I Phung Hađăch 8 - Nau Brah Ndu Ngơi 2023

Nau rƀŭn nhhơr ngih brah. – Nau Y-Salômôn mbơh sơm

¹ Nôk nây, hađăch Salômôn kuăl rgum phung bu ranh Israel, lĕ rngôch phung kôranh ndŭl mpôl jêh ri kôranh rnăk vâl phung ƀon lan Israel plơ̆ sĭt ta Yêrusalem, gay tung Hip Nau Tâm Rnglăp Brah Yêhôva tă bơh ƀon Đavit, jêng Siôn.

² Lĕ rngôch phung bu klâu Israel rgum ndrel da dê jŭm hađăch Salômôn tâm khay Êthanim, jêng khay rơh pơh gay ma râng rƀŭn.

³ Tơlah lĕ rngôch bu ranh Israel hăn tât jêh, pôri phung kôranh ƀư brah tung Hip Nau Tâm Rnglăp,

⁴ jêh ri khân păng djôt leo Hip Nau Tâm Rnglăp Brah Yêhôva hăn, ndrel ma Ngih Bok Nau Tâm Rƀŭn, jêh ri lĕ rngôch lĕ ndơ dŏng kloh ueh gŭ tâm Ngih Bok. Lĕ kôranh ƀư brah jêh ri phung Lêvi tung lĕ ndơ nây.

⁵ Hađăch Salômôn jêh ri lĕ rngôch phung Israel tâm rƀŭn ndrel ma hađăch, gŭ dâk panăp Hip Nau Tâm Rnglăp jêh ri nhhơr mpa ƀư brah ma âk râk biăp, ndrôk, kŏ tât mâu hôm dơi kơp.

⁶ Phung kôranh ƀư brah tung Hip Nau Tâm Rnglăp Brah Yêhôva n'gân tâm ntŭk ta trôm dŭt ngih brah, jêng Ntŭk Dŭt Kloh Ueh, tâm dâng nting năr chêrubim.

⁷ Yorlah phung chêrubim lĭ năr khân păng ta klơ ntŭk n'gân Hip Nau Tâm Rnglăp, pônây nkŭm Hip Nau Tâm Rnglăp jêh ri lĕ mâng tung.

⁸ Lĕ mâng tung nây jong ngăn ntơm bơh Ntŭk Kloh panăp Ntŭk Dŭt Kloh Ueh, kŏ tât bu dơi saơ chiông lĕ mâng tung, ƀiălah tă bơh padih bu mâu dơi saơ ôh. Lĕ mâng tung nây ăt hôm ta nây kŏ tât ta nar aơ.

⁹ Tâm Hip Nau Tâm Rnglăp mâu geh du ndô ndơ êng ôh knŏng bar plơp lŭ Y-Môis hŏ n'gân tâm nây dôl hôm gŭ ta Hôrep, jêng ntŭk Brah Yêhôva hŏ ƀư nau tâm rnglăp đah phung Israel, dôl khân păng mhe du luh bơh Êjipt.

¹⁰ Dôl phung kôranh ƀư brah mhe luh bơh Ntŭk Kloh Ueh, geh ndâr tŭk nkŭm bêng ngih Brah Yêhôva,

¹¹ kŏ tât yor ndâr tŭk nây phung kôranh ƀư brah mâu dơi dâk ôh gay pah kan nhhơr, yorlah nau chrêk rmah Brah Yêhôva lĕ bêng ma ngih Brah Yêhôva.

¹² Nôk nây, Y-Salômôn mbơh sơm: “Brah Yêhôva hŏ ntăm jêh pô aơ Păng gŭ tâm ndâr tŭk mbâl.

¹³ Ƀiălah gâp ndâk jêh ma May du ngih brah toyh ueh ngăn ngên, Du ntŭk prăp ma May gŭ n'ho ro.”

Nau ngơi hađăch Salômôn

¹⁴ Jêh ta nây hađăch rle muh măt păng, ăn nau ueh uĭn ma lĕ rngôch phung Israel tâm rƀŭn, dôl lĕ rngôch bunuyh dâk nsrâng.

