I Samuel 14 - Nau Brah Ndu Ngơi 2023

Nau Y-Jônathan dơi tâm lơh

¹ Du nar, Y-Jônathan, kon Y-Sôl, lah ma bu klâu ndăm tuy ndơ tâm lơh ma păng: “Kay lŏng, he hăn rgăn hom pôih tahan phung Philistin gŭ mpeh đah ri.” Ƀiălah păng mâu mbơh ôh ma mbơ̆ păng gĭt.

² Nôk nây, Y-Sôl dôl ƀư pôih tahan ta mpâr ƀon Gibêa, tâm dâng tơm play pom gra nat ta Migrôn, jêh ri phung tahan hăn tĭng păng geh tâm prao rhiăng nuyh.

³ Geh Y-Ahija, kon Y-Ahitup (Y-Ahitup jêng nâu Y-Ikabôt, kon Y-Phinêas, sau Y-Êli, kôranh ƀư brah Brah Yêhôva ta Silô), nôk nây nsoh ao êphôt. Bu mâu gĭt ôh ma Y-Jônathan lĕ hăn du jêh.

⁴ Ta ntŭk trong yôk Y-Jônathan joi ŭch hăn rgăn kăt tât ta pôih tahan phung Philistin, geh bar n'gơn yôk lŭ, n'gơn yôk đah aơ rnha jêng Bôse jêh ri n'gơn yôk đah ri rnha jêng Sênê.

⁵ N'gơn yôk lŭ mpeh dor gŭ tra năp Mikmas, bi n'gơn yôk mpeh rđŭng gŭ tra năp Gêba.

⁶ Y-Jônathan lah ma bunuyh ndăm tuy ndơ păng tâm lơh: “Kay lŏng, he hăn tât ta pôih phung mâu geh koh ntâu aơ. Klăp lah Brah Yêhôva mra ƀư ăn ma he. Nđâp tơlah djê̆ bunuyh mâu lah âk bunuyh, mâu geh du ntil ndơ king ôh Brah Yêhôva ƀư ma he dơi tâm lơh.”

⁷ Nơm tuy ndơ tâm lơh ma păng, lah: “Ƀư lĕ ntil nau may ŭch, gâp geh du nuih n'hâm ndrel ma may lĕ.”

⁸ Y-Jônathan lah: “Aơ, he hăn hom tât ntŭk ma phung nây jêh ri gay ma khân păng saơ he.

⁹ Tơlah khân păng lah: ‘Gŭ kâp hom hên hăn tât ta ntŭk khân may,’ he mra dâk ta ntŭk jêh ri mâu mra hăn hao ndrel ma khân păng ôh.

¹⁰ Bi tơlah khân păng lah: ‘Hao hom ma hên,’ pôri he mra hăn hao, yorlah nĕ jêng nau mbên Brah Yêhôva jao jêh khân păng tâm ti he.”

¹¹ Pôri, lĕ bar hê mpơl khân păng nơm tanăp pôih phung Philistin. Phung Philistin lah: “Ri, phung Hêbrơ du luh tă bơh trôm ntŭk khân păng tă krap.”

¹² Phung tahan tâm pôih kuăl ma Y-Jônathan jêh ri nơm tuy ndơ tâm lơh păng: “Văch hom ma hên! Hên geh du nau ŭch lah đah khân may.” Y-Jônathan lah ma nơm tuy ndơ tâm lơh: “Hao tĭng gâp, yorlah Brah Yêhôva hŏ jao jêh khân păng tâm ti phung Israel.”

¹³ Y-Jônathan vơr hao klơ ma jâng ti, jêh ri nơm tuy ndơ tâm lơh vơr tĭng păng. Phung Philistin cha lôt panăp Y-Jônathan, jêh ri nơm tuy ndơ tâm lơh nkhĭt khân păng khĭt pakơi păng.

