I Samuel 15 - Nau Brah Ndu Ngơi 2023

Nau tih tal bar Y-Saul: mâu djôt prăp nau Brah Ndu ntăm

¹ Y-Samuel lah ma Y-Sôl: “Brah Yêhôva prơh gâp hăn tŏ dak ƀâu kah ma may gay chiă uănh ma phung Israel jêng phung ƀon lan Păng. Pônây aƀaơ, gŭ iăt hom nau Brah Yêhôva lah.

² Brah Yêhôva ma phung tahan lah: ‘Gâp mra tâm rmal phung Amalek ma nau khân păng king trong ma phung Israel rnôk khân păng hăn luh tă bơh Êjipt.

³ Pôri aƀaơ, hăn hom tâm lơh đah phung Amalek jêh ri ƀư rai lĕ rngôch ndơ khân păng geh. May mâu mra yô̆ nđach ôh khân păng, nkhĭt lơi lĕ bu klâu, bu ur, phung kon se, lĕ ndrôk, biăp, seh samô jêh ri seh bri.’”

⁴ Pôri, Y-Sôl kuăl rgum phung ƀon lan jêh ri kơp phung tahan ta Têlaim: geh bar rsen nuyh tahan hăn jâng, jêh ri du rmưn nuyh Yuđa.

⁵ Y-Sôl djôt phung tahan păng tât ta ƀon phung Amalek jêh ri gŭ kâp tâm rlŭng.

⁶ Y-Sôl lah ma phung Kênit: “Du rŭch hom khân may, tâm nkhah hom luh bơh phung Amalek, klach lah gâp ƀư rai khân may nđâp ma khân păng. Yorlah khân may hŏ ƀư nau yô̆ ma lĕ rngôch phung Israel tơlah khân păng du luh tă bơh Êjipt.” Pônây, phung Kênit tâm nkhah luh bơh phung Amalek.

⁷ Y-Sôl tâm lơh đah phung Amalek ntơm bơh Havila tât ta Sur, mpeh tra năp Êjipt.

⁸ Păng nhŭp rêh Y-Agak, hađăch phung Amalek, jêh nây ƀư rai lĕ rngôch ƀon lan ma mpiăt đao.

⁹ Ƀiălah Y-Sôl jêh ri phung ƀon lan mâu nkhĭt Y-Agak, mâu đŏng nkhĭt lĕ mpô mpa ueh lơn tâm phung ndrôk jêh ri biăp, lĕ mpô mpa lay rmŏng, lĕ biăp kon, jêh ri lĕ rngôch mpô mpa ueh lơn. Khân păng mâu ŭch ƀư rai ôh lĕ mpa nây, knŏng ƀư rai lĕ rngôch mpô mpa mâu ueh jêh ri mâu geh khlay.

Brah Ndu chalơi hađăch Y Saul

¹⁰ Nôk nây, geh nau Brah Yêhôva lah ma Y-Samuel:

¹¹ “Gâp lĕ nhhuach jêh njêng ăn ma Y-Sôl jêng hađăch, yorlah păng ndôn kơi tă bơh Gâp, mâu ƀư tĭng nâm nau Gâp ntăm.” Y-Samuel rngot ngăn, jêh ri păng vơl dăn ma Brah Yêhôva du măng kŏ ang.

¹² Kah ôi taơ, păng kah rngăl ơm ôi hăn tâm mâp đah Y-Sôl. Geh bunuyh tât nkoch ma Y-Samuel: “Y-Sôl lĕ hăn tât ta Karmel, ndâk du ntŭk ndray ma păng nơm ta nây, pônây păng plĕch trong, hăn trŭnh ta Gilgal.”

¹³ Y-Samuel hăn tât ma Y-Sôl, jêh ri Y-Sôl lah ma păng: “Dăn ma Brah Yêhôva ăn nau ueh uĭn ma may! Gâp ƀư jêh tĭng nâm nau Brah Yêhôva ntăm.”

¹⁴ Y-Samuel ôp: “Pônây mâm dĭng geh bâr biăp nhhiăng tât ta tôr gâp, nđâp ma bâr ndrôk?”

¹⁵ Y-Sôl plơ̆ lah: “Phung ƀon lan têk leo păng sĭt tă bơh phung Amalek, khân păng nhhuach ngăn ma lĕ mpô mpa ueh lơn tâm lĕ biăp jêh ri lĕ ndrôk ŭch ƀư mpa ƀư brah nhhơr ma Yêhôva Brah Ndu may. Bi mpô mpa ƀaƀă hên hŏ ƀư rai lĕ ƀhiau.”

¹⁶ Y-Samuel lah ma Y-Sôl: “Gŭ klêm hom! Gâp mra mbơh ma may nau Brah Yêhôva ngơi jêh ma gâp măng ndơh.” Y-Sôl plơ̆ lah: “Ngơi hom.”

¹⁷ Y-Samuel lah: “Nôk may saơ may nơm hôm jê̆, mâu hĕ may jêng kôranh ma phung mpôl băl Israel? Mâu di hĕ Brah Yêhôva tŏ dak ƀâu kah ăn may chiă uănh ma phung Israel?

¹⁸ Brah Yêhôva prơh jêh may hăn nđâp ma nau ntăm: ‘Hăn hom, ƀư rai lĕ rngôch phung tih mhĭk nây, jêng phung Amalek, jêh ri tâm lơh đah khân păng kŏ tât nôk may ƀư rai lĕ khân păng.’

