I Samuel 17 - Nau Brah Ndu Ngơi 2023

Y-Đavit nkhĭt Gôliat

¹ Phung Philistin rgum lĕ phung tahan khân păng ŭch tâm lơh. Khân păng rgum băl ta Sôkô, tâm n'gor Yuđa, jêh ri ƀư rmlak ta Êphes-Damim, vah vang Sôkô đah ƀon Asêka.

² Y-Sôl jêh ri phung Israel rgum đŏng, jêh ri ƀư rmlak ta rlŭng Êlah, dăp tahan tâm rdâng đah phung Philistin.

³ Phung Philistin dâk ta klơ yôk mpeh đah aơ, jêh ri phung Israel dâk ta klơ yôk mpeh đah ri, geh rlŭng vah vang khân păng.

⁴ Nôk nây, geh du huê janh ktang luh du tă bơh rmlak phung Philistin, amoh păng Y-Gôliat, ƀon tơm ta Gat, prêh klăp lah pe met,

⁵ bôk păng ndô môk kông, nsoh ao kông nsiap ka jâk prăm jât ma pơh kilô.

⁶ Jâng păng ndop ma kông, ta săng nglik cheng tak kông.

⁷ N'gâr tak păng nâm bu mâng mpeh tanh, jêh ri chiông tak jâk klăp lah pơh kilô. Hăn panăp păng jêng nơm djôt khêl păng.

⁸ Păng dâk jêh ri nter huy ma phung tahan Israel: “Mâm ƀư khân may du luh ŭch dăp tahan ma nau tâm lơh? Mâu di hĕ gâp jêng du huê Philistin, jêh ri mâu di khân may jêng phung oh mon Y-Sôl? Săch hom du huê tâm khân may hăn jŭr văch gay tâm lơh đah gâp.

⁹ Tơlah păng dơi tâm lơh jêh ri nkhĭt gâp, hên mra jêng dĭk ma khân may; ƀiălah tơlah gâp dơi tâm lơh jêh ri nkhĭt păng, pônây khân may mra ƀư dĭk jêh ri pah kan ma hên.”

¹⁰ Bu klâu Philistin nây lah tay: “Di jêh nar aơ, gâp rlong ma phung tahan Israel: Săch hom du huê bu klâu gay tâm lơh đah gâp.”

¹¹ Y-Sôl jêh ri lĕ rngôch phung Israel tăng lĕ nau ngơi bơh bu klâu Philistin, khân păng krit kir jêh ri klach hâu ngăn.

¹² Y-Đavit jêng kon bu klâu Y-Yêsê, bơh Êphrata ƀon Ƀêtlêhem tâm n'gor Yuđa. Y-Yêsê geh pham nuyh kon bu klâu. Tâm rnôk hađăch Sôl, Y-Yêsê hŏ âk năm jêh.

¹³ Pe nuyh kon bu klâu toyh Y-Yêsê hŏ tĭng Y-Sôl hăn ma ntŭk tâm lơh. Pe nuyh kon bu klâu nây amoh: Y-Êliap, kon bôk rah; Y-Abinadap, kon rơh bar; jêh ri Y-Sama, kon rơh pe.

¹⁴ Y-Đavit jêng kon mpŏt. Pe nuyh nâu păng lĕ tĭng Y-Sôl,

¹⁵ bi ma Y-Đavit kơl kan hađăch Y-Sôl ƀă, plơ̆ sĭt ƀă gay chiăp biăp ma mbơ̆ păng ta Ƀêtlêhem.

¹⁶ Tâm puăn jât nar, Y-Gôliat bunuyh Philistin du luh bơh rmlak gay rlong nuih phung Israel ăp ôi jêh ri mhaơ.

¹⁷ Geh du nar, Y-Yêsê lah ma Y-Đavit, kon bu klâu păng: “May sŏk hom jât kilô găr vâr jêh ri jât glo piăng let aơ djôt leo gơnh ta ntŭk pôih tahan njŭn ăn ma phung nâu may.

