I Phung Hađăch 7 - Nau Brah Ndu Ngơi 2023

Ngih hađăch Salômôn

¹ Y-Salômôn ndâk đŏng ngih hađăch ma păng nơm, jêh ri ƀư lôch jêh lĕ kan tâm jât ma pe năm.

² Hađăch ndâk Ngih Bri Liban, jong prăm jât met, rkăng bar jât met jêh ri prêh jât mprăm met, nđâp ma puăn mbor meh ma tơm si sêdar, jêh ri lĕ rda ma tơm si sêdar n'gân ta klơ lĕ meh nây.

³ Dra klơ ngih ƀư ma tơm si sêdar nđâp ma lĕ njon rkăng n'gân ta klơ puăn jât ma prăm mlâm meh, jât ma prăm mlâm ăp mbor.

⁴ Geh pe mbor mpông bloh, mbor aơ bu ƀư tâm rle panăp ma mbor ri jêng pe mbor.

⁵ Lĕ rngôch mpông jêh ri mbong mpông geh ndor năp puăn blon da dê, tâm rle panăp ndrel jêng pe mbor.

⁶ Hađăch ƀư đŏng du ndring ngih geh âk meh; ndring ngih nây jong bar jât prăm met, rkăng jât mprăm met. Mpeh panăp ndring ngih geh âk meh jêh ri du chiăng jia.

⁷ Y-Salômôn ƀư đŏng du jrô toyh n'gân sưng hađăch ntŭk păng gŭ phat dôih, rnha jêng Jrô Toyh Nau Di. Bu ƀư jrô toyh ma kađar tơm si sêdar ntơm bơh mbon tât ma dra klơ.

⁸ Bi ma ngih hađăch gŭ ta pakơi jrô toyh, geh nau rup tâm ban ma jrô toyh. Y-Salômôn ndâk đŏng du mlâm ngih ƀoi nĕ ma kon bu ur Pharaôn păng sŏk jêh jêng ur păng.

⁹ Lĕ rngôch ngih nây bu ƀư ma lŭ khlay jêh ri trah n'hat, phat tĭng nâm nau rup lĕ veh jêh, tâm trôm tâm ban đŏng ma padih, ntơm bơh mbon tât ta bôk mpir, jêh ri ntơm bơh padih tât ta nhuang toyh.

¹⁰ Mbon bu ƀư ma lŭ khlay jêh ri toyh, ăp mlâm dĭ prăm met, geh đŏng puăn met.

¹¹ Kô̆ klơ ƀư ma tơm si sêdar jêh ri lŭ khlay lĕ trah n'hat di tĭng nâm nau veh jêh.

¹² Ta văr jŭm nhuang toyh geh pe mbor lŭ toyh lĕ trah jêh ri du mbor njon rkăng ma tơm si sêdar, tâm ban ma nhuang tâm trôm jêh ri ndring panăp ngih brah Brah Yêhôva.

Ndrăp ndơ tâm trôm ngih brah

¹³ Hađăch Salômôn prơh bunuyh hăn jă Y-Hiram tă bơh Tyre.

¹⁴ Păng jêng kon du huê bu ur ndrô tâm ndŭl mpôl Naptali, mbơ̆ păng jêng du huê bunuyh Tyre, jêng du huê gru chiăr kông. Y-Hiram blau ngăn, gĭt rbăng, jêh ri ti păng blau kan tâm lĕ kan ƀư ma kông. Păng văch tât ma hađăch Salômôn jêh ri ƀư lĕ nau kan hađăch jao ma păng.

¹⁵ Păng tŏ bar mlâm meh ma kông: meh tal nguay prêh sĭn met jêh ri rval jêng prao met, meh tal bar tâm ban nây đŏng.

¹⁶ Păng tŏ đŏng bar bôk meh ma kông gay n'gân ta klơ chiông meh; prêh bôk meh tal nguay jêng bar met n'gul, prêh bôk meh tal bar jêng bar met n'gul đŏng.

¹⁷ Y-Hiram sŏk blah dreh ƀư ma lĕ rse rvăk rhên nkrêp nsum jêng rvang kao gay ƀư ueh ma bôk meh ta klơ chiông meh; geh pơh rvang kao ma bôk meh nây, jêh ri pơh rvang kao ma bôk meh ri.

