I Samuel 1 - Nau Brah Ndu Ngơi 2023

I. Y-Êli jêh ri Y-Samuel ( 1:1 – 7:17 ) Bu deh ma Y-Samuel

¹ Geh du huê bunuyh ƀon tơm ta Ramathaim Sôphim, tâm bri klơ dor Êphraim, amoh Y-Êlkana, kon bu klâu Y-Jêrôham, sau Y-Êlihu, se Y-Tôhu, săn Y-Sup, mpôl Êphraim.

² Y-Êlkana geh bar hê ur, du huê aơ amoh H'Anna, jêh ri du huê ri amoh H'Pênina. H'Pênina geh bă kon, bi H'Anna mâu geh bă kon ôh.

³ Ăp năm, Y-Êlkana luh tă bơh ƀon păng hăn hao ma ƀon Silô gay yơk mbah jêh ri nhhơr mpa ƀư brah ma Brah Yêhôva ma phung tahan ta Silô, ntŭk geh bar hê kon bu klâu Y-Êli, amoh Y-Hôphni jêh ri Y-Phinêas, jêng kôranh ƀư brah ma Brah Yêhôva.

⁴ Tât nar Y-Êlkana nhhơr mpa ƀư brah, păng pă rlak mpa ƀư brah ma ur păng jêng H'Pênina, jêh ri ăn ma lĕ rngôch phung kon bu klâu jêh ri phung kon bu ur păng.

⁵ Ƀiălah păng prăp ma H'Anna du kô̆ êng ngăn, yor păng rŏng ma păng, nđâp lah Brah Yêhôva ƀư ma păng mâu bă kon

⁶ Nơm tâm djrel ma păng vay rkhŏch rhiăl ma păng gay ƀư ăn păng ji nuih, yorlah Brah Yêhôva hŏ ƀư ăn păng mâu bă kon.

⁷ Nau nây tât ndăng nâm pônây tă bơh năm aơ tât năm ri, ăp tơ̆ tơlah H'An hăn hao let ma ngih Brah Yêhôva, H'Pênina rkhŏch rhiăl păng mro. Yor ri, H'An nhĭm jêh ri mâu ŭch sông sa ôh.

⁸ Y-Êlkana, sai păng, ôp: “Hơi H'Anna, moh nau ay nhĭm? Kŏ tât ay mâu ŭch sông sa jêh ri nuih n'hâm ay rngot ir pônây? Mâm gâp mâu dơi ăn ma ay rlau lơn jât nuyh kon bu klâu?”

⁹ Jêh lĕ rngôch bunuyh hŏ sông sa nhêt lôch jêh ta Silô, H'Anna dâk. Nôk nây, kôranh ƀư brah Y-Êli dôl gŭ ta rnơl êp kêng n'gâng mpông ngih Brah Yêhôva.

¹⁰ Nuih n'hâm H'Anna rngot, păng kuăl mbơh sơm ma Brah Yêhôva ma nau nhĭm rngot.

¹¹ Păng mbơh sơm: “Ơ Brah Yêhôva ma phung tahan, tơlah nanê̆ ngăn May mra uănh treng ma nau rêh ni oh mon bu ur May, kah gĭt tay ma gâp jêh ri mâu chuêl ôh ăn ma oh mon bu ur May du huê kon bu klâu, pôri gâp mra nhhơr lôch nau rêh păng ma Brah Yêhôva, jêh ri bu mâu poih ôh bôk sŏk păng ma pêh.”

¹² Tâm nôk H'Anna mbơh sơm jŏ jong ngăn tanăp măt Brah Yêhôva, Y-Êli kâp uănh trôm mbung păng.

¹³ Yorlah H'Anna mbơh sơm tâm nuih n'hâm, knŏng mpât trôm mbung, mâu iăt ôh nau bâr ngơi, yor nây Y-Êli mĭn păng nhŭl ndrănh,

¹⁴ jêh ri lah: “Kŏ tât ndah jŏ ay nhŭl ndrănh? Plơ̆ sĭt hom mƀăr lơi ndrănh bơh ay.”

