I Samuel 19 - Nau Brah Ndu Ngơi 2023

Y-Sol tâm chră ŭch nkhĭt Y-Đavit

¹ Y-Sôl ngơi ma Y-Jônathan, kon bu klâu păng, jêh ri ma lĕ rngôch phung oh mon păng ăn khân păng nkhĭt Y-Đavit. Ƀiălah Y-Jônathan, kon bu klâu Y-Sôl, rŏng ngăn ma Y-Đavit,

² pôri Y-Jônathan mbơh ma Y-Đavit gĭt: “Y-Sôl, mbơ̆ gâp, joi kô̆ nkhĭt may. Pôri ôi taơ, may njrăng hom, gŭ ntŭk ndâp, jêh ri gŭ krap.

³ Gâp mra hăn dâk ta meng mbơ̆ gâp tâm mir, ntŭk may gŭ krap, jêh ri gâp mra ngơi ma mbơ̆ gâp ma nau may, rlong uănh păng ŭch lah ƀaƀă, jêh nây gâp mra nkoch ăn may gĭt.”

⁴ Pônây, Y-Jônathan nkoch nau ueh Y-Đavit ma Y-Sôl, mbơ̆ păng: “Dăn ma mbơ̆, lơi ƀư tih ma Y-Đavit ôh, oh mon may, yorlah păng mâu ƀư tih đah may ôh; ƀiălah, păng ƀư jêh lĕ nau kan ueh kơl may.

⁵ Păng sân săk jăn jêh ri nkhĭt jêh bu klâu Philistin, yor ri Brah Yêhôva ƀư du nau tâm rklaih toyh yor tă bơh păng ăn ma lĕ rngôch phung Israel. May lĕ saơ jêh ri răm rhơn nau nây. Pônây, mâm dĭng may ŭch ƀư tih đŏng đah mham mâu geh nau tih ôh, ŭch nkhĭt Y-Đavit dơm dam?”

⁶ Y-Sôl tông bâr Y-Jônathan jêh ri sơm ton: “Tĭng nâm Brah Yêhôva gŭ rêh mro mrăng, Y-Đavit mâu mra khĭt ôh!”

⁷ Nôk nây, Y-Jônathan kuăl Y-Đavit, nkoch lĕ nau nây ma păng, jêh nây leo Y-Đavit hăn văch dăch Y-Sôl, jêh ri Y-Đavit pah kan ma Y-Sôl nâm bu saơm.

H'Mikal kơl Y-Đavit klaih bơh Y-Saul

⁸ Nau tâm lơh ăt hôm ƀaƀơ. Y-Đavit hăn tâm lơh jêh ri tâm lơh đah phung Philistin, ƀư ăn khân păng khĭt âk ngăn, jêh ri khân păng nchuăt du panăp khân păng.

⁹ Ƀiălah Brah Yêhôva prơh brah mhĭk văch gŭ ndrel ma Y-Sôl tơlah păng dôl gŭ tâm ngih hađăch nđâp ma tak ta ti păng, bi Y-Đavit gŭ kreh gong rêng.

¹⁰ Y-Sôl sŏk tak ŭch ntâp Y-Đavit pâng krêp ta mpir ƀiălah Y-Đavit gơnh plĕch, tak Y-Sôl băm tâm mpir. Y-Đavit nchuăt du jêh ri klaih tâm măng nây.

¹¹ Y-Sôl prơh bunuyh hăn tât ta ngih Y-Đavit, gak uănh păng gay nkhĭt păng ang ôi taơ. Ƀiălah H'Mikal, ur Y-Đavit, ăn păng gĭt jêh ri lah: “Tơlah măng aơ may mâu nchuăt klaih ôh, pôri kêng ôi taơ bu mra nkhĭt may.”

¹² H'Mikal ntrŭnh Y-Đavit ta mpông bloh jêh ri păng nchuăt du jêh ri dơi klaih.

¹³ Jêh nau nây, H'Mikal sŏk rup brah, dơm tâm sưng bê̆ch, sŏk blah bok ƀư ma rsau be nkŭm bôk rup brah nây, jêh nây sŏk ao nkŭm ndơ nây.

¹⁴ Tơlah Y-Sôl prơh bunuyh hăn nhŭp Y-Đavit, păng lah: “Păng ji kop.”

¹⁵ Y-Sôl prơh tay bunuyh hăn uănh Y-Đavit, jêh ri lah: “Ăt ăn păng ta sưng bê̆ch jêh ri tung leo păng tât ma gâp gay gâp dơi nkhĭt păng.”

¹⁶ Pônây, phung mbơh hăn tât ta nây, saơ rup brah ta klơ sưng bê̆ch, bôk nkŭm du mlâm blah bok ma rsau be.

¹⁷ Y-Sôl lah ma H'Mikal: “Mâm ƀư ay ndơm mƀruh gâp gay ăn nơm rlăng gâp lĕ nchuăt du kơt nĕ?” H'Mikal ngơi đah Y-Sôl: “Păng nhhu jêh ma gâp: ‘Ăn hom gâp hăn, tơlah mâu, gâp mra nkhĭt ay!’”

Y-Đavit hăn tât tâm mâp đah Y-Samuel ta Rama

¹⁸ Pônây, Y-Đavit nchuăt du jêh ri hăn tât ta Rama nkoch ma Y-Samuel lĕ nau Y-Sôl hŏ ƀư ma păng. Jêh nây, păng jêh ri Y-Samuel hăn gŭ ta Naiôt.

¹⁹ Geh bunuyh mbơh nau nây ma Y-Sôl pô aơ: “Aơ, Y-Đavit lĕ gŭ ta Naiôt tâm Rama.”

²⁰ Jêh ri Y-Sôl prơh bunuyh hăn nhŭp Y-Đavit. Tơlah khân păng saơ du phung nơm mbơh lor, gŭ mbơh lor jêh ri Y-Samuel jêng kôranh khân păng, Huêng Brah Brah Ndu văch gŭ ndrel ma phung bunuyh Y-Sôl prơh hăn, jêh ri nđâp khân păng nây lĕ mbơh lor.

²¹ Bu mbơh nau nây ma Y-Sôl gĭt; păng prơh phung êng, jêh ri phung êng nây jêng ngơi mbơh lor đŏng. Y-Sôl prơh tay phung mbơh hăn rơh pe, jêh ri khân păng ngơi nau mbơh lor đŏng.

²² Rnôk nây, Y-Sôl nơm hăn tât ma Rama, tât ta du ntu dak toyh ta Seku, jêh ri ôp: “Ta ntŭk Y-Samuel jêh ri Y-Đavit?” Geh du huê plơ̆ lah: “Bar hê khân păng dôl gŭ ta Naiôt tâm Rama.”

²³ Pônây, păng hăn tât ta Naiôt tâm Rama. Huêng Brah Ndu văch gŭ ndrel ma păng tâm ban lĕ, jêh ri păng dôl hăn rŏ trong păng ngơi mbơh lor kŏ tât ta Naiôt tâm Rama.

²⁴ Păng doh lơi bok ao păng, ngơi mbơh lor tâm ban lĕ tanăp Y-Samuel, jêh nây păng gŭ rhôk tâm ban pônây lâng săk ta neh lôch du nar nây jêh ri măng nây đŏng. Yor nây, bu lah: “Di lĕ nđâp ma Y-Sôl nơm lĕ jêng du huê tâm phung nơm mbơh lor?”