I Samuel 10 - Nau Brah Ndu Ngơi 2023

¹ Y-Samuel sŏk du nông dak ƀâu kah, tŏ ta klơ bôk Y-Sôl, chŭm păng, jêh ri lah: “Mâu di hĕ Brah Yêhôva hŏ tŏ dak ƀâu ma may gay may jêng kôranh chiă uănh dơn drăp ndơ Păng?

² Nar aơ, tơlah may hŏ tâm nkhah đah gâp, may mra tâm mâp đah bar hê dăch kêng môch H'Rachel, tâm n'gor Benjamin, ta Sêlsa. Khân păng mra lah ma may: ‘Lĕ seh bri me may joi lĕ bu saơ jêh. Aƀaơ, mbơ̆ may mâu hôm rvê ôh ma seh bri me, ƀiălah păng rvê yor khân may, jêh ri lah tâm nuih n'hâm: “Mâm gâp mra ƀư yor kon bu klâu gâp?”’

³ Tă bơh ntŭk nây may mra hăn ngai lơn, tât ta tơm si guyh ta Tabor, may mra tâm mâp đah pe nuyh bu klâu hăn hao yơk mbah ma Brah Ndu ta Bêthel: du huê bunuyh djôt pe mlâm be kon, du huê bunuyh djôt pe glo piăng let, jêh ri bunuyh tal pe djôt du nông ntâu ndrănh.

⁴ Khân păng mra mbah jêh ri ăn ma may bar glo piăng let, jêh ri may mra sŏk dơn bơh ti khân păng.

⁵ Jêh nau nây, may mra tât ta Gibêat Êlôhim, ta nây geh du pôih tahan phung Philistin. Tơlah lĕ lăp jêh tâm ƀon, may mra mâp du mpôl mbơh lor tă bơh ntŭk prêh klơ hăn jŭr, djôt gong rêng, gâr jê̆, n'hôm, jêh ri gong rêng loih hăn lor jêh ri khân păng mra mbơh lor.

⁶ Huêng Brah Yêhôva mra văch gŭ ndrel ma may ma nau brah, jêh ri may mra mbơh lor ndrel ma khân păng, jêh ri may mra njêng săk jêng du huê bunuyh êng.

⁷ Tơlah saơ lĕ nau mbên nây tât ngăn may ƀư hom tĭng nâm may dơi ƀư, yorlah Brah Ndu gŭ ndrel ma may!

⁸ May mra jŭr lor ma gâp ta ƀon Gilgal jêh ri aơ, gâp mra văch ma may gay nhhơr ndơ ƀư brah gŭch jêh ri ndơ ƀư brah ma nau đăp mpăn. Gŭ kâp hom pơh nar, tât nôk gâp hăn văch ma may jêh ri ăn ma may gĭt lĕ nau may mra ƀư.”

Y-Sôl ngơi mbơh lor

⁹ Y-Sôl ndôn kơi hăn luh bơh Y-Samuel Brah Ndu tâm rgâl nuih n'hâm păng, jêh ri lĕ nau tâm mbên nây tât ngăn nar nây.

¹⁰ Tơlah Y-Sôl hăn tât ta Gibêa, geh du phung mbơh lor tâm mâp ma păng. Huêng Brah Yêhôva văch gŭ ndrel ma păng ma nau brah, jêh ri păng mbơh lor ta nklang khân păng.

¹¹ Lĕ rngôch phung lĕ tă năl jêh Y-Sôl alor, saơ păng mbơh lor ndrel ma phung nơm mbơh lor, khân păng ôp ndrăng khân păng pô aơ: “Moh nau tât ma kon Y-Kis? Di lĕ nđâp ma Y-Sôl jêng du huê tâm phung nơm mbơh lor?”

¹² Du huê bunuyh gŭ ta Gibêa ôp: “Ƀiălah mbu nơm jêng mbơ̆ khân păng?” Yor ri, geh nau hôr pô aơ: “Di lĕ nđâp Y-Sôl jêng du huê tâm phung nơm mbơh lor?”

¹³ Tơlah Y-Sôl mbơh lor lôch jêh, păng hăn hao ntŭk prêh klơ.