¹⁸ May tâm ban đŏng djôt leo jât glo ƀănh dak toh aơ ăn ma kôranh chiă uănh du rbăn nuyh tahan phung nâu may. Uănh hom phung nâu may gŭ ueh lăng săk jăn, jêh ri bi may nơm plơ̆ mbơh ma gâp du nau mbên gay saơ khân păng geh nau đăp mpăn.”

¹⁹ Phung nâu Y-Đavit gŭ ndrel ma Y-Sôl jêh ri lĕ rngôch phung Israel ta rlŭng Êlah gay tâm lơh đah phung Philistin.

²⁰ Kah ôi taơ, Y-Đavit kah rngăl ơm, jao biăp păng ma du huê rmăk gŭ chiăp, jêh nây sŏk ndơ hăn trong tĭng nâm nau Y-Yêsê ntĭnh jêh ma păng. Tơlah Y-Đavit hŏ hăn tât ta pôih tahan, dôl phung ta hăn luh dăp tahan jêh ri troh nter ma nau tâm lơh.

²¹ Phung Israel jêh ri phung Philistin dăp tahan ma nau tâm lơh, bar đah khân păng tâm rdâng.

²² Y-Đavit juyh ndô ndơ, jao ma nơm mât prăp ndơ, păng nchuăt ran tât ntŭk dăp tâm lơh, lup nau jô̆ khâl phung nâu păng geh nau ueh lăng săk jăn mâu lah mâu.

²³ Păng dôl ngơi ndrel ma phung nâu păng, ri nơm janh ktang Y-Gôliat, jêng bunuyh Philistin, ta Gat, tă bơh phung tahan Philistin rduh ran, jêh ri Y-Đavit tăng păng ngơi lĕ nau rlong nuih nâm kơt saơm.

²⁴ Lĕ rngôch phung Israel saơ bunuyh aơ, nchuăt du jêh ri klach râm ngăn.

²⁵ Du huê Israel lah: “May saơ lĕ bu klâu aơ rduh ran tât? Păng văch ran gay ƀư bêk prêng phung Israel! Tơlah tâm phung Israel, mbu moh dơi nkhĭt păng, hađăch mra ăn nau nkhôm ma păng âk drăp ndơ, ăn kon bu ur păng ma nơm nây, jêh ri păng mâu hôm sŏk riu pi ma ngih mbơ̆ păng.”

²⁶ Y-Đavit lah ma phung gŭ êp păng: “Moh ndơ bu mra nkhôm ma nơm dơi nkhĭt bu klâu Philistin aơ, jêh ri sŏk lơi nau bêk prêng tă bơh phung Israel? Yorlah bu klâu Philistin aơ, nơm mâu koh ntâu ôh mbu moh păng jêng, dĭng nănh rlong nuih phung tahan Brah Ndu gŭ rêh mro mrăng?”

²⁷ Bu ngơi tay lĕ nau ngơi nâm bu klơ aơ jêh ri lah ma Y-Đavit: “Mbu dơi nkhĭt păng nau nkhôm mra jêng pônây yơh.”

²⁸ Ƀiălah Y-Êliap, nâu ranh păng, tăng Y-Đavit ngơi pônây, ji nuih ma păng, jêh ri lah: “Mâm ƀư may tât ta aơ? Ma mbu nơm may lơi ăn biăp he djê̆ lê̆ tâm bri rdah? Gâp gĭt nau sưr jêh ri nau mhĭk tâm nuih n'hâm may. Yorlah may hăn văch ta aơ gay ŭch saơ nau tâm lơh.”

²⁹ Y-Đavit lah: “Ntŭk geh gâp ƀư? Mâm gâp mâu dơi ngơi?”

³⁰ Păng du tă bơh phung nâu păng, hăn văch ôp tay ma phung êng tâm ban nau nây lĕ, bu plơ̆ lah nâm bu kơt saơm nây đŏng.