¹⁵ H'Anna plơ̆ lah: “Hơi kôranh gâp, mâu di pônây! Gâp jêng du huê bu ur geh nau rngot rvê êng tâm nuih n'hâm. Gâp mâu geh nhêt ndrănh ôh mâu lah nhêt lĕ ntil ndơ ƀư nhŭl, ƀiălah gâp tâm mpơl lĕ nuih n'hâm gâp tanăp măt Brah Yêhôva.

¹⁶ Lơi ta ntôn ma oh mon bu ur may nâm bu du huê bu ur blă blơ ôh, yorlah nau rêh ni jêh ri rngot rvê rlau ir ma gâp pôri gâp kuăl mbơh sơm kŏ tât aƀaơ.”

¹⁷ Y-Êli lah: “Hăn sĭt đăp rmên ma ngih ay, dăn ma Brah Ndu phung Israel dơn nau ay hŏ mbơh sơm ma Păng!”

¹⁸ H'Anna ơh: “Ăn oh mon bu ur may geh nau yô̆ panăp măt may.” Jêh nây bu ur nây plơ̆ sĭt, sông sa nhêt, jêh ri muh măt păng mâu hôm geh nau rngot rvê đŏng ôh.

¹⁹ Nar ôi taơ, ur sai Y-Êlkana kah rngăl ơm ôi, yơk mbah Brah Yêhôva, jêh nây plơ̆ sĭt ma ngih vâl khân păng ta Rama. Y-Êlkana gŭ ndrel H'Anna, jêng ur păng. Brah Yêhôva kah gĭt ma păng.

²⁰ Dôl tâm năm nây lĕ, H'Anna hŏ ntreo jêh ri păng deh du huê kon bu klâu, păng ntơ amoh jêng Y-Samuel, yorlah păng lah: “Gâp hŏ dăn jêh păng tă bơh Brah Yêhôva.”

²¹ Y-Êlkana ndrel ma lĕ rngôch rnăk vâl păng hăn hao Silô gay nhhơr ma Brah Yêhôva mpa ƀư brah tâm ăp năm jêh ri ndơ ƀư brah gay ƀư rĭng nau păng hŏ ton jêh.

²² Ƀiălah H'Anna mâu hăn hao ôh, yorlah păng lah đah sai păng: “Tơlah kon se jê̆ lĕ lơi pu toh jêh, gâp mra leo păng hăn hao, gay ăn păng mpơl măt tanăp Brah Yêhôva, jêh ri gŭ ta nây n'ho ro.”

²³ Y-Êlkana, sai păng lah: “Ƀư hom tĭng nau ay mĭn di, gŭ kâp ta aơ kŏ tât kon păng chalơi pu toh. Knŏng dăn Brah Yêhôva ƀư tât ngăn nau ton Păng!” Pônây, H'Anna gŭ ta ngih păng kŏ tât kon păng chalơi pu toh.

²⁴ Tơlah kon se lĕ chalơi toh jêh, păng njŭn leo kon se tât ngih Brah Yêhôva ta Silô, leo nđâp ma pe mlâm ndrôk nkuăng rah, klăp lah jât kilô rnih môi, jêh ri du nông ndrănh. Y-Samuel hôm jê̆ ngăn.

²⁵ Khân păng sreh ndrôk nkuăng, jêh nây leo kon se jê̆ nây tât ma Y-Êli.

²⁶ Păng lah: “Hơi kôranh gâp! Gâp sŏk nau rêh may gay ton pô aơ, gâp jêng bu ur nơm dâk jêh ta aơ, êp kêng may, gay mbơh sơm ma Brah Yêhôva.

²⁷ Gâp hŏ mbơh sơm gay geh kon se jê̆ aơ, jêh ri Brah Yêhôva hŏ dơn jêh nau gâp mbơh sơm ma Păng.

²⁸ Yor ri, gâp nhhơr păng ma Brah Yêhôva; păng jêng ndơ Brah Yêhôva lôch nau rêh păng.” Jêh nây kon se jê̆ Y-Samuel yơk mbah Brah Yêhôva ta nây.