¹⁸ Y-Hiram ƀư đŏng bar trong rup play pom năp văr jŭm ta klơ blah dreh gay ƀư ueh ma bôk meh nây, jêh ri ƀư pônây đŏng ma bôk meh ri.

¹⁹ Lĕ bôk meh ta klơ chiông meh tâm ntŭk ndring panăp, bu ƀư tĭng nâm rup kao si ueh, prêh bar met.

²⁰ Ta pĭt bâr, klơ bôl ăp bôk meh, păng ntă dreh kông, jêh ri tŏ rup du mbor geh bar rhiăng play pom gra nat, ndop jŭm ăp bôk meh nây.

²¹ Y-Hiram ndâk bar meh kông ta ndring panăp ngih brah. Păng ndâk meh mpeh pa ma jêh ri ntơ amoh jêng Jakin; jêh nây ndâk meh mpeh pa chiau jêh ri ntơ amoh jêng Bôas.

²² Ta klơ chiông lĕ meh geh rup kao si ueh. Pônây, nau kan ƀư bar mlâm meh kông lĕ lôch jêh.

²³ Jêh ta nây, păng tŏ du mlâm drŏng prăp dak rup rvang prêh bar met ma n'gul, huy prăm met, rval jŭm jât mprăm met.

²⁴ Ta jŭm lam drŏng nây geh bar mbor rup play nông, ăp n'gul met geh jât mlâm rup play nông, bu tŏ ndrel ma drŏng nây.

²⁵ Drŏng dak n'gân ta klơ rup jât ma bar rup ndrôk: pe mlâm uănh ma mpeh pa lơ, pe mlâm uănh ma mpeh nhâp nar, pe mlâm uănh ma mpeh pa dâng, jêh ri pe mlâm uănh ma mpeh luh nar. Drŏng dak gŭ ta klơ ndŭr kơi lĕ ndrôk nây, bi chiăng khân păng ndôn lăp mpeh tâm trôm.

²⁶ Mbâl drŏng geh du nđam; năp bâr drŏng nâm bu năp bâr kachok rup kao si ueh. Păng dơi dơ puăn rmưn puăn rbăn lit dak.

²⁷ Păng ƀư đŏng jât mlâm ndơl ma kông, ăp mlâm jong bar met, dĭ bar met, jêh ri prêh du met ma n'gul.

²⁸ Aơ jêng nau bu ƀư ndơl nây: Bu ƀư lĕ ndap kông da dê nkrêp đah jrŏng păng.

²⁹ Ta klơ lĕ blah kông nkrêp đah jrŏng nây geh trah rup lĕ yau mŭr, ndrôk nkuăng, jêh ri chêrubim; ta lĕ jrŏng, lĕ mpeh klơ jêh ri mpeh tâm dâng lĕ rup yau mŭr jêh ri ndrôk geh trah lĕ rvang kao.

³⁰ Tâm ăp mlâm ndơl geh puăn mlâm jâng ndeh ma kông nđâp ma mâng rnung ma kông. Ta puăn njônh ndơl nây geh lĕ jâng meh gay ndăl ngan grưng dak, nđâp ma lĕ rvang kao ta meng ăp jâng meh.

³¹ Klơ bôk ndơl, ta nklang geh du bâr rval mlâm rmeh luh n'gul met, dĭ pơh nđam ma n'gul. Ta klơ bâr nây geh đŏng rup trah mon. Bi ma ndap păng bu ƀư ma ndap kông puăn blon, mâu geh mlâm ôh.

³² Puăn mlâm jâng ndeh gŭ tâm dâng blah kông mbong, lĕ mâng rnung jâng ndeh bu nkrêp êp ndơl. Ăp jâng ndeh prêh pơh nđam ma n'gul.

³³ Lĕ rngôch jâng ndeh bu ƀư tâm ban ma jâng ndeh seh: Lĕ rngôch mâng rnung, săng, ryŏng, jêh ri lĕ glo đŭm tâm khan đah rnung bu tŏ da dê.

³⁴ Ta puăn njônh ăp ndơl, geh puăn jâng meh bu tŏ nkrêp đah ndơl.

