jê̆. Moh glo krêp ta n'hoi nchraih pe, phung kôranh ƀư brah mra sŏk ma khân păng nơm. Nĕ jêng nau khân păng ƀư jêh ta Silô ma lĕ rngôch phung Israel văch ta nây.

¹⁵ Rlau lơn ma nĕ, êlor ma bu gŭch ngi, oh mon kôranh ƀư brah tât ta nây lah đah nơm nhhơr mpa ƀư brah pô aơ: “Ăn hom puăch nây ma kôranh ƀư brah gay nđông, yorlah păng mâu ŭch ôh puăch khân may lĕ gâm, ƀiălah knŏng dơn mlay puăch ndrêh dơm păng ŭch.”

¹⁶ Tơlah bu plơ̆ lah: “Ăn bu gŭch ngi lor, jêh nây may mra sŏk moh ndơ may ŭch,” pôri oh mon bu ur kôranh ƀư brah nây lah: “Mâu ôh! Ăn hom aƀaơ ro, tơlah mâu ăn ôh, gâp mra sŏk pơih ro!”

¹⁷ Nau tih bar hê ndăm aơ toyh ngăn tanăp măt Brah Yêhôva, yorlah khân păng mưch ma lĕ ndơ nhhơr ma Brah Yêhôva.

Kon se ndăm Y-Samuel gŭ ta Silô

¹⁸ Tâm nôk nây, Y-Samuel pah kan tanăp Brah Yêhôva. Kon se vân du mlâm êphôt ma bok mhay.

¹⁹ Ăp năm, mê̆ păng jĭm du blah ao rjai jê̆ gay djôt leo ma păng, tơlah păng hăn ndrel ma sai păng ŭch nhhơr mpa ƀư brah ăp năm.

²⁰ Y-Êli ăn nau ueh uĭn ma Y-Êlkana jêh ri H'Anna pô aơ: “Dăn ma Brah Yêhôva ăn ma bu ur nây deh kon ma may, gay sâm ntrok đah kon păng hŏ dăn jêh ri nhhơr ma Brah Yêhôva!” Jêh nau nây, khân păng hăn plơ̆ sĭt ngih vâl khân păng nơm.

²¹ Brah Yêhôva uănh treng ma H'Anna; păng ntreo, jêh ri deh pe nuyh kon bu klâu jêh ri bar hê kon bu ur. Bi ma kon se Y-Samuel văch ma toyh tanăp măt Brah Yêhôva.

²² Nôk nây, Y-Êli hŏ ranh ngăn. Păng tăng lĕ ntil nau bar hê kon bu klâu păng ƀư ma lĕ rngôch phung Israel, jêh ri ma nau khân păng bê̆ch ndrel đah phung bu ur pah kan ta mpông Ngih Bok Nau Tâm Rƀŭn.

²³ Păng lah ma khân păng: “Mâm ƀư khân may ƀư lĕ nau kan pônây? Yorlah gâp tăng jêh lĕ rngôch phung ƀon lan nkoch ma lĕ nau djơh mhĭk khân may.

²⁴ Hơi phung kon, lơi ƀư kơt nây! Nau gâp tăng ma nau khân may ƀư mâu ueh ôh, khân may nsŭk ăn phung ƀon lan Brah Yêhôva ƀư tih.

²⁵ Tơlah du huê bunuyh ƀư tih ma huê bunuyh ri, Brah Ndu phat dôih ma bunuyh nây; ƀiălah tơlah du huê nuyh ƀư tih ma Brah Yêhôva, mbu nơm mra mbơh sơm kơl an?” Ƀiălah khân păng mâu ŭch iăt ôh nau mbơ̆ khân păng, yorlah Brah Yêhôva ŭch nkhĭt lơi khân păng.

²⁶ Bi kon se ndăm rah Y-Samuel lơ hao toyh tâm săk jăn, lơ ƀư ueh maak nuih n'hâm Brah Ndu jêh ri lĕ rngôch bunuyh.