¹⁵ Hađăch lah: “Tâm rnê ngăn ma Yêhôva Brah Ndu phung Israel, Nơm hŏ ton jêh ma Y-Đavit, mbơ̆ gâp, jêh ri sŏk ti Păng nơm ƀư tât di ngăn lĕ rngôch nau nây. Păng lah pô aơ:

¹⁶ ‘Ntơm bơh nar Gâp hŏ njŭn leo phung ƀon lan Gâp jêng Israel du luh tă bơh Êjipt, Gâp mâu mâp săch ôh du rplay ƀon êng tâm lĕ rngôch ndŭl mpôl Israel gay ndâk du mlâm ngih brah ma amoh Gâp gŭ ta nây. Ƀiălah Gâp hŏ săch Y-Đavit gay păng chiă uănh phung ƀon lan Israel Gâp.’

¹⁷ Nôk nĕ, Y-Đavit, mbơ̆ gâp, geh nau mĭn ŭch ndâk du ngih brah ma amoh Brah Yêhôva, jêng Brah Ndu Israel.

¹⁸ Ƀiălah Brah Yêhôva lah jêh ma Y-Đavit, mbơ̆ gâp, pô aơ: ‘May geh nau mĭn ŭch ndâk du ngih brah ma amoh Gâp jêng nau ueh.

¹⁹ Ƀiălah, may mâu mra ndâk ngih brah nây ôh, ƀiălah kon may, yor tă bơh may deh păng, mra ndâk ngih brah ma amoh Gâp.’

²⁰ Aƀaơ aơ, Brah Yêhôva hŏ ƀư jêng ngăn jêh nau Păng hŏ ton, yorlah gâp hŏ chiă uănh thoi ntrok Y-Đavit, mbơ̆ gâp, jêh ri gŭ ta sưng hađăch Israel di tĭng nâm Brah Yêhôva hŏ ntăm jêh. Gâp hŏ ndâk jêh ngih brah nây ma amoh Brah Yêhôva, jêng Brah Ndu Phung Israel.

²¹ Ta aơ, gâp hŏ rơm ndrăp jêh du ntŭk gay n'gân Hip Nau Tâm Rnglăp, tâm nây geh nau tâm rnglăp Brah Yêhôva, jêng tâm rnglăp Păng hŏ njêng jêh đah phung chô yau he, dôl njŭn leo khân păng luh bơh neh Êjipt.”

Nau Y-Salômôn mbơh sơm nhhơr ngih

²² Jêh nĕ, Y-Salômôn dâk panăp nơng ƀư brah Brah Yêhôva, tanăp lĕ rngôch phung Israel tâm rƀŭn, yơr bar đah ti rlet klơ trôk, jêh ri mbơh sơm pô aơ:

²³ “Hơi Yêhôva, Brah Ndu Israel! Mâu geh brah êng klơ trôk prêh ri mâu lah tâm dâng neh ntu aơ tâm ban May. Kôranh Brah djôt prăp nau tâm rnglăp jêh ri nuih n'hâm ueh ma phung oh mon May, jêng phung lĕ nuih n'hâm chuat hăn tanăp măt May.

²⁴ Kôranh Brah hŏ djôt prăp jêh nau May lah jêh ma oh mon May jêng Y-Đavit, mbơ̆ gâp. Moh nau ngơi luh bơh trôm mbung May hŏ ton, ti May hŏ ƀư jêng ngăn jêh nâm bu hŏ geh nar aơ.

²⁵ Pôri aƀaơ, ơ Yêhôva jêng Brah Ndu phung Israel! Dăn djôt prăp hom nau Kôranh Brah hŏ ton đah oh mon May jêng Y-Đavit, mbơ̆ gâp, pô aơ: ‘Tơlah phung kon sau may njrăng tâm trong khân păng nơm, chuat hăn tanăp Gâp nâm bu may hŏ chuat hăn jêh, pôri tanăp Gâp, may mâu mra pưt ôh du huê bunuyh gŭ ta sưng hađăch phung Israel.’

²⁶ Hơi Brah Ndu phung Israel! Dăn Kôranh Brah ƀư tât di ngăn nau May hŏ ton đah oh mon May êng Y-Đavit, mbơ̆ gâp.

²⁷ Ƀiălah Brah Ndu geh gŭ ngăn lĕ tâm neh ntu? Ri, lĕ ndâr trôk, lĕ trôk tâm lĕ ndâr trôk mâu dơi đŏng tŏng prăp ma May, rlau lơn ma ngih brah gâp hŏ ndâk jêh ta aơ!

²⁸ Nđâp tơlah pônây, hơi Yêhôva jêng Brah Ndu gâp! Dăn May treng uănh ma nau mbơh sơm jêh ri nau vơl dăn oh mon May, dăn rkêng tôr iăt nau nter jêh ri nau oh mon May mbơh sơm nar aơ nhhơr tanăp măt May.