³¹ Geh bu tăng lĕ nau Y-Đavit ngơi, bu nkoch tay nau nây ma Y-Sôl. Hađăch prơh bunuyh hăn kuăl Y-Đavit tât.

³² Y-Đavit mbơh ma Y-Sôl: “Lơi ăn rdja nuih ôh yor bunuyh Philistin ri! Oh mon may mra hăn tâm lơh đah bu klâu Philistin nây.”

³³ Y-Sôl lah ma Y-Đavit: “May mâu dơi tâm rdâng đah bu klâu Philistin aơ ôh, yorlah may knŏng jêng du huê ndăm rah, bi păng jêng du tahan ntơm bơh ndăm rah.”

³⁴ Y-Đavit mbơh ma Y-Sôl: “Lah oh mon may chiăp biăp ma mbơ̆ gâp nơm, tơlah geh yau mŭr mâu lah kau văch kăp du mlâm tâm phung biăp,

³⁵ gâp hăn tĭng păng, dong păng, pit sŏk biăp tă bơh trôm mbung păng; tơlah păng tâm rdâng, gâp kuăn ta têp kang păng, dong păng jêh ri nkhĭt lơi păng.

³⁶ Oh mon may hŏ nkhĭt jêh yau mŭr jêh ri kau, pônây bu klâu Philistin mâu geh koh ntâu ri mra jêng tâm ban nây lĕ, yorlah păng nănh rlong nuih phung tahan Brah Ndu gŭ rêh mro mrăng.”

³⁷ Y-Đavit lah tay: “Brah Yêhôva rklaih jêh gâp tă bơh nheh yau mŭr jêh ri nheh kau, Păng tâm ban đŏng mra tâm rklaih gâp tă bơh ti phung Philistin aơ.” Y-Sôl lah ma Y-Đavit: “Hăn hom, ăn Brah Yêhôva gŭ ndrel ma may!”

³⁸ Y-Sôl sŏk ao păng tâm lơh nsoh ăn ma Y-Đavit, ndô môk kông jêh ri nsoh ao tâm lơh ma păng.

³⁹ Y-Đavit cheng đao Y-Sôl padih ao tâm lơh jêh ri rlong hăn yorlah păng mâu mơng bên ôh ma ndơ nây. Păng lah ma Y-Sôl: “Gâp mâu dơi hăn ôh tơlah anh ndơ tâm lơh nây, yorlah gâp mâu mơng bên ôh ndơ aơ.” Jêh nây Y-Đavit doh lơi lĕ ndơ nây.

⁴⁰ Păng djôt du mâng jra tâm ti, săch tâm n'hor dak prăm găr lŭ pler rlip dơm ndơ nây ăn tâm dŭng chiăp biăp păng vay cheng jêh ri na rvĭt klŭp lŭ tâm ti, jêh nây rduh ran tât bu klâu Philistin.

⁴¹ Bu klâu Philistin văch dăch ta Y-Đavit; hăn lor panăp păng jêng nơm sâm djôt khêl păng.

⁴² Bu klâu Philistin uănh Y-Đavit, saơ păng knŏng jêng du huê ndăm rah, muh măt dŭm, săk jăn ray ueh, jêh ri mưch ma păng.

⁴³ Bu klâu Philistin lah ma Y-Đavit: “Gâp mâu jêng nâm bu so, dĭng may djôt mâng jra văch ma gâp?” Jêh nây bu klâu Philistin rak rtăp ma Y-Đavit ma amoh phung brah păng,

⁴⁴ bu klâu Philistin lah tay: “Văch hom ta aơ, gâp mra ăn puăch may ma sĭm tâm trôk jêh ri ma mpô mpa bri.”

⁴⁵ Y-Đavit lah ma bu klâu Philistin: “May văch ma gâp ma đao, tak, jêh ri tak keng. Bi gâp, gâp hăn ma may tâm amoh Brah Yêhôva ma phung tahan, jêng Brah Ndu ma phung tahan Israel may hŏ rlong nuih jêh.

