I Phung Hađăch 6 - Nau Brah Ndu Ngơi 2023

Y-Salômôn ndâk ngih brah

¹ Tâm năm puăn rhiăng pham jât, kơp ntơm bơh nôk phung ƀon lan Israel lĕ du luh jêh bơh Êjipt, jêng tâm năm rơh puăn Y-Salômôn chiă uănh phung Israel, tâm khay Sivơ, ntĭt jêng khay rơh bar, hađăch ntơm ndâk ngih Brah gay yơk mbah Brah Yêhôva.

² Ngih brah hađăch Salômôn ƀư ma Brah Yêhôva jong jêng pe jât met, rkăng jêng jât met, jêh ri prêh jêng jât mprăm met.

³ Ndring ngih panăp ngih brah geh jong jêng jât met, tâm sŏng đah nau huy ngih brah, jêh ri huy jêng prăm met, thoi ma jong ngih brah.

⁴ Hađăch ƀư đŏng lĕ mpông bloh geh ndor năp jêh ri mbong gre ngih brah ma tơm si.

⁵ Tĭng nâm mpir ngih brah, hađăch ndâk lĕ jrô prêh văr jŭm ngih brah jêh ri ntŭk kloh ueh; hađăch ƀư đŏng âk jrô văr jŭm.

⁶ Mpeh tâm dâng dŭt huy bar met n'gul, mpeh ta n'gul huy pe met, jêh ri mpeh tal pe huy bar met n'gul. Padih ngih brah, hađăch ndâk mpir văr jŭm rŭch đa lê̆ gay ăn lĕ rda tâm jrô prêh ta nây mâu geh lăp ôh tâm mpir ngih.

⁷ Tơlah ƀư ngih, bu sŏk dŏng lŭ hŏ trah ơm jêh ta ntu lŭ, pôri dôl bu ndâk ngih mâu tăng nteh ôh me nôp, nteh sung mâu lah ăp ndơ dŏng ma loih.

⁸ Mpông lăp ma ngih ta nklang ta mpeh pa ma ngih brah; bu hăn hao ngih ta nklang ma du mlâm gung, jêh nây bơh ngih ta nklang hăn hao ngih tal pe.

⁹ Pônây, hađăch Salômôn ƀư lôch jêh nau ndâk njêng ngih brah. Hađăch dơm lĕ ntur jêh ri pâng dra klơ ma tơm si sêdar.

¹⁰ Hađăch ndâk đŏng lĕ gưl jrô prêh bar met n'gul tĭng nâm lĕ ngih brah, tâm krêp đah ngih brah ma lĕ ntur tơm si sêdar.

¹¹ Nôk nây geh nau Brah Yêhôva ngơi ma Y-Salômôn pô aơ:

¹² “Bi ma ngih brah may dôl ƀư aơ, tơlah may tông tĭng nâm lĕ nau vay dăp bơh Gâp, tĭng lĕ nau vay Gâp ƀư, djôt prăp jêh ri chuat hăn tĭng lĕ rngôch nau vay ntăm bơh Gâp, Gâp mra ƀư ma may nau ton Gâp hŏ ngơi jêh ma Y-Đavit, mbơ̆ may.

¹³ Gâp mra gŭ ta nklang phung ƀon lan Israel jêh ri mâu mra chalơi ôh phung Israel jêng phung ƀon lan Gâp.”

¹⁴ Pônây, Y-Salômôn ƀư ngih brah jêh ri ƀư lôch nau kan nây.

¹⁵ Hađăch sŏk kađar tơm si sêdar nchăng mpir tâm trôm ngih brah ntơm bơh mbon tâm dâng tât ma dra klơ, jêh ri nkŭm mbon ma kađar si chiprơ.

¹⁶ Hađăch nchăng rgăn jât met kô̆ nglĕ dŭt tâm ngih brah ma kađar tơm si sêdar ntơm bơh mbon tâm dâng tât ma dra klơ, gay ƀư Ntŭk Dŭt Kloh Ueh.

¹⁷ Kô̆ hôm e tâm ngih brah ta mpeh panăp jêng bar jât met.

¹⁸ Tâm trôm ngih brah ƀư ma tơm si sêdar bu trah mon rup play nông jêh ri kao dang. Lĕ rngôch ƀư ma tơm si sêdar da dê, rĭ dĭng mâu saơ ôh lŭ.

¹⁹ Hađăch ndrăp nkra đŏng kô̆ tâm trôm dŭt tâm ngih brah ƀư Ntŭk Dŭt Kloh Ueh gay dơm Hip Nau Tâm Rnglăp Brah Yêhôva ta nây.

