I Samuel 12 - Nau Brah Ndu Ngơi 2023

Y-Samuel ntĭnh ntăm

¹ Nôk nây, Y-Samuel lah ma lĕ rngôch phung Israel: “Aơ, gâp tăng jêh lĕ nau ngơi khân may lah jêh ma gâp, jêh ri gâp hŏ njêng jêh du huê hađăch ma khân may.

² Aƀaơ, hađăch nĕ mra chiă uănh khân may. Bi gâp hŏ ranh jêh, sŏk ndra jêh, phung kon bu klâu gâp gŭ ndrel ma khân may. Gâp hŏ chiă uănh khân may ntơm bơh gâp hôm kon se jê̆ tât ta nar aơ.

³ Aơ, gâp dâk ta aơ. Nkoch mbơh hom ma gâp tanăp Brah Yêhôva jêh ri tanăp nơm Păng tŏ jêh dak ƀâu kah: Mbu ndrôk gâp mâp sŏk jêh? Mâu lah mbu seh bri gâp mâp sŏk jêh? Mâu lah mbu nơm gâp geh ndơm mƀruh? Mbu nơm gâp tŭn jot jêh? Mbah tă ti gâp lĕ mâp sŏk jêh drăp bu blŏl gay nkŭm lơi măt gâp ma ndơ nây? Tơlah geh, gâp mra mplơ̆ sĭt ndơ nây ma khân may.”

⁴ Khân păng lah: “May mâu mâp ndơm mƀruh hên ôh, mâu lah tŭn jot hên, jêh ri mâu lah sŏk dơn jêh moh ndơ tă bơh ti bu.”

⁵ Păng lah tay: “Brah Yêhôva jêng nơm mbơh tâm rdâng ma khân may, jêh ri nơm Păng tŏ jêh dak ƀâu kah mbơh đŏng pô aơ nar aơ ma nau khân may mâu saơ du ntil ndơ ôh tâm ti gâp.” Khân păng lah: “Dăn Păng jêng Nơm mbơh an!”

⁶ Y-Samuel lah ma phung ƀon lan: “Brah Yêhôva jêng Nơm hŏ njêng Y-Môis jêh ri Y-Arôn, njŭn leo chô yau khân may du luh tă bơh n'gor bri Êjipt.

⁷ Pôri aƀaơ, dâk hom ta aơ. Gâp mra rlăch đah khân may tanăp Brah Yêhôva yor lĕ kan sŏng srăng Brah Yêhôva hŏ ƀư jêh ma khân may jêh ri chô yau khân may.

⁸ Jêh Y-Yakôb tât ta n'gor bri Êjipt, chô yau khân may vơl dăn ma Brah Yêhôva, Păng prơh Y-Môis jêh ri Y-Arôn hăn njŭn leo chô yau khân may du luh tă bơh n'gor bri Êjipt, jêh ri ăn ma khân păng gŭ tâm ntŭk aơ.

⁹ Ƀiălah khân păng chuêl jêh Yêhôva Brah Ndu khân păng, yor ri Păng jao khân păng ăn tâm ti Y-Sisêra, kôranh tahan ta Hasôr, tâm ti phung Philistin jêh ri hađăch bri Môap; phung aơ tâm lơh đah khân păng.

¹⁰ Rnôk nây, khân păng vơl dăn ma Brah Yêhôva, jêh ri lah: ‘Hên ƀư tih jêh, yorlah hên lĕ chalơi jêh Brah Yêhôva gay pah kan ma phung brah Baal jêh ri ma brah Astarôt. Ƀiălah aƀaơ, tâm rklaih hom hên tă bơh ti phung rlăng hên, hên mra pah kan ma May.’

¹¹ Brah Yêhôva prơh jêh Y-Jêrubaal, Y-Bêdan, Y-Jêptê, jêh ri Y-Samuel gay tâm rklaih khân may bơh ti phung rlăng gŭ jŭm khân may, jêh ri khân may dơi rêh đăp mpăn.