²⁹ Dăn măt Kôranh Brah nar jêh ri măng uănh treng ngih aơ, jêng ntŭk Kôranh Brah hŏ lah pô aơ: ‘Amoh Gâp gŭ ta nây,’ gay tăng nau mbơh sơm oh mon May rle mpeh ntŭk aơ.

³⁰ Dăn May rkêng tôr iăt nau oh mon May mbơh sơm jêh ri phung ƀon lan Israel May rle ma ntŭk aơ gay mbơh sơm. Bơh ntŭk May gŭ ta klơ trôk, dăn May hŏ tăng jêh ri sâm yô̆ an.

³¹ Tơlah geh mbu moh ƀư tih đah nơm chiau meng păng nơm jêh ri bu nchâp păng sơm ton, pôri păng tât ton săk panăp nơng ƀư brah May tâm ngih brah aơ,

³² pôri dăn ma May klơ trôk rkêng tôr iăt, ƀư an jêh ri phat dôih phung oh mon May, tâm rmal nơm geh nau tih, ƀư ăn păng tuy nau tih păng nơm, jêh ri dăn May Kơp nau sŏng srăng ma nơm Kơp nau sŏng srăng ma nau nkhôm tĭng nâm nau sŏng srăng păng.

³³ Tơlah Israel, phung ƀon lan May, yor ƀư tih đah May, jêh nây phung rlăng lơh rai khân păng, tơlah khân păng plơ̆ sĭt ma May, mbơh amoh May jêh ri mbơh sơm vơl dăn ma May tâm ngih brah aơ,

³⁴ pônây dăn May klơ trôk rkêng tôr iăt, yô̆ an nau tih ma phung ƀon lan Israel May jêh ri ƀư ăn khân păng plơ̆ sĭt ma n'gor May ăn jêh ma chô yau khân păng.

³⁵ Tơlah lĕ ndâr trôk nchăng nâp, mâu geh dak mih ôh yorlah khân păng ƀư tih jêh đah May, tơlah khân păng rle mpeh ta ntŭk aơ gay mbơh sơm, jêh ri mbơh nau khân păng chroh ma amoh May, chalơi nau tih khân păng nơm, yorlah May hŏ phat dôih jêh khân păng,

³⁶ pôri dăn Kôranh Brah klơ trôk rkêng tôr iăt khân păng, yô̆ an ma nau tih ma phung oh mon May jêh ri ma phung ƀon lan Israel May. Dăn ma May sâm nti ma khân păng trong di gay ma khân păng mra hăn, jêh ri ăn dak mih tŭp tâm neh Kôranh Brah ăn jêh ma phung ƀon lan May jêng drăp ndơn.

³⁷ Tơlah tâm n'gor bri geh nau ji ngot, nau ji tưp, mâu lah prăng phang, hon sêt-o, krah ndrach, krah nsăt, mâu lah geh phung rlăng nchueng jŭm lĕ mpông ƀon khân păng gŭ, mâu lah ăp nau mhĭk, nau ji;

³⁸ tơlah geh du huê bunuyh mâu lah lĕ rngôch phung ƀon lan Israel Kôranh Brah lĕ nuih n'hâm gĭt năl ma nau rêh ni khân păng nơm, jêh ri yơr ti rle mpeh ma ngih brah aơ gay mbơh sơm, vơh vơl ma lĕ rngôch nau,

³⁹ dăn Kôranh Brah klơ trôk, jêng ntŭk May gŭ, rkêng tôr iăt, yô̆ an, ƀư an jêh ri sâm mplơ̆ plơng ma ăp nơm tĭng nâm trong khân păng, jêh ri tĭng nâm lĕ nau Kôranh Brah gĭt năl tâm trôm nuih n'hâm khân păng, yorlah knŏng êng May dơi gĭt rah vah tâm nuih n'hâm kon bunuyh;

⁴⁰ gay ƀư ăn khân păng klach yơk ma Kôranh Brah du njăr rêh, nôk khân păng gŭ rêh ta n'gor May hŏ ăn jêh ma chô yau khân păng.

