I Samuel 13 - Nau Brah Ndu Ngơi 2023

Nau tih tal nguay bơh Y-Sôl: nhhơr êng ndơ ƀư brah gŭch

¹ Y-Sôl ntơm jêng hađăch, nôk păng hŏ geh jêh puăn jât năm. Păng hŏ chiă uănh phung Israel ... jêh ri bar năm.

² Y-Sôl săch pe rbăn nuyh Israel: bar rbăn nuyh gŭ n'hanh păng ta Mikmas jêh ri klơ yôk Bêthel, bi du rbăn nuyh gŭ ndrel ma Y-Jônathan ta Gibêa tâm n'gor Benjamin. Păng mplơ̆ sĭt phung ƀon lan hôm e, ăp nơm sĭt ma ngih vâl khân păng nơm.

³ Y-Jônathan dơi tâm lơh đah pôih phung tahan Philistin ta Gêba, phung Philistin gĭt nau nây. Bi Y-Sôl ăn bu uh nŭng lam n'gor jêh ri lah pô aơ: “Phung ƀon lan Hêbrơ gŭ iăt hom!”

⁴ Pônây, lĕ rngôch phung Israel lĕ gĭt jêh Y-Sôl dơi lơh pôih phung tahan Philistin, jêh ri phung Philistin tâm rmot đah phung Israel. Rnôk nây, bu kuăl phung ƀon lan hăn tĭng Y-Sôl ta Gilgal.

⁵ Rnôk nây, phung Philistin tâm rƀŭn rgum gay tâm lơh đah phung Israel. Khân păng geh pe rmưn ndeh seh, prao rbăn nuyh tahan ncho seh, jêh ri phung tahan âk ngăn nâm bu choih ta kơh dak mƀŭt. Khân păng hăn hao ƀư pôih tahan ta Mikmas, mpeh luh nar Bet-Aven.

⁶ Tơlah phung Israel saơ khân păng jêr ngăn jêh, yorlah khân păng tĭng nchueng dăch ngăn ma phung Israel, pôri phung ƀon lan du krap tâm lĕ trôm lŭ, rlô si, rkâp lŭ, môch blang jêh ri ntu brŏng.

⁷ Bar pe bunuyh Hêbrơ êng rgăn dak krong Yurdan, hăn tât ta Gat jêh ri Gilêat. Ƀiălah Y-Sôl ăt hôm gŭ ta Gilgal, jêh ri lĕ rngôch phung hăn tĭng păng klach sâr da dê.

⁸ Y-Sôl gŭ kâp pơh nar, jêng năng nar Y-Samuel hŏ dăp nal jêh. Ƀiălah Y-Samuel ê hŏ hăn tât ôh ta Gilgal, bi phung ƀon lan chalơi hađăch Sôl jêh ri du pru pra.

⁹ Rnôk nây, Y-Sôl lah: “Djôt leo hom ndơ ƀư brah gŭch tât ma gâp jêh ri ndơ ƀư brah ma nau đăp mpăn.” Jêh nây păng nhhơr ndơ ƀư brah gŭch.

¹⁰ Tơlah păng mhe nhhơr ndơ ƀư brah gŭch lĕ lôch jêh Y-Samuel văch tât. Y-Sôl hăn luh vơt gay mbah păng.

¹¹ Y-Samuel ôp: “Moh ndơ may hŏ ƀư?” Y-Sôl plơ̆ lah: “Gâp saơ phung ƀon lan lĕ chalơi gâp du pru pra, may mâu saơ tât tĭng năng nar hŏ nal jêh, jêh ri phung Philistin hŏ rgum băl ta Mikmas,

¹² ri dĭng gâp mĭn pô aơ phung Philistin nanê̆ bơi rduh lơh gâp ta Gilgal, jêh ri gâp ê hŏ kuăl mbơh sơm ma Brah Yêhôva yô̆ ôh. Yor nây, gâp geh nau sŏl êng gâp nơm gay nhhơr ndơ ƀư brah gŭch.”

¹³ Y-Samuel lah ma Y-Sôl: “May ƀư nau brŭt moih jêh, mâu djôt prăp ôh lĕ nau vay ntăm bơh Yêhôva Brah Ndu may hŏ ntăm ma may. Nanê̆, Brah Yêhôva hŏ njêng ƀon bri hađăch may nâp n'ho ro ma phung Israel;

¹⁴ ƀiălah aƀaơ, ƀon bri hađăch may mâu mra nâp jŏ ôh. Brah Yêhôva hŏ săch ăn ma Păng nơm du huê bunuyh tĭng nâm nuih n'hâm Păng nơm, dơm bunuyh nây ƀư kôranh chiă uănh ma phung ƀon lan Păng, yorlah may mâu djôt prăp ôh nau ntăm ƀư Brah Yêhôva.”

¹⁵ Lah lôch jêh, Y-Samuel dâk hăn, tă bơh Gilgal tât ta Gibêa tâm n'gor Benjamin, bi Y-Sôl kơp phung tahan gŭ ndrel ma păng, geh klăp lah prao rhiăng nuyh.

Rơm ndrăp ma nau tâm lơh

¹⁶ Y-Sôl jêh ri Y-Jônathan, kon bu klâu păng, nđâp ma phung tahan hăn tĭng păng, ƀư pôih ta Gêba tâm n'gor Benjamin, bi phung Philistin ƀư ntŭk pôih ta Mikmas.

¹⁷ Tă tâm pôih phung tahan Philistin geh du phung tahan hăn lơh ntŭng, tâm pă pe phung: du phung aơ tĭng trong Ôphra, hăn tât ta n'gor Sual,

¹⁸ du phung êng hăn tĭng trong Bet-Hôron; hôm du phung tal pe đŏng tĭng trong n'har bri dăch tâm rlŭng Sêbôim, tât ta mpeh bri rdah.

¹⁹ Nôk nây taơ, tâm lĕ rngôch n'gor Israel mâu geh ôh bunuyh kan chiăr, yorlah phung Philistin hŏ lah: “Mâu ăn ma phung Hêbrơ chiăr ma khân păng nơm đao jêh ri tak.”

²⁰ Yor ri, lĕ rngôch phung Israel hăn trŭnh ma ntŭk phung Philistin gay chiăr kau chuar, kau kuơk, sung jêh ri nhuĕ ma khân păng nơm.

²¹ Tơlah lĕ kau chuar, kau kuơk, nchraih, sung mâu lah mâng loih pê̆ch bet, khân păng hăn tôl drep jêh ri nkra tay mplanh mâng loih.

²² Yor nây tâm nar bu tâm lơh, lĕ rngôch phung hăn tĭng Y-Sôl jêh ri Y-Jônathan mâu geh ôh đao mâu lĕ geh tak djôt ta ti; knŏng ma Y-Sôl jêh ri kon bu klâu păng jêng Y-Jônathan dơm geh.

²³ Du phung tahan Philistin hăn luh ƀư pôih ta yôk Mikmas.