¹⁴ Tâm nau tâm lơh tal nguay aơ, Y-Jônathan jêh ri nơm tuy ndơ tâm lơh nkhĭt klăp tâm bar jât nuyh, tâm du ntŭk neh dĭ klăp lah n'gul hectar.

¹⁵ Nau klach tât tâm lam pôih tahan, tâm mir, jêh ri tâm lĕ phung ƀon lan Philistin. Phung tahan tâm pôih tâm ban đŏng phung tahan hăn lơh ntŭng krit da dê, neh n'gơ n'găr. Nây jêng nau krit toyh ngăn bơh Brah Ndu ƀư.

¹⁶ Phung tahan gak Y-Sôl ta Gibêa n'gor Benjamin, saơ phung tahan Philistin lĕ rŭng răng da dê jêh ri nchuăt chah pru pra.

¹⁷ Nôk nây, Y-Sôl lah ma phung tahan gŭ ndrel ma păng: “Kơp hom gay gĭt mbu moh lĕ chalơi phung tahan he.” Khân păng kơp jêh ri mâu saơ ôh Y-Jônathan jêh ri nơm tuy ndơ tâm lơh ma păng.

¹⁸ Y-Sôl lah ma Y-Ahija: “Djôt leo hom Hip Nau Tâm Rnglăp Brah Ndu văch ta aơ.” (Yorlah rnôk nây, Hip Nau Tâm Rnglăp Brah Ndu bu tung leo ndrel phung Israel).

¹⁹ Ƀiălah dôl Y-Sôl ngơi ma kôranh ƀư brah, geh bâr ngơi drơu-drơu lơ hâu ktang lơn tâm nklang pôih phung Philistin. Y-Sôl lah ma kôranh ƀư brah: “Rhuăt lơi ti may!”

²⁰ Jêh nây Y-Sôl jêh ri lĕ rngôch phung tahan gŭ ndrel ma păng rgum băl jêh ri hăn tât ntŭk tâm lơh. Ri, khân păng saơ phung Philistin rŭng răng toyh ngăn, tŏk đao gay ntâp nkhĭt ndrăng băl păng nơm.

²¹ Bi phung Hêbrơ alor hŏ tĭng jêh phung Philistin, gŭ tâm pôih tahan ndrel khân păng, aƀaơ plơ̆ sĭt ndrel ma phung Israel tĭng Y-Sôl jêh ri Y-Jônathan.

²² Lĕ rngôch phung Israel dôl gŭ krap nde tâm n'gor klơ dor yôk Êphraim, tăng nau phung Philistin lĕ nchuăt du, jêh ri tĭng lơh rgot khân păng.

²³ Nar nây, Brah Yêhôva tâm rklaih phung Israel; jêh ri nau tâm lơh rlau ma ƀon Bet-Aven.

Nau Y-Saul ton mâu geh mĭn lor

²⁴ Tâm nar nây lĕ, phung Israel hŏ huăr ngăn jêh yorlah Y-Sôl sơm ton ma phung ƀon lan pô aơ: “Geh nau rak rtăp ma mbu moh sông sa du ntil ndơ lor tơlah ê-hŏ nhâp nar, nâm bu ntĭt lor gâp plơng har lôch jêh ma phung rlăng gâp!” Yor ri, lĕ rngôch phung ƀon lan mâu nănh sông sa nhêt du ntil ndơ ôh.

²⁵ Jêh nây khân păng hăn tât ta bri krŏng geh dak sŭt ta neh.

²⁶ Rnôk nây, phung ƀon lan hăn lăp tâm krŏng, saơ mpơng sŭt aơ truh dak, ƀiălah mâu geh nuyh janh nsiăm ti ta trôm mbung ôh, yorlah phung ƀon lan klach ma nau ton.

²⁷ Bi Y-Jônathan mâu gĭt ôh nau mbơ̆ păng ton đah phung ƀon lan, pônây păng yơr chiông mâng păng djôt ta ti, păng sŏch chiông mâng nây ta mpơng sŭt, jêh ri nsiăm ti dak sŭt ta trôm mbung, pôri măt păng ang rah vah ro.