⁴¹ Rlau ma nây, lah du huê bu năch jêng bunuyh mâu jêng ôh phung ƀon lan Israel May, ƀiălah yor tăng amoh May păng văch tât tă bơh n'gor ngai

⁴² (Yorlah khân păng hŏ tăng jêh ma amoh toyh May, ma ti brah May jêh ri ti May yơr sŏng jêh). Tơlah khân păng văch tât mbơh sơm tâm ngih brah aơ,

⁴³ pôri dăn Kôranh Brah ta klơ trôk, jêng ntŭk May gŭ, rkêng tôr iăt jêh ri ƀư ma khân păng lĕ nau khân păng mbơh sơm dăn ma May, gay ma lĕ rngôch phung ƀon lan ta neh ntu dơi gĭt năl amoh Kôranh Brah jêh ri klach yơk ma May nâm bu phung ƀon lan Israel May, jêh ri gay ma bu gĭt năl ngih brah aơ gâp ndâk jêh ma May bu ntơ tâm amoh May.

⁴⁴ Tơlah phung ƀon lan Kôranh Brah du luh nau tâm lơh đah phung rlăng khân păng ta moh ntŭk May prơh khân păng hăn, tơlah khân păng mbơh sơm ma Brah Yêhôva rle mpeh ma ƀon May hŏ săch jêh ri ngih brah gâp ndâk jêh ma amoh May,

⁴⁵ pôri dăn Kôranh Brah klơ trôk rkêng tôr iăt lĕ nau khân păng mbơh sơm jêh ri nau vơl dăn gay ƀư nau di ma khân păng.

⁴⁶ Tơlah khân păng ƀư tih đah Kôranh Brah — yorlah mâu geh du huê bunuyh mâu ƀư tih — ƀư ăn May ji nuih ma khân păng jêh ri jao khân păng ăn ma phung rlăng ăn bu nhŭp khân păng ƀư dĭk tâm n'gor phung rlăng, mâu lah ntŭk ngai mâu lah dăch.

⁴⁷ Tơlah tâm n'gor ƀư dĭk bu, khân păng rgâl nuih n'hâm, rmal nau tih jêh ri vơl dăn ma Kôranh Brah pô aơ: ‘Hên ƀư tih jêh, ƀư nau kue jêh ri djơh mhĭk;’

⁴⁸ tơlah tâm n'gor phung rlăng khân păng, ta ntŭk khân păng ƀư dĭk bu, khân păng lĕ nuih n'hâm lĕ nau mĭn ŭch plơ̆ tay ma May, mbơh sơm ma May, rle mpeh ma n'gor Kôranh Brah lĕ ăn jêh ma phung chô yau khân păng, mpeh ƀon May hŏ săch jêh ri ma ngih brah gâp ndâk jêh ma amoh May,

⁴⁹ dăn Kôranh Brah tă bơh klơ trôk, jêng ntŭk May gŭ, rkêng tôr iăt nau mbơh sơm khân păng vơl dăn jêh ri ƀư nau di ma khân păng.

⁵⁰ Dăn ma Kôranh Brah yô̆ an ma phung ƀon lan May jêng phung ƀon lan ƀư tih jêh đah May, jêh ri yô̆ an lĕ rngôch nau tih khân păng ƀư tih jêh đah May; dăn ma May ƀư ma lĕ bunuyh hŏ nhŭp khân păng jêng bu nă geh nau yô̆ nđach ma khân păng,

⁵¹ yorlah khân păng jêng phung ƀon lan May, jêng drăp ndơn May hŏ njŭn leo jêh bơh Êjipt, jêng luh bơh ŭnh năk loih.

⁵² Dăn măt Kôranh Brah uănh treng ma oh mon May jêh ri phung ƀon lan Israel May, rkêng tôr iăt nau mbơh sơm jêh ri nau khân păng vơl tơlah khân păng nter dăn ma May.

⁵³ Hơi Kôranh Brah jêng Brah Yêhôva! Kôranh Brah hŏ prăp êng phung Israel luh tă bơh lĕ rngôch phung ƀon lan klơ neh ntu, gay ma khân păng jêng drăp ndơn May, tĭng nâm May mbơh jêh ma bâr mbung Y-Môis jêng oh mon May, dôl May ngluh phung chô yau hên du luh bơh Êjipt.”

Y-Salômôn ăn nau ueh uĭn ma phung tâm rƀŭn

⁵⁴ Tơlah Y-Salômôn hŏ nhhơr ma Brah Yêhôva lĕ nau mbơh sơm jêh ri nau vơl dăn aơ lôch jêh, hađăch dâk tanăp nơng ƀư brah Brah Yêhôva, ntŭk hađăch hŏ chon kômâk jêh ri yơr bar ti leo klơ trôk.