¹⁴ Kônh Y-Sôl ôp ma păng jêh ri ma oh mon păng: “Bar hê khân may mbah ntŭk hăn?” Păng plơ̆ lah: “Hên hăn joi seh bri me, ƀiălah mâu dơi saơ, pôri hên hăn tâm mâp đah Y-Samuel.”

¹⁵ Kônh Y-Sôl lah: “May nkoch bri hom ma gâp gĭt moh nau Y-Samuel lah ma bar hê khân may?”

¹⁶ Y-Sôl lah ma kônh păng: “Păng lah rah vah jêh ma hên gĭt nau bu saơ jêh seh bri me.” Bi ma lĕ nau Y-Samuel ngơi jêh ma nau Y-Sôl săch dơi jêng hađăch, păng mâu mbơh ma păng.

Y-Saul bu yơk jêng hađăch

¹⁷ Y-Samuel kuăl rgum phung ƀon lan tanăp Brah Yêhôva ta Mispa,

¹⁸ jêh nây lah ma phung ƀon lan Israel: “Yêhôva Brah Ndu ma phung Israel lah pô aơ: ‘Gâp hŏ njŭn leo jêh phung Israel du luh tă bơh Êjipt; Gâp hŏ tâm rklaih jêh khân may tă bơh ti phung Êjipt jêh ri tă bơh ti lĕ rngôch ƀon bri hađăch tŭn jot khân may.’

¹⁹ Nar aơ khân may dun jêh ma Brah Ndu khân may, jêng Nơm tâm rklaih jêh khân may tă bơh lĕ rngôch nau mhĭk jêh ri nau o ach. Khân may hŏ lah jêh ma Păng pô aơ: ‘Dăn ndâk hom du huê hađăch chiă uănh hên!’ Pôri aƀaơ, tâm mpơl măt hom tanăp măt Brah Yêhôva tĭng ăp ndŭl mpôl jêh ri ăp ngih mbơ̆ khân may.”

²⁰ Y-Samuel leo lĕ rngôch ndŭl mpôl Israel văch dăch, jêh ri tâm nchroh di ma mpôl băl Benjamin.

²¹ Păng leo mpôl băl Benjamin hăn văch dăch tĭng ăp noi deh khân păng, jêh ri tâm nchroh di ma noi deh Matri. Jêh ri dăch kêng dŭt, nau tâm nchroh di ma Y-Sôl, kon bu klâu Y-Kis. Bu joi Y-Sôl, ƀiălah mâu saơ păng.

²² Yor ri, khân păng ôp đŏng ma Brah Yêhôva: “Bunuyh nây văch lĕ ta aơ?” Brah Yêhôva lah: “Aơ păng du krap jêh ta nklang ndô ndơ.”

²³ Khân păng nchuăt tât ta nây jêh ri leo păng luh. Y-Sôl dâk ta nklang phung ƀon lan, păng prêh lơn ma khân păng ntơm bơh săng nglik leo klơ.

²⁴ Y-Samuel ngơi đah lĕ rngôch ƀon lan: “Khân may saơ lĕ nơm Brah Yêhôva hŏ săch jêh? Tâm lĕ phung ƀon lan, mâu geh du huê nuyh nâm bu păng.” Lĕ rngôch phung ƀon lan nter lah: “Hađăch gŭ rêh n'ho ro!”

²⁵ Y-Samuel rblang ma phung ƀon lan gĭt nau vay jêh ri kan hađăch. Păng nchih lĕ nau nây tâm du ndrom samƀŭt jêh ri dơm panăp Brah Yêhôva. Jêh nây Y-Samuel ăn lĕ rngôch phung ƀon lan ăp nơm hăn sĭt ma ngih vâl păng nơm.

²⁶ Y-Sôl tâm ban lĕ sĭt ma ngih păng nơm ta Gibêa, Brah Ndu nsŭk nsôr nuih n'hâm phung tahan janh ktang hăn tĭng păng.

²⁷ Ƀiălah geh phung bunuyh mhĭk lah: “Mâm ƀư bunuyh aơ dơi tâm rklaih he?” Khân păng tâm rmot ma Y-Sôl, mâu djôt leo ndơ nhhơr ôh ma păng. Ƀiălah, Y-Sôl gŭ klêm.