³⁵ Ta măt klơ ndơl geh ndơ rmăn rvang prêh bar nđam ma n'gul, geh đŏng ƀư năp jêh ri lĕ blah kông.

³⁶ Ta măt năp jêh ri lĕ blah kông, Y-Hiram trah lĕ rup chêrubim, yau mŭr, jêh ri tơm đung, bi lĕ ntŭk hŏng păng trah lĕ rvang kao nkŭm jŭm.

³⁷ Păng ƀư jât mlâm ndơl nâm bu pônây; lĕ rngôch bu tŏ tâm ban da dê, nau veh, jêh ri nau ƀư rup jêng tâm ban.

³⁸ Jêh nau nây, păng ƀư jât mlâm thŭng ma kông, ăp thŭng dơi dơ pham rhiăng pham jât lit. Ăp thŭng prêh bar met jêh nây n'gân dơi ta klơ ndơl.

³⁹ Păng n'gân prăm mlâm ndơl mpeh pa ma ngih brah jêh ri prăm mlâm ndơl mpeh pa chiau. Păng n'gân tay đŏng drŏng dak ta mpeh pa ma bơh ngih brah, mơ mpeh pa dâng.

⁴⁰ Y-Hiram ƀư tay đŏng glah thaih, ndroh jêh ri ngan grưng. Pônây, Y-Hiram ƀư lôch jêh lĕ rngôch nau kan ma hađăch Salômôn tâm ngih brah Brah Yêhôva, geh:

⁴¹ bar mlâm meh kông, bar bôk meh n'gâng rvang n'gân klơ ăp meh, bar blah dreh kông gay nkŭm ta bar bôk meh n'gâng;

⁴² puăn rhiăng play pom gra nat ma bar mlâm dreh, nkrêp tay jêng bar mbor tâm ăp blah dreh nkŭm ta bar bôk meh ta klơ meh;

⁴³ jât mlâm ndơl jêh ri jât mlâm thŭng n'gân ta klơ ndơl;

⁴⁴ du mlâm drŏng dak jêh ri jât ma bar mlâm ndrôk ndăl tâm dâng;

⁴⁵ glah thaih, ndroh jêh ri ngan grưng. Lĕ rngôch ndơ dŏng Y-Hiram ƀư ăn ma hađăch Salômôn tâm ngih brah Brah Yêhôva ƀư ma kông tho chrêk da dê.

⁴⁶ Hađăch ăn păng tŏ lĕ rngôch ndơ aơ ta neh lâng Yurdan, ta du ntŭk geh âk neh uk, vah vang Sukôt jêh ri Sarêthan.

⁴⁷ Y-Salômôn mâu njing ôh lĕ rngôch ndơ dŏng nây, yorlah khân păng lĕ âk ir, rnoh kông mâu đŏng gĭt năl.

⁴⁸ Y-Salômôn ƀư đŏng lĕ rngôch ndơ dŏng tâm ngih Brah Yêhôva geh: nơng ƀư brah ma mah, sưng n'gân piăng let nhhơr ƀư đŏng ma mah;

⁴⁹ lĕ jâng kađen ma mah kloh n'gân panăp Ntŭk Dŭt Kloh Ueh, prăm mlâm mpeh pa ma jêh ri prăm mlâm mpeh pa chiau; kao kađen, ŭnh kađen, jêh ri ndơ nkep ŭnh ƀư ma mah da dê;

⁵⁰ lĕ ngan grưng, katrei nkăp brai ŭnh kađen, khăl, ngan pala dơm buh jêh ri ngan pala dơm ônh rnga ƀư ma mah chrêk da dê; lĕ lăk-lê khan mpông lăp tâm trôm dŭt ngih brah, jêng Ntŭk Dŭt Kloh Ueh, jêh ri mpông luh lăp ngih brah ƀư đŏng ma mah da dê.

⁵¹ Pônây, lĕ nau mbor kan hađăch Salômôn ƀư ma ngih Brah Yêhôva hŏ lôch jêh. Y-Salômôn đă leo nglăp tâm lĕ jay ngih brah Brah Yêhôva lĕ ndơ kloh ueh mbơ̆ păng jêng hađăch Đavit hŏ nhhơr, geh prăk, mah, jêh ri lĕ ndơ dŏng êng êng.