I Samuel 18 - Nau Brah Ndu Ngơi 2023

Y-Jônathan ƀư băl đah Y-Đavit

¹ Y-Đavit ngơi đah Y-Sôl lôch jêh, nuih n'hâm Y-Jônathan tâm lăp đah nuih n'hâm Y-Đavit, kŏ tât Y-Jônathan rŏng ma Y-Đavit nâm bu nau rêh păng nơm.

² Tă bơh nar nây, Y-Sôl kân Y-Đavit, mâu ăn păng plơ̆ sĭt ma ngih mbơ̆ păng ôh.

³ Y-Jônathan ƀư nau tâm rnglăp đah Y-Đavit, yorlah păng rŏng ma Y-Đavit nâm bu nau rêh păng nơm.

⁴ Y-Jônathan doh lơi ao mbâl păng dôl nsoh ăn ma Y-Đavit nđâp ma ao tâm lơh, lĕ đao, na, jêh ri rse vân bŭt păng.

⁵ Tơlah Y-Đavit hăn tâm lơh, lĕ ntŭk Y-Sôl prơh păng hăn, păng dơi jêng da dê. Pôri Y-Sôl n'hao kan ma păng jêng kôranh chiă uănh toyh ma phung tahan. Păng dơi ƀư maak ma lĕ rngôch phung ƀon lan jêh ri phung oh mon Y-Sôl.

Y-Saul nach ma Y-Đavit

⁶ Tơlah Y-Đavit hŏ nkhĭt dơi bu klâu Philistin, jêh ri păng plơ̆ sĭt ndrel ma phung tahan, geh phung bu ur tă bơh lĕ rngôch ƀon Israel luh hăn tâm mâp đah hađăch Sôl, mprơ jêh ri kdŏ, nter răm maak ndrel ma gâr jê̆, jêh ri lĕ ntil gong êng êng.

⁷ Phung bu ur nây ƀă kdŏ ƀă mprơ tâm ơh ndrăng khân păng pô aơ: “Y-Sôl nkhĭt jêh âk rbăn nuyh, Bi Y-Đavit nkhĭt jêh âk rmưn nuyh!”

⁸ Y-Sôl ji nuih ngăn jêh ri mâu maak ôh yorlah lĕ nau ngơi nây. Păng lah: “Phung aơ kơp ma Y-Đavit âk rbăn, jêh ri knŏng kơp ma gâp âk rmưn; knŏng hôm pưt ăn ma păng nau dơi jêng hađăch dơm hôm e!”

⁹ Ntơm bơh nar nây, Y-Sôl jâk muh măt uănh ma Y-Đavit.

Y-Saul ŭch nkhĭt Y-Đavit

¹⁰ Ôi taơ, Brah Ndu prơh du huê brah mhĭk tât ma Y-Sôl, păng ngơi thăm rmat tâm ngih, bi Y-Đavit ăt kreh gong rêng nâm vay ƀư jêh ăp nar. Y-Sôl djôt du tak tâm ti,

¹¹ jêh ri ŭch rjăng tak nây ta Y-Đavit yor păng mĭn êng: “Gâp mra pâng păng lăp tâm mpir.” Ƀiălah Y-Đavit der luh bơh mpiăt tak bar tơ̆.

¹² Y-Sôl klach ma Y-Đavit yorlah Brah Yêhôva gŭ ndrel ma Y-Đavit, ƀiălah hŏ chalơi jêh păng.

¹³ Y-Sôl ăn Y-Đavit gŭ ngai đah păng, njêng păng kôranh chiă uănh toyh du rbăn tahan. Y-Đavit njŭn leo phung tahan luh lăp tă bơh ntŭk tâm lơh.

¹⁴ Y-Đavit geh nau dơi tâm lĕ kan păng ƀư yorlah Brah Yêhôva gŭ ndrel ma păng.

¹⁵ Tơlah saơ Y-Đavit geh nau dơi kơt nĕ, Y-Sôl klach ma păng.

¹⁶ Ƀiălah lĕ rngôch phung Israel jêh ri phung Yuđa rŏng ma Y-Đavit yorlah păng njŭn leo khân păng luh lăp tă bơh ntŭk tâm lơh.