²⁸ Geh du huê tâm phung ƀon lan lah ma păng gĭt: “Mbơ̆ may hŏ ton ma phung ƀon lan pô aơ: ‘Geh nau tak rtăp ma mbu moh sông sa du ntil ndơ nar aơ.’ Yor nây phung ƀon lan lĕ huăr ngăn jêh.”

²⁹ Y-Jônathan lah: “Mbơ̆ gâp hŏ ƀư jêh nau rŭng răng tay ma n'gor. Uănh hom, yorlah gâp ler djê̆ lê̆ dak sŭt aơ măt gâp jêng ang rah vah jêh!

³⁰ Ơ! Jêng ueh lơn yơh tơlah phung ƀon lan sông sa nar aơ ndơ khân păng sŏk gro tă bơh phung rlăng; yorlah aƀaơ nau nkhĭt phung Philistin mâu jêng toyh ir ôh!”

³¹ Nar aơ, phung Israel dơi lơh phung Philistin ntơm bơh Mikmas tât ma Aijalon.

³² Phung ƀon lan lĕ ji ngot huăr ngăn pôri khân păng rduh lăp sŏk ndơ pit sŏk, nhŭp biăp ndrôk, jêh ri ndrôk kon, nkhĭt ta neh, jêh nây phung ƀon lan sa puăch hôm e mham.

³³ Geh nơm mbơh ma Y-Sôl: “Aơ, phung ƀon lan ƀư tih đah Brah Yêhôva dôl sa puăch hôm e mham.” Păng lah: “Khân may ƀư ƀlêp ƀlêr! Rlă hom du mlâm lŭ toyh ma gâp ta aơ.”

³⁴ Y-Sôl lah: “Hăn hom văch ta phung ƀon lan, mbơh ma khân păng pô aơ ăp nơm têk leo biăp jêh ri ndrôk ma gâp, jêh nây sreh păng ta aơ jêh ri sa puăch. Lơi ta ƀư tih ôh đah Brah Yêhôva dôl sa puăch hôm e mham.” Pônây tâm kêng măng nây, ăp nơm tâm phung ƀon lan têk leo mpô mpa rong khân păng ndrel jêh ri sreh ta klơ lŭ nây.

³⁵ Y-Sôl ndâk du mlâm nơng ƀư brah ma Brah Yêhôva. Nây jêng nơng ƀư brah tal nguay păng hŏ ndâk jêh ma Brah Yêhôva.

Y-Jônathan tâm tra đah nau khĭt

³⁶ Pakơi nau nây, Y-Sôl lah: “He jŭr hom hăn tĭng phung Philistin du măng aơ, pit in ƀư rai khân păng kŏ tât ang ôi, jêh ri lơi om du huê nuyh hôm rêh.” Khân păng lah: “Ƀư hom lĕ nau may mĭn di.” Ƀiălah kôranh ƀư brah lah: “He mbơh sơm hom ma Brah Yêhôva, ta aơ.”

³⁷ Y-Sôl ôp ma Brah Ndu: “Gâp mra hăn jŭr jêh ri hăn tĭng phung Philistin lĕ? May mra jao khân păng tâm ti phung Israel lĕ?” Ƀiălah nar nây, Brah Ndu mâu plơ̆ lah ôh ma păng.

³⁸ Yor ri, Y-Sôl ntăm: “Lĕ rngôch phung kôranh chiă uănh phung tahan hăn văch hom ta aơ, gay uănh nar aơ mbu hŏ ƀư tih jêh.

³⁹ Yorlah tĭng nâm Brah Yêhôva gŭ rêh mro mrăng, jêng Nơm tâm rklaih phung Israel, phung hŏ ƀư tih jêh nđâp lah nây jêng Y-Jônathan, kon bu klâu gâp, nanê̆ păng mra khĭt!” Mâu geh du huê nuyh tâm phung ƀon lan plơ̆ sĭt lah ôh ma păng.

