I Phung Hađăch 9 - Nau Brah Ndu Ngơi 2023

Brah Yêhôva tâm mpơl tal bar ma Y-Salômôn

¹ Tơlah Y-Salômôn hŏ ndâk lôch jêh ngih ma Brah Yêhôva, ngih hađăch, jêh ri lĕ rngôch nau kan ndâk hađăch ŭch ƀư,

² tơlah Brah Yêhôva tâm mpơl tay đŏng ma Y-Salômôn tal bar, nâm bu Păng hŏ tâm mpơl ma hađăch ta ƀon Gibêôn.

³ Brah Yêhôva lah ma păng pô aơ: “Gâp hŏ tăng jêh nau mbơh sơm jêh ri nau may ŭch dăn tanăp măt Gâp. Gâp prăp êng jêh ngih kloh ueh brah may hŏ ndâk, jêh ri dơm amoh Gâp ta nây n'ho ro. Măt jêh ri nuih n'hâm Gâp mra gŭ ta nây mro mrăng.

⁴ Bi ma may, tơlah may chuat hăn panăp Gâp nâm bu Y-Đavit, mbơ̆ may, hŏ chuat hăn jêh, ma lĕ nuih n'hâm n'hêl nanê̆ jêh ri sŏng ƀư di tĭng lĕ rngôch nau Gâp ntăm jêh ma may, djôt prăp lĕ nau vay dăp jêh ri lĕ nau vay ƀư bơh Gâp,

⁵ pôri Gâp mra ƀư ma sưng hađăch may dơi nâp ma phung Israel kŏ tât ƀaƀơ n'ho ro, di tĭng nâm Gâp ton jêh ma Y-Đavit, mbơ̆ may, pô aơ: ‘May mâu mra pưt ôh bunuyh chiă uănh thoi ntrok ta sưng hađăch phung Israel.’

⁶ Ƀiălah tơlah may mâu lah kon sau may der bơh Gâp, mâu djôt prăp ôh lĕ nau vay ntăm jêh ri lĕ nau vay dăp bơh Gâp hŏ ntăm jêh, ƀiălah khân may hăn pah kan ma brah êng jêh ri yơk mbah ma khân păng,

⁷ nôk nây Gâp mra mprơh phung Israel du luh bơh neh Gâp hŏ ăn jêh ma khân păng. Bi ngih brah Gâp hŏ prăp êng jêng kloh ueh ma amoh Gâp, Gâp mra mƀăr lơi ngih luh bơh măt Gâp; jêh ri phung Israel mra jêng du bôk nau mprĭng ma lĕ rngôch phung ƀon lan ngơi hôr jêh ri gơm mpray.

⁸ Nđâp tơlah nar aơ ngih brah aơ toyh ueh ngăn ngên ƀiălah păng mra rlâm rai, lĕ rngôch bunuyh hăn rgăn ta ngih aơ mra hih rhâl ngăn, gơm mpray jêh ri lah: ‘Mâm dĭng Brah Yêhôva hŏ ƀư jêh ăn ma n'gor bri aơ jêh ri ma ngih aơ kơt nây?’

⁹ Bu mra plơ̆ lah pô aơ: ‘Nây jêng yorlah khân păng chalơi jêh Yêhôva Brah Ndu khân păng, Nơm hŏ njŭn leo phung chô yau khân păng du luh bơh Êjipt. Khân păng tĭng ndô̆ phung brah êng, yơk mbah phung brah nây jêh ri pah kan ma khân păng. Yor ri, Brah Yêhôva ăn tât lĕ nau mhĭk aơ ma khân păng.’ ”

Nau dơi Y-Salômôn

¹⁰ Lôch bar jât năm hŏ ndâk jêh bar mlâm ngih, ngih Brah Yêhôva jêh ri ngih hađăch,

¹¹ Y-Salômôn jao ma Y-Hiram, hađăch ƀon Tyre, bar jât rplay ƀon tâm n'gor Galilê, yorlah Y-Hiram ăn jêh ma Y-Salômôn tơm si sêdar, tơm si chiprơ jêh ri mah tĭng nâm hađăch ŭch mĭn.

¹² Ƀiălah tơlah Y-Hiram văch tă bơh Tyre gay uănh lĕ ƀon Y-Salômôn lĕ jao jêh ma păng, ƀon nây mâu tâm di ôh đah păng.