²⁰ Ntŭk Dŭt Kloh Ueh jong jât met, rkăng jât met, jêh ri prêh jât met, bu mblum păng ma mah chrêk. Nơng ƀư brah păng ƀư ma tơm si sêdar, bu mblum đŏng păng ma mah chrêk.

²¹ Y-Salômôn mblum ma mah chrêk tâm trôm ngih brah, jêh ri drăng du rse rvăk ma mah panăp Ntŭk Dŭt Kloh Ueh, jêng ntŭk bu mblum păng ma mah đŏng.

²² Hađăch mblum ma mah lam lĕ ngih brah kŏ tât mâu hôm geh ôh du ntŭk hŏng mâu geh mah. Hađăch mblum đŏng ma mah lam măt nơng ƀư brah ta Ntŭk Dŭt Kloh Ueh.

Ndơ dŏng tâm trôm ngih brah

²³ Tâm trôm Ntŭk Dŭt Kloh Ueh, hađăch ƀư bar mlâm rup chêrubim ma tơm ôlive, prêh prăm met.

²⁴ Du mlâm nting năr chêrub jong bar met n'gul, nting năr ri ăt jong bar met n'gul; kơt nây, ntơm bơh chiông nting năr aơ ma đah chiông nting năr ri jong prăm met.

²⁵ Chêrub tal bar bu veh đŏng geh prăm met. Lĕ bar mlâm chêrubim geh nau veh jêh tâm ban da dê jêh ri rup ăt tâm ban.

²⁶ Chêrub aơ prêh prăm met, chêrub ri đŏng kơt nây.

²⁷ Y-Salômôn n'gân bar chêrubim nây ta nklang Ntŭk Dŭt Kloh Ueh, ta ntŭk nglĕ dŭt ngih brah. Ntĭng năr chêrubim lĭ luh gay du mlâm nting năr chêrub tal nguay rđĭl đah mpir mpeh đah aơ, jêh ri du mlâm nting năr chêrub tal bar rđĭl đah mpir mpeh đah ri. Bar mlâm nting năr hôm e nây tâm mâp ndrel ta nklang Ntŭk Dŭt Kloh Ueh.

²⁸ Hađăch mblum đŏng mah ma bar chêrubim.

²⁹ Ta klơ lĕ mpir văr jŭm ngih brah, lĕ tâm trôm nđâp padih, Y-Salômôn trah mon geh lĕ rup chêrubim, rup tơm đung jêh ri rup kao dang.

³⁰ Bi mbon ngih brah păng mblum đŏng ma mah lĕ tâm trôm nđâp padih.

³¹ Ta ntŭk lăp Ntŭk Dŭt Kloh Ueh, hađăch ƀư bar blah mpông ma tơm ôlive, ntur mpông jêh ri n'gâng geh prăm blon.

³² Ta klơ bar blah mpông ma tơm ôlive nây, hađăch trah mon lĕ rup chêrubim, rup tơm đung jêh ri rup kao dang, jêh nây mblum ma mah; hađăch mblum lĕ rup chêrubim jêh ri rup tơm đung ma mah pônây đŏng.

³³ Ta trong lăp ngih brah, hađăch ƀư đŏng n'gâng mpông ma tơm ôlive geh puăn blon;

³⁴ bar blah mpông ma tơm si chiprơ, blah mpông nây geh bar blah dơi kêch rtôn, jêh ri blah mpông ri đŏng kơt nây.

³⁵ Y-Salômôn trah mon lĕ rup chêrubim, rup tơm đung jêh ri kao dang, jêh nây mblum ma mah, jêh ri nkŭm ma mah ta lĕ rup trah mon.

³⁶ Hađăch ndâk đŏng nhuang tâm trôm ngih brah đah pe mbor lŭ khlay lĕ trah mon nau njêh ngăn jêh ri du mbor rkăng ma tơm si sêdar.

³⁷ Tâm năm rơh puăn, tâm khay Sivơ, bu ntơm ndâk mbon ngih brah Brah Yêhôva.

³⁸ Tât năm jât ma nguay, di tâm khay Bul, ntĭt jêng khay rơh pham, nau mbor kan ndâk njêng ngih brah nây ƀư lôch jêh di tĭng nâm lĕ kô̆ tâm rup bu hŏ nchih jêh ri nau veh jêh. Y-Salômôn hŏ ndâk ngih brah nây tâm pơh năm.