Y-Đavit sŏk H'Mikal

¹⁷ Y-Sôl lah ma Y-Đavit: “Aơ, kon bôk rah gâp jêng H'Mêrap. Gâp mra ăn ma păng jêng ur may, knŏng ăn may jêng janh ktang kơl ma gâp jêh ri tâm lơh yor Brah Yêhôva.” Y-Sôl mĭn êng: “Lơi ăn ti gâp ƀư mhĭk ma păng, ăn ti phung Philistin ƀư mhĭk ma păng.”

¹⁸ Y-Đavit lah ma Y-Sôl: “Mbu gâp jêng? Mbu băl mpôl gâp jêng? Mâm ngih mbơ̆ gâp tâm phung Israel kŏ tât gâp jêng klay ma hađăch?”

¹⁹ Tơlah, tât rnôk di bu ăn H'Mêrap, kon bu ur Y-Sôl, ma Y-Đavit, bu nkhơng ăn păng jêng ur ma Y-Adriêl ƀon Mêhôlat.

²⁰ Ƀiălah H'Mikal, kon bu ur Y-Sôl, rŏng ma Y-Đavit. Tơlah gĭt nau nây, Y-Sôl maak ngăn.

²¹ Yorlah Y-Sôl mĭn êng: “Gâp mra ăn kon bu ur gâp ma păng gay ƀư dăk sân ma păng, jêh ri ti phung Philistin klăp lah ƀư mhĭk păng.” Pônây, Y-Sôl lah tal bar ma Y-Đavit: “Aƀaơ ri, may mra jêng klay gâp.”

²² Y-Sôl ntĭnh ma phung oh mon păng: “Ngơi êng hom ma Y-Đavit pô aơ: ‘Hađăch geh nau maak ma may, jêh ri lĕ rngôch phung oh mon păng rŏng ma may. Pôri, aƀaơ may lĕ jêng klay ma hađăch.’”

²³ Phung oh mon Y-Sôl ngơi đŏng lĕ nau nây ma Y-Đavit. Ƀiălah Y-Đavit lah: “Khân may mĭn jêng jê̆ lê̆ jêng klay ma hađăch? Gâp jêng du huê o ach jêh ri mâu geh nau lư n'găr ôh.”

²⁴ Phung oh mon Y-Sôl nkoch tay ma păng lĕ nau Y-Đavit.

²⁵ Y-Sôl lah ma khân păng: “Khân may ngơi hom ma Y-Đavit kơt aơ: ‘Hađăch mâu kêh ndơ nđăp ôh, knŏng kêh du rhiăng ntâu proch nhôm bu klâu phung Philistin gay plơng har ma phung rlăng hađăch.’” Y-Sôl mĭn ŭch nkhĭt Y-Đavit ma ti phung Philistin.

²⁶ Tơlah phung oh mon Y-Sôl nkoch tay lĕ nau ngơi nây ma Y-Đavit, Y-Đavit dơn nau nây gay jêng klay ma hađăch. Lor ma nar tâm nal,

²⁷ Y-Đavit dâk hăn, ndrel ma phung tahan păng jêh ri lơh nkhĭt bar rhiăng nuyh phung Philistin. Y-Đavit djôt sĭt ntâu proch nhôm khân păng, jêh ri chê̆ ma hađăch nŭm rnoh gay dơi jêng klay. Pônây, Y-Sôl ăn H'Mikal, kon bu ur păng, jêng ur ma Y-Đavit.

²⁸ Ƀiălah tơlah Y-Sôl saơ rah vah Brah Yêhôva gŭ ndrel ma Y-Đavit jêh ri saơ H'Mikal, kon bu ur păng, rŏng ma Y-Đavit

²⁹ ri mơ Y-Sôl klach âk lơn ma Y-Đavit. Pônây, Y-Sôl jêng rlăng ma Y-Đavit lĕ du njăr rêh.

³⁰ Rnôk nây, phung kôranh Philistin du luh ŭch tâm lơh, jêh ri ăp tơ̆ khân păng luh du, Y-Đavit geh nau dơi lơn ma lĕ rngôch phung oh mon Y-Sôl, pônây ƀư ăn amoh păng lư n'găr hâu ngăn.