¹⁹ Ƀiălah mâm dĭng may mâu tông bâr Brah Yêhôva? Mâm ƀư may rduh lăp sŏk ndơ pit jêh ri ƀư nau mhĭk tanăp măt Brah Yêhôva?”

²⁰ Y-Sôl plơ̆ sĭt lah ma Y-Samuel: “Gâp hŏ iăt tĭng jêh nau ngơi Brah Yêhôva. Gâp lĕ ƀư tĭng nâm nau Brah Yêhôva jao ma gâp. Gâp hŏ djôt leo Y-Agak, hađăch phung Amalek sĭt, jêh ri ƀư rai jêh lĕ rngôch phung Amalek.

²¹ Ƀiălah tă bơh tâm ndơ pit sŏk, phung ƀon lan sŏk jêh biăp jêh ri ndrôk, jêng mpô mpa dŭt ueh ngăn tâm mpô mpa ƀư rai lĕ, gay ŭch nhhơr ma Yêhôva Brah Ndu may ta Gilgal.”

²² Y-Samuel lah: “Brah Yêhôva mâu prot maak ma ndơ ƀư brah gŭch jêh ri ma lĕ mpa ƀư brah, Ban nau tông bâr Brah Yêhôva? Pôri, nau tông bâr jêng ueh lơn đah mpa ƀư brah, Ma nau iăt tĭng jêng ueh lơn đah ngi biăp nkuăng.

²³ Nau tâm rdâng geh nau tih nâm bu nau tih n'hŭm nklă, Nau dăng bôk geh nau tih nâm bu nau tih mbah rup brah. Yorlah may chalơi jêh nau Brah Yêhôva ngơi Pôri Păng ăt chalơi may, mâu ăn ma may chiă uănh đŏng ôh.”

²⁴ Y-Sôl plơ̆ lah ma Y-Samuel: “Gâp lĕ ƀư tih jêh, yorlah gâp ƀư tih jêh nau vay Brah Yêhôva ntăm jêh ri nau may ngơi. Yorlah Gâp klach ma phung ƀon lan jêh ri iăt tĭng nau khân păng.

²⁵ Aƀaơ, dăn may yô̆ an hom ma nau tih gâp, plơ̆ sĭt ndrel ma gâp, gay ma gâp yơk mbah Brah Yêhôva.”

²⁶ Y-Samuel plơ̆ lah ma Y-Sôl: “Gâp mâu plơ̆ sĭt ndrel ma may ôh. Yorlah may lĕ chalơi jêh nau Brah Yêhôva ngơi, yor ri Brah Yêhôva chalơi jêh may, mâu ăn ma may chiă uănh phung Israel đŏng ôh.”

²⁷ Tơlah Y-Samuel ndôn kơi hăn, Y-Sôl kuăn ta ntôr ao jâr păng kŏ tât khêk.

²⁸ Y-Samuel lah ma păng: “Nar aơ Brah Yêhôva lĕ nkhêk jêh ƀon bri hađăch Israel tă bơh may kơt nĕ, gay ăn ma du huê bunuyh chiau meng may, jêng nơm ueh lơn ma may.

²⁹ Rlau lơn ma nĕ, Kôranh Brah Chrêk Rmah phung Israel mâu ngơi mƀruh ôh, mâu plĕch rgâl nau mĭn ôh, yorlah Păng mâu jêng du huê bunuyh dĭng bu dơi plĕch rgâl nau mĭn!”

³⁰ Y-Sôl lah: “Gâp lĕ ƀư tih jêh, ƀiălah yơk hom ma gâp tanăp phung kôranh bu ranh phung ƀon lan gâp, jêh ri tanăp lĕ rngôch bunuyh ƀon lan Israel. Dăn may plơ̆ văch hom ndrel ma gâp, gay ăn gâp dơi yơk mbah ma Yêhôva Brah Ndu may.”

³¹ Pôri, Y-Samuel plơ̆ sĭt ndrel ma Y-Sôl, jêh ri Y-Sôl yơk mbah ma Brah Yêhôva.

³² Jêh nây, Y-Samuel lah: “Njŭn leo Y-Agak, hađăch phung Amalek ma gâp.” Y-Agak văch tât ma păng ma nau maak yorlah păng mĭn pô aơ: “Nanê̆ ngăn nau rngot ma nau khĭt lĕ rlau jêh.”

³³ Ƀiălah Y-Samuel lah: “Nâm bu đao may hŏ ăn jêh ma bu ur lĕ roh kon, Pônây lĕ mê̆ may mra roh kon.” Jêh ri Y-Samuel nkhĭt Y-Agak tanăp Brah Yêhôva ta Gilgal.

³⁴ Y-Samuel hăn sĭt ma Rama, bi Y-Sôl plơ̆ sĭt ma ngih păng nơm ta Gibêa.

³⁵ Bơh nĕ kŏ tât nar Y-Samuel khĭt, păng mâu hôm tâm mâp đah Y-Sôl. Ƀiălah, Y-Samuel rngot ngăn yor Y-Sôl. Bi Brah Yêhôva nhhuach yorlah hŏ njêng jêh Y-Sôl jêng hađăch ma phung Israel.