⁴⁶ Nar aơ Brah Yêhôva mra jao may tâm ti gâp. Gâp nkhĭt may, koh bôk may; jêh ri lĕ săk jăn phung tahan Philistin khĭt mra ƀư mpa sa ma sĭm klơ trôk jêh ri ma mpô mpa bri. Lĕ rngôch neh ntu mra dơi gĭt geh du huê Brah Ndu tâm Israel,

⁴⁷ jêh ri lĕ rngôch phung tâm rƀŭn aơ mra saơ Brah Yêhôva mâu tâm rklaih ma đao, mâu lah tak ôh. Yor Brah Yêhôva jêng Kôranh Brah nau tâm lơh, Păng mra jao khân may tâm ti hên.”

⁴⁸ Lah Y-Gôliat rduh tâm lơh đah Y-Đavit, Y-Đavit nchuăt ngăch rlet mpeh ntŭk dăp tâm lơh gay tâm mâp đah bu klâu Philistin.

⁴⁹ Y-Đavit sŭk tâm dŭng păng sŏk du găr lŭ, jêh nây dŏng na rvĭt đah rse klŭp di ta ndăr kleng bu klâu Philistin. Găr lŭ lăp tâm trôm ndăr kleng păng, ƀư ma Y-Gôliat cha lôt nkŭp muh măt ta neh.

⁵⁰ Pônây, Y-Đavit dơi đah bu klâu Philistin ma du găr lŭ klŭp ma na rvĭt, nkhĭt păng mâu ŭch djôt đao tâm ti.

⁵¹ Y-Đavit nchuăt tât ta săk jăn bu klâu Philistin, sŏk đao păng, tŏk luh bơh ndrop nkhĭt păng nơm, jêh nây sŏk đao koh bôk păng. Phung Philistin saơ kôranh janh ktang khân păng lĕ khĭt jêh, khân păng nchuăt du.

⁵² Nôk nây, phung ƀon lan Israel jêh ri Yuđa dâk ma nau troh nter jêh ri hăn tĭng phung tahan Philistin tât ta ƀon Gat jêh ri bôk mpông ƀon Êkron. Săk jăn phung tahan Philistin cha lôt khĭt rŏ trong ntơm bơh Saraim tât Gat jêh ri Êkron.

⁵³ Jêh hăn tĭng phung tahan Philistin, phung ƀon lan Israel plơ̆ sĭt sŏk pit pôih khân păng.

⁵⁴ Y-Đavit djôt bôk bu klâu Philistin tât ta ƀon Yêrusalem, ƀiălah ndơ tâm lơh Y-Gôliat dơm tâm rmlak păng nơm.

⁵⁵ Tâm nôk Y-Sôl saơ Y-Đavit hăn tâm lơh đah phung Philistin, păng ôp ma Y-Apner, kôranh ma phung tahan: “Ơ Y-Apner, mbu kon bu klâu ndăm rah aơ?” Y-Apner lah: “Hơi hađăch! Tĭng n'hâm may hôm rêh, gâp mâu gĭt ôh.”

⁵⁶ Hađăch lah: “Ôp hom ăn gĭt mbu kon bu klâu ndăm rah nây.”

⁵⁷ Lah Y-Đavit hŏ nkhĭt jêh bu klâu Philistin jêh ri plơ̆ sĭt, Y-Apner vơt păng, leo tât panăp măt Y-Sôl, ti Y-Đavit djôt nđâp ma bôk bu klâu Philistin nây.

⁵⁸ Y-Sôl ôp păng: “Hơi nô ndăm, mbu moh kon may jêng?” Y-Đavit plơ̆ sĭt lah: “Gâp jêng kon Y-Yêsê, oh mon may, bunuyh bơh Ƀêtlêhem.”