⁵⁵ Păng dâk, jêh ri mât ton ma lĕ rngôch phung Israel gŭ tâm rƀŭn ma bâr huy, pô aơ:

⁵⁶ “Mât ton ma Brah Yêhôva, Nơm ăn jêh ma phung ƀon lan Israel Păng geh nau rlu tĭng nâm lĕ rngôch nau Păng hŏ ntăm jêh! Tâm lĕ rngôch nau ton ueh Păng hŏ ntăm jêh ma Y-Môis, oh mon Păng, mâu geh ôh du bâr ngơi mâu hoch.

⁵⁷ Dăn ma Yêhôva Brah Ndu he gŭ ndrel ma he, nâm bu Păng hŏ gŭ ndrel ma chô yau he; dăn Păng lơi dĭng chalơi mâu lah dun ôh ma he.

⁵⁸ Dăn ma Păng nsŭk nsôr nuih n'hâm he rle mpeh Păng, gay he hăn tâm lĕ rngôch trong Păng, djôt prăp lĕ nau vay ntăm, lĕ nau vay dăp, jêh ri lĕ nau vay ƀư bơh Păng hŏ ntăm ma phung chô yau he.

⁵⁹ Ăn lĕ nau gâp hŏ vơl dăn jêh tra năp măt Brah Yêhôva mra gŭ êp Yêhôva Brah Ndu he nar jêh ri măng, gay Păng koh dŏng kơl oh mon Păng jêh ri phung ƀon lan Israel Păng, tĭng nâm nau tât ăp nar,

⁶⁰ gay ăn lĕ rngôch ntil mpôl bunuyh ta klơ neh gĭt ma Brah Yêhôva jêng Brah Ndu, mâu hôm geh brah êng ôh.

⁶¹ Pôri, ăn khân may sŏk lĕ nuih n'hâm răp jăp đah Brah Yêhôva jêng Brah Ndu he, chuat hăn tâm lĕ nau vay dăp, jêh ri djôt prăp nau vay Păng ntăm tĭng nâm khân may hŏ ƀư nar aơ.”

Y-Salômôn nhhơr mpa ƀư brah

⁶² Jêh nau nây, hađăch jêh ri lĕ rngôch phung Israel ndrel ma păng nhhơr lĕ mpa ƀư brah panăp Brah Yêhôva.

⁶³ Y-Salômôn nhhơr mpa ƀư brah ma Brah Yêhôva, geh bar rmưn bar rbăn mlâm ndrôk jêh ri du rsen bar rmưn biăp nkuăng ƀư ndơ ƀư brah ma nau đăp mpăn. Pônây, hađăch jêh ri lĕ rngôch phung ƀon lan Israel nhhơr ngih brah ma Brah Yêhôva.

⁶⁴ Tâm nar nây, hađăch prăp êng ma nau kloh ueh ntŭk ta nklang ndring panăp ngih Brah Yêhôva, gay ƀư ntŭk nhhơr lĕ ndơ ƀư brah gŭch, ndơ ƀư brah rnih môi, jêh ri ngi bơh ndơ ƀư brah ma nau đăp mpăn, yorlah nơng ƀư brah ma kông ăn tanăp măt Brah Yêhôva jê̆ ir, mâu dơi tŏng ntŭk gay n'gân lĕ ndơ ƀư brah gŭch, ndơ ƀư brah rnih môi jêh ri ngi bơh ndơ ƀư brah ma nau đăp mpăn.

⁶⁵ Tâm nôk nây, Y-Salômôn jêh ri lĕ rngôch phung ƀon lan Israel ndrel ma păng râng rƀŭn tra năp măt Yêhôva jêng Brah Ndu he tâm pơh nar, jêh nây ntop pơh nar đŏng, pôri geh lĕ rngôch jêng jât puăn nar. Nây jêng du phung tâm rƀŭn dŭt âk râk ntơm bơh n'har ƀon Hamat ma tât n'hor dak Êjipt.

⁶⁶ Lăp nar rơh pham, hađăch ăn phung ƀon lan hăn sĭt. Khân păng ăn nau ueh uĭn ma hađăch jêh nây hăn sĭt rlet ngih vâl khân păng nơm, nuih n'hâm hâk răm ngăn yor lĕ nau ueh Brah Yêhôva hŏ ƀư jêh ma Y-Đavit, oh mon Păng, jêh ri ma Phung ƀon lan Israel Păng.