¹² Ƀiălah tơlah khân may saơ Y-Nahas, hađăch phung Ammôn, văch lơh khân may, khân may lah ma gâp pô aơ: ‘Mâu ôh, ăn geh du huê hađăch chiă uănh hên;’ nđâp lah Yêhôva Brah Ndu khân may hŏ jêng Hađăch ma khân may jêh.

¹³ Aƀaơ, aơ jêng hađăch khân may hŏ săch jêh ri lĕ mbơh sơm. Brah Yêhôva hŏ njêng păng ƀư hađăch chiă uănh khân may.

¹⁴ Tơlah khân may klach yơk ma Brah Yêhôva, pah kan ma Păng, iăt tông tĭng nau Păng ngơi, mâu tâm rdâng ôh lĕ nau vay Păng ntăm, tơlah khân may jêh ri hađăch chiă uănh khân may, tông bâr ma Brah Ndu khân may, pôri jêng ueh ngăn ma khân may.

¹⁵ Bi tơlah khân may mâu tông ôh bâr Brah Yêhôva, ƀiălah tâm rdâng đah nau vay Păng ntăm, ti Brah Yêhôva mra ƀư mhĭk ma khân may nâm bu păng hŏ ƀư mhĭk ma chô yau khân may.

¹⁶ Pôri, aƀaơ dâk hom ta aơ, gay uănh kan toyh Brah Yêhôva mra ƀư tanăp măt khân may.

¹⁷ Nar aơ, mâu hĕ di jêng yan rek ba ƀlê? Gâp mra kuăl mbơh sơm ma Brah Yêhôva, jêh ri Păng mra ƀư lơp nglaih jêh ri mih. Ăn khân may gĭt jêh ri saơ ma nau dăn du huê hađăch jêng du nau tih toyh khân may hŏ ƀư tih tanăp măt Brah Yêhôva.”

¹⁸ Jêh nây Y-Samuel vơl dăn ma Brah Yêhôva. Tâm nar nây, Brah Yêhôva ƀư lơp nglaih jêh ri dak mih. Lĕ rngôch phung ƀon lan klach yơk ngăn ma Brah Yêhôva jêh ri ma Y-Samuel.

¹⁹ Lĕ rngôch phung ƀon lan lah ma Y-Samuel: “Mbơh sơm hom ma Yêhôva Brah Ndu may yor phung oh mon may, gay ma hên mâu khĭt ôh, yorlah hên hŏ ntop nau tih dăn du huê hađăch nđâp ma lĕ rngôch nau tih êng đŏng tâm hên.”

²⁰ Y-Samuel plơ̆ lah ma phung ƀon lan: “Lơi klach ôh! Ngăn, khân may lĕ ƀư jêh lĕ rngôch nau mhĭk aơ; ƀiălah, khân may lơi chalơi ôh Brah Yêhôva, ƀiălah ăn lĕ nuih n'hâm pah kan ma Păng,

²¹ lơi ta chalơi ôh Păng gay hăn tĭng lĕ rup brah dơm dam, khân păng mâu geh khlay ôh jêh ri mâu đŏng dơi tâm rklaih, yorlah khân păng knŏng jêng dơm dam.

²² Brah Yêhôva mâu mra chalơi ôh phung ƀon lan Păng, yor amoh toyh Păng, jêh ri yorlah Brah Yêhôva hŏ maak nuih n'hâm ăn ma khân may njêng du phung ƀon lan ma Păng nơm.

²³ Bi ma gâp mâu đŏng ƀư tih ma Brah Yêhôva jêh ri rlu mbơh sơm an ma khân may. Gâp mra nti ma khân may gĭt trong ueh jêh ri sŏng.

²⁴ Knŏng khân may klach yơk ma Brah Yêhôva, sŏk lĕ nuih n'hâm răp jăp pah kan ma Păng. Uănh hom lĕ nau kan toyh Păng hŏ ƀư jêh ma khân may!

²⁵ Ƀiălah, tơlah khân may ăt ƀư nau mhĭk khân may jêh ri hađăch khân may mra rai lĕ.”