⁴⁰ Păng lah ma lĕ rngôch phung Israel: “Khân may dâk hom đah aơ, gâp jêh ri Y-Jônathan, kon bu klâu gâp, mra dâk đah ri.” Phung ƀon lan lah ma Y-Sôl: “Ƀư hom nau may mĭn di.”

⁴¹ Y-Sôl ngơi ma Brah Yêhôva: “Ơ, Yêhôva Brah Ndu phung Israel! Ăn nau mpơl nau nanê̆.” Bi Y-Jônathan jêh ri ma Y-Sôl, ƀiălah phung ƀon lan klaih.

⁴² Y-Sôl lah: “Ƀư nau nchroh ta nklang gâp jêh ri Y-Jônathan, kon bu klâu gâp.” Jêh ri nau nchroh di ma Y-Jônathan.

⁴³ Y-Sôl lah ma Y-Jônathan: “Lah hom ma gâp gĭt moh nau may hŏ ƀư tih jêh.” Y-Jônathan mbơh ma păng: “Gâp sŏk chiông mâng djôt tâm ti gay ler jêh djê̆ lê̆ dak sŭt. Aơ, ăn gâp khĭt.”

⁴⁴ Y-Sôl lah: “Hơi Y-Jônathan, tơlah may mâu khĭt, dăn Brah Ndu ƀư nau tât ma gâp jâk jêr.”

⁴⁵ Ƀiălah phung ƀon lan lah ma Y-Sôl: “Y-Jônathan jêng nơm hŏ ƀư jêh ma phung Israel geh nau dơi toyh nâm pônây, mâm ƀư Y-Jônathan mra khĭt? Mâu geh pônây ôh! Nanê̆ tĭng nâm Brah Yêhôva gŭ rêh mro mrăng, nđâp lah du rse sŏk klơ bôk păng mâu mra rŭng ta neh ôh, yorlah păng ƀư kan ndrel ma Brah Ndu nar aơ.” Pôri, phung ƀon lan tâm rklaih Y-Jônathan, jêh ri păng mâu geh khĭt ôh.

⁴⁶ Y-Sôl mâu hôm tĭng lơh ôh phung Philistin; bi phung Philistin sĭt ma n'gor khân păng nơm.

Y-Saul tâm lơh tay

⁴⁷ Nôk Y-Sôl dơn nau dơi jêng hađăch ma phung Israel, păng tâm lơh đah lĕ rngôch phung rlăng gŭ văr jŭm păng, nâm phung Môap, phung Ammôn, phung Êđôm, phung hađăch n'gor Sôba, jêh ri phung Philistin. Păng tâm lơh dơi lĕ rngôch ntŭk păng hăn.

⁴⁸ Păng ƀư ma nau ktang, dơi lơh phung Amalek jêh ri tâm rklaih phung Israel tă bơh ti phung sŏk pit jêh khân păng.

⁴⁹ Y-Sôl geh phung kon bu klâu jêng Y-Jônathan, Y-Isvi, jêh ri Y-Malki-Sua; păng geh đŏng bar hê kon bu ur: nơm deh lor lơn amoh H'Mêrap, jêh ri nơm jê̆ amoh H'Mikal.

⁵⁰ Ur Y-Sôl amoh H'Ahinôam, kon bu ur Y-Ahimas. Kôranh tahan phung tahan Y-Sôl jêng Y-Apner, kon Y-Ner (Y-Ner jêng kônh Y-Sôl).

⁵¹ Y-Kis, mbơ̆ Y-Sôl; bi Y-Ner, mbơ̆ Y-Apner, jêng kon Y-Abiêl.

⁵² Tâm lĕ nau rêh Y-Sôl geh ƀaƀơ nau tâm lơh ktang ngăn đah phung Philistin. Tơlah Y-Sôl saơ du huê bu klâu ktang jêh ri janh, păng sŏk dŏng păng ăn ma păng nơm.