I Samuel 16 - Nau Brah Ndu Ngơi 2023

Y-Samuel tŏ dak ƀâu kah ma Y-Đavit

¹ Brah Yêhôva lah ma Y-Samuel: “May nhĭm nhhiăng yor nau Y-Sôl kŏ tât ndah nâm jŏ? Gâp hŏ chalơi jêh păng, mâu hôm ăn păng jêng hađăch phung Israel đŏng ôh. Troch hom dak ƀâu kah ăn bêng nke jêh ri hăn trong. Gâp mra prơh may hăn tâm mâp đah Y-Yêsê, du huê bunuyh ƀon Ƀêtlêhem, yorlah Gâp hŏ săch du huê hađăch tâm phung kon bu klâu păng.”

² Y-Samuel lah: “Mâm gâp dơi hăn? Tơlah Y-Sôl tăng nau nây păng mra nkhĭt gâp!” Brah Yêhôva lah: “Têk leo ndrel ma may du mlâm ndrôk me druh, jêh ri lah: ‘Gâp văch gay nhhơr mpa ƀư brah ma Brah Yêhôva.’

³ May mra jă Y-Yêsê tât râng nau ƀư brah. Gâp mra ăn ma may gĭt nau may mra ƀư, jêh nây may mra sŏk amoh Gâp tŏ dak ƀâu kah ma nơm Gâp mra ntĭm ăn ma may.”

⁴ Y-Samuel ƀư tĭng nâm nau Brah Yêhôva ntăm jêh ma păng, jêh ri hăn tât ta Ƀêtlêhem. Phung kôranh bu ranh ƀon nây luh hăn tâm mâp ma păng, klach sâr jêh ri ôp: “May văch ma nau đăp mpăn lĕ?”

⁵ Păng lah: “Nau đăp mpăn! Gâp văch gay nhhơr mpa ƀư brah ma Brah Yêhôva. Ƀư kloh hom khân may nơm jêh ri văch ndrel ma gâp ma nau ƀư brah.” Păng ƀư kloh đŏng ma Y-Yêsê jêh ri phung kon bu klâu păng, jêh ri jă khân păng hăn tât ndrel ma nau ƀư brah.

⁶ Tơlah khân păng lĕ tât jêh, Y-Samuel uănh ma Y-Êliap jêh ri mĭn êng: “Nanê̆ ngăn nơm Brah Yêhôva tŏ dak ƀâu kah dôl gŭ panăp Păng.”

⁷ Ƀiălah Brah Yêhôva lah ma Y-Samuel: “Lơi ta uănh padih mâu lah ma nau păng prêh juat ôh, yorlah Gâp dun jêh ma păng. Brah Yêhôva mâu uănh nâm bu bunuyh uănh ôh; bunuyh uănh padih, ƀiălah Brah Yêhôva uănh saơ tâm trôm nuih n'hâm.”

⁸ Y-Yêsê kuăl Y-Abinadap, jêh ri ăn păng găn tanăp Y-Samuel. Ƀiălah păng lah: “Brah Yêhôva mâu lĕ săch nơm aơ.”

⁹ Y-Yêsê ăn Y-Sama hăn rgăn, ƀiălah Y-Samuel lah: “Brah Yêhôva mâu đŏng săch nơm aơ.”

¹⁰ Y-Yêsê lah ma pơh nuyh kon bu klâu păng hăn găn tanăp Y-Samuel, ƀiălah Y-Samuel lah ma Y-Yêsê: “Brah Yêhôva mâu săch du huê nuyh tâm phung aơ ôh.”

¹¹ Y-Samuel ôp ma Y-Yêsê: “May hôm geh kon bu klâu êng mâu lah mâu?” Y-Yêsê plơ̆ lah: “Hôm e du huê kon mpŏt, ƀiălah păng dôl chiăp biăp.” Y-Samuel lah: “Prơh bunuyh hăn kuăl păng sĭt, he mâu mra gŭ sông sa ôh êlor ma păng tât ta aơ.”

¹² Pônây, Y-Yêsê prơh bunuyh hăn kuăl nơm kon mpŏt sĭt. Păng geh muh măt dŭm, bar măt ang, jêh ri săk jăn ueh. Brah Yêhôva lah ma Y-Samuel: “Dâk hom tŏ dak ƀâu kah ma păng, yorlah aơ jêng nơm Gâp lĕ săch jêh.”

¹³ Y-Samuel sŏk nke dak ƀâu kah jêh ri tŏ ma Y-Đavit tanăp phung nâu păng. Ntơm bơh nar nĕ tât kăndơ̆, Huêng Brah Yêhôva văch gŭ ndrel ma Y-Đavit ma nau brah. Y-Samuel dâk jêh ri hăn sĭt ma Rama.

Y-Saul kuăl ma Y-Đavit tât gay pah kan

¹⁴ Huêng Brah Yêhôva luh du tă bơh Y-Sôl, Brah Yêhôva prơh du huê brah mhĭk rkhŭk păng.

¹⁵ Phung oh mon Y-Sôl lah ma păng: “Aơ, geh du huê brah mhĭk bơh Brah Ndu prơh tât gay rkhŭk may.

¹⁶ Dăn ma kôranh hên ntĭnh hom ma phung oh mon may dôl gŭ panăp may joi du huê gĭt kreh gong rêng, tơlah Brah Ndu prơh brah mhĭk tât, păng mra kreh gong rêng jêh ri may mra geh nau bonh leng.”

¹⁷ Y-Sôl lah ma phung oh mon păng: “Khân may hăn joi hom du huê bu klâu kreh gong rêng ueh, jêh nây leo păng ma gâp.”

¹⁸ Du huê tâm phung oh mon plơ̆ lah: “Gâp saơ jêh du huê kon bu klâu Y-Yêsê, bunuyh Ƀêtlêhem, kreh gong rêng blau ngăn, jêng du huê tahan janh ktang jêh ri du huê tahan blau tâm lơh. Păng blau mĭn tâm nau ngơi, jêh ri săk jăn jêng ueh ngăn jêh ri Brah Ndu gŭ ndrel păng.”

¹⁹ Y-Sôl prơh phung mbơh văch ma Y-Yêsê, jêh ri lah: “Prơh hom Y-Đavit, kon bu klâu may, jêng nơm gŭ chiăp biăp văch ma gâp.”

²⁰ Y-Yêsê sŏk piăng let, du nông ntâu bêng ndrănh n'gân klơ du mlâm seh bri, jêh ri nhŭp du mlâm be kon hôm pu toh, jêh nây njuăl Y-Đavit, kon păng nơm, djôt leo ndơ nây ma Y-Sôl.

²¹ Y-Đavit hŏ tât ma Y-Sôl jêh ri lăp pah kan ma păng. Y-Sôl rŏng ngăn ma Y-Đavit jêh ri păng jêng nơm tuy ndơ tâm lơh ma Y-Sôl.

²² Y-Sôl njuăl nơm hăn lah ma Y-Yêsê: “Ăn Y-Đavit gŭ tanăp gâp, yorlah păng ƀư ma gâp maak.”

²³ Bơh nĕ tât kăndơ̆, ăp tơ̆ Brah Ndu prơh brah mhĭk gŭ ta Y-Sôl, Y-Đavit sŏk gong rêng jêh ri kreh. Y-Sôl geh nau bonh leng, ueh maak, jêh ri brah mhĭk du luh bơh păng.