I Phung Hađăch 5 - Nau Brah Ndu Ngơi 2023

Y-Salômôn ndrăp rdâk ngih brah

¹ Tơlah tăng lư ma Y-Salômôn hŏ bu tŏ jêh dak ƀâu kah gŭ ta sưng hađăch chiă uănh thoi ntrok mbơ̆ păng, hađăch Tyre jêng Y-Hiram prơh phung oh mon păng nơm hăn tât ma Y-Salômôn, yorlah Y-Hiram ăt rŏng ƀaƀơ ma Y-Đavit.

² Y-Salômôn njuăl phung mbơh hăn ngơi ma Y-Hiram pô aơ:

³ “May hŏ gĭt nanê̆ ngăn ma mbơ̆ gâp Y-Đavit mâu dơi ndâk ôh du mlâm ngih ma amoh Yêhôva Brah Ndu păng, yorlah nau păng tâm lơh đah phung rlăng gŭ jŭm păng, kŏ tât Brah Yêhôva dơm jêh phung rlăng nây tâm dâng jâng păng.

⁴ Ƀiălah aƀaơ ri, Yêhôva Brah Ndu gâp, ăn jêh ma gâp dơi đăp mpăn gŭ jŭm, mâu hôm geh ôh phung rlăng, mâu đŏng hôm geh nau mhĭk tât.

⁵ Yor ri, gâp ŭch ƀư du mlâm ngih brah ma amoh Yêhôva Brah Ndu gâp, tĭng nâm Brah Yêhôva hŏ ntĭnh jêh ma Y-Đavit, mbơ̆ gâp pô aơ: ‘Kon bu klâu may, Gâp mra dơm ta sưng hađăch chiă uănh thoi ntrok may, mra ndâk du mlâm ngih brah ma amoh Gâp.’

⁶ Pôri aƀaơ ri, dăn may ntĭnh hom ăn bu kăl tơm si sêdar tă bơh n'gor bri Liban ma gâp. Phung oh mon gâp mra tâm rnglăp đah phung oh mon may, jêh ri gâp mra mplơ̆ prăk pah kan ma khân păng tĭng nâm rnoh may hŏ tâm nal; yorlah may gĭt pô aơ mâu geh ôh du huê tâm phung hên blau kăl tơm si nâm bu phung Sidôn.”

⁷ Tơlah tăng jêh nau Y-Salômôn ngơi, hađăch Hiram răm rhơn ngăn jêh ri lah: “Nar aơ khư tâm rnê ma Brah Yêhôva, Nơm hŏ ăn ma Y-Đavit du huê kon gĭt mĭn gay chiă uănh phung ƀon lan âk râk aơ!”

⁸ Jêh nây Y-Hiram prơh bu hăn lah ma Y-Salômôn: “Gâp hŏ tăng jêh phung mbơh may ngơi ma gâp; gâp mra ƀư ăn may lĕ nau may dăn ma tơm si sêdar jêh ri tơm si chiprơ.

⁹ Phung oh mon gâp mra leo tơm si nây ntơm bơh Liban tât ta dak mƀŭt, jêh nây gâp mra ƀư rkĭt jêh ri ngre ăn hăn ta dak mƀŭt leo rlet ma ntŭk may nchŏng. Ta nây gâp mra rơih rkĭt, jêh ri may mra sŏk dơn nchuăn. Bi may, dăn ƀư đŏng tĭng nâm nau gâp ŭch jêng ăn ndơ sông sa ma phung tâm ngih hađăch gâp.”

¹⁰ Pônây, Y-Hiram ăn ma Y-Salômôn lĕ rngôch tơm si sêdar jêh ri tơm si chiprơ tĭng nâm păng ŭch.

¹¹ Bi Y-Salômôn ăn ma Y-Hiram puăn rkeh puăn rsen lit ba ƀlê dŏng ƀư ndơ sông sa ma phung ngih hađăch păng, jêh ri puăn rkeh puăn rsen lit dak ngi ôlive mâu geh rlŭk. Ăp năm, Y-Salômôn ăn ma Y-Hiram kơt nĕ.

¹² Brah Yêhôva ăn nau gĭt mĭn ma Y-Salômôn nâm bu Păng hŏ ton ma hađăch. Vah vang Y-Hiram jêh ri Y-Salômôn geh nau tâm jrông ndăl ueh, jêh ri bar hê khân păng hŏ ƀư nau tâm rnglăp ndrăng khân păng.

¹³ Hađăch Salômôn kuăl phung pah kan jâk tâm lĕ rngôch phung Israel, geh pe rmưn bunuyh.

¹⁴ Hađăch prơh khân păng hăn tât ta Liban, tâm plăch ăp khay du rmưn bunuyh du khay; khân păng gŭ ta Liban du khay, jêh ri gŭ ta ngih khân păng bar khay. Y-Adôniram chiă uănh phung pah kan jâk nây.

¹⁵ Y-Salômôn geh pơh rmưn bunuyh tung ndơ jâk jêh ri pham rmưn bunuyh châm trah lŭ ta klơ yôk.

¹⁶ Rlau ma nây hôm geh pe rbăn pe rhiăng kôranh Y-Salômôn hŏ dơm djôt kan chiă uănh nau kan jêh ri chiă uănh phung pah kan.

¹⁷ Hađăch ntĭnh khân păng sŏk lĕ lŭ toyh jêh ri khlay gay trah dŏng ƀư mbon ma ngih brah.

¹⁸ Phung pah kan ma Y-Salômôn jêh ri ma Y-Hiram nđâp ma phung Gêbalit trah lŭ. Khân păng ndrăp jêh tơm si jêh ri lŭ gay ndâk ngih brah.