I Samuel 11 - Nau Brah Ndu Ngơi 2023

Y-Sôl rklaih ƀon Jabes

¹ Y-Nahas, bunuyh Ammôn, hăn hao nchueng jŭm Jabes Gilêat. Lĕ rngôch bunuyh gŭ tâm Jabes lah ma Y-Nahas: “Dăn ndâk hom nau tâm rnglăp ma hên, hên mra pah kan ma may.”

² Y-Nahas, bunuyh Ammôn, lah ma khân păng: “Gâp mra ƀư nau tâm rnglăp ma khân may tĭng nau aơ: Rloch lơi măt pa ma lĕ rngôch phung khân may, gay ƀư bêk prêng lĕ rngôch phung Israel.”

³ Phung kôranh bu ranh Jabes lah ma păng: “Dăn ăn ma hên gŭ kâp pơh nar gay ma hên dơi prơh hăn phung mbơh tât lam n'gor Israel. Tơlah mâu geh bunuyh rklaih hên ôh, hên mra yơr ti đah may.”

⁴ Tơlah phung mbơh tât ta Gibêa, ƀon Y-Sôl, nkoch tay lĕ nau nây ăn phung ƀon lan tăng jêh ri lĕ rngôch bunuyh nhhiăng nhĭm da dê.

⁵ Nôk nây, Y-Sôl hăn sĭt tă bơh mir, hăn groi pakơi mpôl ndrôk. Păng ôp: “Mâm dĭng phung ƀon lan nhĭm kơt nây?” Bu nkoch tay lĕ nau phung Jabes ngơi jêh.

⁶ Tơlah Y-Sôl lĕ tăng jêh lĕ nau ngơi nây, Huêng Brah Ndu văch gŭ ndrel ma Y-Sôl ma nau brah, jêh ri păng hao ji nuih hâu ngăn.

⁷ Păng sŏk bar mlâm ndrôk, koh âk glo, prơh phung mbơh djôt leo hăn lam n'gor bri Israel jêh ri mbơh pô aơ: “Mbu mâu tĭng ôh Y-Sôl jêh ri Y-Samuel hăn tâm lơh, ndrôk păng bu mra ƀư tâm ban pônây.” Brah Yêhôva ƀư ăn phung ƀon lan klach krit, jêh ri khân păng hăn tâm lơh, lĕ rngôch phung nâm du huê bunuyh.

⁸ Tơlah Y-Sôl kơp phung tahan ta Bêsek geh pe rsen bunuyh Israel jêh ri geh pe rmưn bunuyh Yuđa.

⁹ Khân păng lah ma phung mbơh hŏ văch jêh tă bơh Gilêat pô aơ: “Hăn sĭt hom lah ma phung Jabes Gilêat kơt aơ: ‘Ôi taơ, tơlah nar hao prêh klơ, khân may mra geh nau tâm rklaih.’” Tơlah phung hăn mbơh tât jêh, jêh ri mbơh ma phung bu klâu ta ƀon Jabes, khân păng maak ngăn,

¹⁰ jêh ri khân păng lah ma phung Ammôn: “Ôi, taơ hên mra yơr ti đah khân may, jêh ri khân may mra ƀư ma hên tĭng nâm khân may mĭn ueh.”

¹¹ Ang ôi taơ, Y-Sôl tâm pă phung ƀon lan jêng pe phung, dôl dăch luh nar, rduh lăp ta nklang pôih tahan jêh ri nkhĭt phung Ammôn tât nklang bôk nar. Phung hôm e nchuăt du pru pra, pôri mâu geh ôh tâm phung khân păng hôm gŭ ndrel bar hê.

Bu dơn Y-Sôl jêng hađăch

¹² Phung ƀon lan lah ma Y-Samuel: “Mbu phung lah jêh: ‘Y-Sôl hĕ mra chiă uănh he?’, jao hom phung nây gay ma hên dơi nkhĭt khân păng.”

¹³ Ƀiălah Y-Sôl lah: “Bu mâu mra nkhĭt du huê bunuyh ôh nar aơ, yorlah jêng nar Brah Yêhôva rklaih jêh Israel.”

¹⁴ Y-Samuel lah ma phung ƀon lan: “He hăn hom ma Gilgal gay ƀư mhe đŏng ƀon bri hađăch ta nây.”

¹⁵ Lĕ rngôch phung ƀon lan hăn ndrel tât Gilgal. Ta nây, khân păng njêng Y-Sôl jêng hađăch tanăp Brah Yêhôva. Khân păng nhhơr ndơ ƀư brah ma nau đăp mpăn ma Brah Yêhôva. Y-Sôl jêh ri lĕ rngôch phung Israel răm maak hâu ngăn.