Nau mbơh lor tâm rdâng đah ngih Y-Êli

²⁷ Geh du huê bunuyh Brah Ndu hăn tât gay lah ma Y-Êli: “Brah Yêhôva hŏ lah jêh kơt aơ: ‘Mâu hĕ gâp hŏ tâm mpơl rah vah jêh ma phung chô yau may, dôl khân păng hôm gŭ ta Êjipt, tâm dâng ngih hađăch Pharaôn?

²⁸ Gâp hŏ săch jêh ngih păng tă bơh lĕ rngôch phung ndŭl mpôl Israel, gay jan kôranh ƀư brah Gâp, nhhơr ndơ ƀư brah klơ nơng ƀư brah Gâp, gŭch ndơ ƀâu kah, jêh ri nsoh êphôt tanăp Gâp. Gâp hŏ ăn ma noi deh chô yau may prăp tâm du kô̆ tâm lĕ ndơ nhhơr bơh phung ƀon lan Israel gŭ tâm ŭnh nhhơr ma Gâp.

²⁹ Mâm ƀư khân may mưch rmot lĕ mpa ƀư brah jêh ri lĕ ndơ nhhơr Gâp hŏ ntăm jêh nhhơr ma Gâp mro mrăng? May yơk ma phung kon bu klâu may rlau lơn ma Gâp, jêh ri khân may mât rong khân may ăn lay ma lĕ ndơ nhhơr dŭt ueh tă bơh phung Israel, jêng phung ƀon lan Gâp!’

³⁰ Yor ri, Yêhôva Brah Ndu Israel lah: ‘Gâp hŏ tă lah jêh pô aơ ngih may jêh ri ngih mbơ̆ may mra n'ho ro pah kan tanăp măt Gâp.’ Ƀiălah aƀaơ Brah Yêhôva lah, nau nây mâu hôm geh tâm ban pônây ôh! Yorlah mbu nơm yơk ma Gâp, Gâp mra yơk ma păng, bi mbu tâm rmot ma Gâp, Gâp mra tâm rmot ma păng.

³¹ Aơ, nar mra tât, Gâp mra ƀư rai nau ktang may jêh ri nau ktang ngih mbơ̆ may, kŏ tât mâu hôm geh ôh du huê bu klâu bu ranh ngih may.

³² Tâm nôk Brah Yêhôva ăn âk ngăn nau ueh uĭn ma phung Israel, may mra saơ nau rêh ni mro mrăng, jêh ri mâu geh ôh du huê tâm rnăk vâl may mra gŭ rêh tât ranh.

³³ Bi mbu tâm ngih may ma Gâp mâu mprơh ôh tă bơh nơng ƀư brah Gâp, gay ƀư ma măt may hŏt rgănh, nuih n'hâm may geh nau rngot rvê; ƀiălah lĕ rngôch kon sau tâm ngih may mra khĭt dôl hôm ndăm.

³⁴ Nau mra tât ma bar hê kon bu klâu may, jêng Y-Hôphni jêh ri Y-Phinêas, jêng nau mbên ma may: Lĕ bar hê khân păng mra khĭt tâm du nar.

³⁵ Gâp mra njêng ma Gâp du huê kôranh ƀư brah răp jăp, păng mra ƀư tĭng nuih n'hâm Gâp jêh ri nau mĭn Gâp. Gâp mra ăn ma păng geh kon sau gay thoi noi deh păng, jêh ri noi deh păng mra pah kan n'ho ro tanăp nơm Gâp tŏ dak ƀâu kah.

³⁶ Mbu moh hôm klen tâm ngih may mra hăn mbah tanăp măt păng, gay dơi geh du glo prăk jêh ri du glo piăng let, jêh ri khân păng mra lah pô aơ: ‘Dăn may ăn ma gâp geh du kô̆ tâm nau pah kan kôranh ƀư brah, gay ma gâp dơi geh du glo piăng let sa.’”