¹³ Yor ri, hađăch lah: “Hơi nâu, may hŏ ăn ma gâp lĕ ƀon kơt aơ lah?” Jêh nây hađăch Hiram ntơ ma lĕ ƀon nây jêng n'gor Kabul, jêh ri bu ăt hôm ntơ kơt nây tât ma nar aơ.

¹⁴ Y-Hiram hŏ njuăl jêh ma hađăch Salômôn bar rbăn prao rhiăng kilô mah.

Lĕ kan êng Y-Salômôn

¹⁵ Hađăch Salômôn hŏ rgum jêh phung pah kan jâk gay ndâk ngih Brah Yêhôva jêh ri ngih hađăch păng nơm, nau kan ndâk ƀon Milô, mpêr ƀon Yêrusalem, Hasôr, Mêgidô, jêh ri Gêser.

¹⁶ (Gêser ơm jêng du mlâm ƀon tâm phung Kanaan, Pharaôn, hađăch phung Êjipt, hăn hao lơh pit sŏk ƀon nây, su ma ŭnh jêh ri nkhĭt phung Kanaan gŭ tâm ƀon nây, jêh nây ăn ƀon nây jêng drăp rvăt ma kon bu ur păng nơm, jêng ur Y-Salômôn.)

¹⁷ Y-Salômôn ndâk ƀon Gêser, Bet-Hôron Pa Dâng,

¹⁸ Balat, jêh ri Tatmôr, tâm bri rdah n'gor nây,

¹⁹ jêh ri ndâk lĕ rngôch ƀon geh jay prăp nkrem ndơ sông sa Y-Salômôn, lĕ ƀon ma ndeh seh, lĕ ƀon ma phung tahan ncho seh, jêh ri lĕ rngôch kan Salômôn ŭch ndâk ta Yêrusalem, Liban, jêh ri tâm lĕ rngôch n'gor tâm nau dơi hađăch chiă uănh.

²⁰ Lĕ rngôch phung hôm rêh klen tâm phung ƀon lan Amôrit, Hitit, Pêrisit, Hivit, jêh ri phung ƀon lan Jêbusit, mâu di phung Israel;

²¹ jêng phung kon sau khân păng hôm e gŭ tâm n'gor, phung ƀon lan Israel mâu dơi ƀư rai lĕ ôh, pôri Y-Salômôn nhŭp khân păng pah kan jâk tât nar aơ.

²² Ƀiălah Y-Salômôn mâu ŭch sŏk ôh phung ƀon lan Israel ƀư dĭk. Khân păng jêng phung tahan, phung kôranh chiă uănh, phung kôranh tahan chiă uănh, phung kôranh tahan ƀĭt ndeh seh jêh ri phung tahan ncho seh ma hađăch.

²³ Geh lĕ rngôch prăm rhiăng prăm jât phung kôranh mât uănh lĕ nau kan ndâk Y-Salômôn; khân păng chiă uănh phung ƀon lan ƀư kan tâm lĕ nau kan ndâk.

²⁴ Tơlah kon bu ur Pharaôn dâk hăn bơh ƀon Đavit tât gŭ tâm ngih hađăch, hađăch Salômôn hŏ ndâk ăn ma păng, nôk nây hađăch ntơm ndâk njêng Milô.

²⁵ Ăp năm pe tơ̆, Y-Salômôn nhhơr ndơ ƀư brah gŭch jêh ri ndơ ƀư brah ma nau đăp mpăn ta nơng ƀư brah hađăch hŏ ndâk jêh ma Brah Yêhôva, jêh ri gŭch ndơ ƀâu kah ta klơ nơng ƀư brah hŏ dơm tanăp Brah Yêhôva. Pônây, hađăch ƀư lôch jêh nau kan ndâk ngih brah.

Nau Y-Salômôn kan tăch rgâl

²⁶ Hađăch Salômôn ƀư tay đŏng âk bôk kumpăn ta ƀon Êsiôn-Gêber, dăch Êlôt, ta kơh Dak Mƀŭt Chăng, tâm n'gor Êđôm.

²⁷ Y-Hiram prơh phung oh mon păng nơm, jêng phung gŭ ƀĭt kumpăn, gĭt vât jêh ri mơng bên jêh ma trong tâm dak mƀŭt, hăn tât gay kơl phung oh mon Y-Salômôn tâm kumpăn nĕ.

²⁸ Khân păng hăn tât ta Ôphir jêh ri djôt bơi jât mpe tân mah tă bơh ntŭk nây sĭt chê̆ ma hađăch Salômôn.